“Stap Long Ples Ia from Boe blong Yu,” Liahona, Jenuware 2023.
Ol Voes blong Ol Lata–dei Sent
Stap Long Ples Ia from Boe blong Yu
Afta we Spirit i toktok long papa blong mi long taem blong prishud odinesen blong mi, hem i tanem laef blong hem i kam bak.
Fofala Jeneresen, i kam long Kwani Povi Winder
Mi kam aktiv long Jos taem angkel blong mi Bill i tekem tufala sista blong mi i go long Praemeri. Praemeri tija blong mi, Jean Richardson, i olsem wan mama long ol pikinini. Mi laekem hem mo ol niufala fren blong mi long jos, we oli moa kaen long mi bitim ol pikinini long ples we mifala i stap long hem. Mekem se, mi disaed blong stap.
Mi kasem 12 betdei blong mi, Bisop Dal Guymon i bin invaetem mi blong kasem Aronik Prishud mo blong oli odenem mi i kam wan dikon. Mi no save stret se hemia i minim wanem, be mi talem yes nomo. Afta, hem i talem, “I oraet sapos yu tekem papa blong yu i kam long ples long nekis Sandei.”
Papa mo famli blong hem oli stop blong stap kam long jos taem hem i gat kolosap 13 yia. Olsem wan yang adalt, hem i spenem kolosap evri wiken long ol lokol ba o long ples we oli stap sakem ol huk blong fis we i stap flae long ea blong pulum ol fis i kam. Hem i bin givim seves long YS Navi Wol Wo II mo Wo long Korea. Hem i smokem sikaret, i stap drong, mo swe, be ol man long smol taon blong mifala, Montana oli save gud long hem olsem wan man we i stap ones mo mekem samting i fea.
Taem papa i tekem mi go long jos long nekis Sandei, hem i wan bigfala samting. Taem i kam we bae oli odenem mi, Bisop Guymon i singaotem mi i go antap mo askem mi blong sidaon long wan jea. Samfala man—be i no papa blong mi—oli putum han blong olgeta long hed blong mi mo mekem odinens.
Mi filim ol han blong sam long olgeta oli hevi long hed blong mi. Papa i sidaon long wan stul longwe smol long mi, i filim wan defren kaen wari—long jes blong hem. Wan voes i toktok insaed long hem, i stap talem, “Yu nid blong stap long ples ia from boe blong yu long nekis taem we hemia i hapen.”
Long wik ia mo folem i go, papa blong mi i tanem laef blong hem i kam bak mo statem blong kam long jos evri Sandei. I no longtaem, Jos i kam stamba blong wanem we laef blong famli blong mifala i stap lukluk nomo long hem.
Papa i kam ol dikon blong mi, ol tija, ol pris, advaesa blong kworom; Sandei Skul tija blong mi; mo koj blong basketbol mo kriket mo volibol blong mi. Long taem we mitufala i kompanion blong hom tijing, papa i helpem ol narafala man mo ol famli blong kambak long ol aktiviti blong Jos.
Tru long help blong papa blong mi, mi kasem eksperiens blong miwan mo fasin blong mi jenisim laef. Stat long tetaem ia, mi stap traem blong stap luksave mo helpem ol man we, olsem papa blong mi, oli save ansa long wan invitesen blong kam wan gudfala papa mo stap wan bes papa.
Bae mi oltaem talem tangkyu from wanem we angkel blong mi Bill, wan kaen tija long Praemeri, wan waes bisop, mo papa blong mi i bin mekem blong mi 60 yia i bin pas.