“?Yu Bin Stap Wea?,” Liahona, Jenuware 2023.
Ol Voes blong Ol Lata–dei Sent
?Yu Bin Stap Wea?
Mi mas akseptem taem blong God mo ol stamba tingting blong Hem taem mi lanem blong lavem bubuwoman blong mi olsem we Papa long Heven mo Jisas Kraes Tufala i lavem Hem.
Nomata long sik blong bubuwoman, evri samting we hem i mekem blong mi, i from hem i lavem mi.
Hem we i raet i glad blong givim pikja ia
“?Yu bin stap wea?” bubuwoman blong mi i bin askem taem hem i ansa long noknok blong mi long doa. Mi jes kambak nomo long wan fultaem misin long El Salvador. Ae blong bubuwoman oli saen wetem glad blong luk mi bakegen. Han mo hem oli sofsof mo wom taem hem i putum i go raonem nek blong mi.
Mitufala i gat wan gudtaem storian taem mi ansa long ol kwestin blong hem abaot misin blong mi. Mi filim hat blong mi i sore taem mi tokbaot ol pipol, kaekae, hadwok mo ol merikel blong misin blong mi. Afta we mi finisim storian blong mi, kwiktaem hem i stap kwaet. Afta hem i askem, “?Yu bin stap wea, pikinini blong mi?”
Mi luksave se hem i no stap lisin ia. So, mitufala i statem storian blong mitufala bakegen. 20 minit i no pas yet, hem i askem bakegen namba tri, “?Yu bin stap wea, pikinini blong mi?”
Wan samting i rong. I no longtaem mi fanemaot se wan yia afta we mi go long misin blong mi, bubuwoman blong mi i kasem sik blong bren we i stap fogetem samting.
Mi filim wan strong filing long hat blong mi blong wantem blong helpem bubuwoman blong mi. Blong tu yia mi bin prijim lav we God i gat long ol pikinini blong Hem. Naoia mi gat janis ia blong laef folem ol tijing ia. Nomata we mi save se bae i had, mi akseptem blong muv i kam stap wetem hem, mekem se mi save helpem hem.
Ol fas manis blong mitufala tugeta i rili had. Olsem long misin fil, fasin blong stap wet longtaem mo blong stap kontrolem ol wari i kam wan fultaem wok. Mo long taem blong misin blong mi, mi mas akseptem taem blong God mo ol stamba tingting blong Hem taem mi lanem blong lavem bubuwoman blong mi olsem we Papa long Heven mo Jisas Kraes Tufala i lavem hem.
Blong stap laef wetem bubuwoman i olsem blong stap wetem tri defdefren pipol. Samtaem hem i no save agri blong gat wan narafala wan insaed long haos. Samtaem hem i wantem mi kea mo mi stap oltaem, i mekem hem i glad se hem i no stap hemwan. Samtaem wanem we i stap long tingting blong hem oltaem nomo hem i blong mekem kaekae blong fidim apu pikinini boe blong hem we i jes kambak long misin. “!No mekem hemia!” kwiktaem i save kam “?I oraet, sapos yu mekem?”
Be nomata hemia, bubuwoman blong mi, i bin wan bigfala blesing long mi. Mi save se nomata sik blong hem, be evri samting we hem i mekem blong mi, i from se hem i lavem mi.
Ol swit toktok we i kam wetem tru hat blong bubuwoman blong mi oli kam long mi evri taem mi kambak long skul o wok mo kam long haos. Wetem wan naes smael hem i haggem mi, kisim mi long jiks, mo askem wetem lav, “?Yu bin stap wea, pikinini blong mi?”