“Ol Famli Oli Save Stap blong Taem we I No Save Finis,” Liahona, Jenuware 2023.
Ol Besik blong Gospel
Ol Famli Oli Save Stap blong Taem we I No Save Finis
Famli i stamba pat blong sosaeti mo Jos. Ol memba blong Jos Ia blong Jisas Kraes blong Ol Lata-dei Sent, oli biliv se ol famli oli save stap tugeta blong taem we i no save finis. Yumi wok blong mekem ol famli blong yumi oli kam strong long wol ia. Yumi gat fet tu se yumi save kasem ol blesing blong wan famli we oli no save finis.
Famli blong God
Evri pipol oli ol spirit pikinini boe mo gel blong papa mo mama long heven. Yumi evri wan i pat blong famli blong God. Yumi evri wan i gat wan tabu fasin mo wan ples blong go long hem. Sapos yumi laef long stret mo gud fasin, yumi save gobak mo laef wetem Papa blong yumi long Heven olsem pat blong famli blong Hem we i no save finis.
Ol foto blong mared oli kam long Joseph Kaluba
Ol Famli we Oli No Save Finis
Taem wan man mo wan woman tufala i mared insaed long tempol mo kipim ol kavenan,blong tufala, mared blong tufala bae i stap blong taem we i no save finis. Oli singaotem odinens blong tempol ia, wan siling. Ol pikinini we oli bon afta we papa mo mama tufala i sil, oli bon insaed long kavenan ia. Ol pikinini we oli bon bifo long siling blong tempol, oli save sil long papa mo mama insaed long tempol mekem se oli save kam wan famli blong oltaem. Ol memba blong jos oli mekem famli histri mo tempol wok mekem se oli save silim ol famli blong olgeta tugeta tru evri jeneresen. Blesing ia blong wan famli we oli no save finis i kam posibol from Jisas Kraes mo Atonmen blong Hem.
Mared
Mared bitwin wan man mo wan woman , God nao i odenem . Gospel blong Jisas Kraes i tijim ol hasban mo ol waef blong stap tru long tufala wanwan mo fetful long ol kavenan blong mared blong tufala. Tufala i mas stap tru long tingting, toktok mo aksen. Mared i wan ikwol wok blong tu patna, mo ol patna oli mas leftemap tingting, givim kamfot mo helpem wanwan long tufala.
Ol Papa mo Mama, mo Ol Pikinini
God i givim komanmen long Adam mo Iv blong gat pikinini. Ol lida blong Jos oli tijim se komanmen ia i stap semmak yet. Ol mama mo ol papa oli wok tugeta blong resemap ol pikinini blong tufala wetem lav mo stret mo gud fasin (luk long Doktrin mo Ol Kavenan 68:25–28). Oli tijim ol pikinini blong givim ona mo obei long papa mo mama blong olgeta (luk long Eksodas 20:12).
Stap Tij mo Stap Lanem Samting
Ol papa mo mama oli tijim ol pikinini blong olgeta blong lavem God mo obei ol komanmen blong Hem. Laef blong famli i givim janis long yumi blong filim glad mo lanem blong gat fasin blong stap wet longtaem mo fasin blong tingbaot o helpem ol narafala man fastaem. Ol defren samting ia oli helpem yumi blong kam moa olsem God mo mekem yumi rere blong stap laef long wan laef we i hapi olsem wan famli blong taem we i no save finis.
Stap Mekem Ol Famli Oli Kam Strong Moa
I nidim wok, taem mo fasin blong stap wet longtaem tu i bildimap wan famli we i gat sakses. Ol prinsipol blong gospel olsem fet, prea, fasin blong fogiv, lav mo ol gudtaem we evri famli, oli save helpem yumi faenem glad long famli laef. Yumi save kasem tu revelesen blong yumiwan blong mekem famli blong yumi i kam moa strong.
Pikja blong Jisas, i kam long Heinrich Hofmann
Ol Blesing Oli Stap blong Evriwan
I no evriwan i gat janis blong stap pat blong wan famli we i stret gud evriwan long wol ia. Be God i bin promesem se evriwan we oli obei long ol komanmen blong Hem bae oli kasem evri blesing blong wan famli we i no save finis. Yumi save trastem Hem mo gat fet long taem blong Hem.