“Ol Storian we Famli I Nid blong Gat,” Liahona, Jenuware 2023.
Ol Storian we Famli I Nid blong Gat
Ol storian we i nid blong gat, bae oli save helpem ol pikinini blong yumi save wanem oli bilivim long hem mo from wanem oli bilivim long hem.
Ol pikja mo droing oli kam long Noah Regan
Wan pikinini boe i askem long papa blong hem blong tijim hem olsem wanem blong stap klaem long maonten. Papa ia i tijim evri samting we bae oli nidim, we i tekem tu, fasin blong mekem plan, sefti, fasin blong rere mo ol tul. Pikinini boe ia askem se wetaem nao bae tufala i tokbaot wanem blong mekem sapos i gat wan imejensi. Papa ia i talem se hem i no wantem blong mekem boe blong hem i fraet mo we storian ia bae i wet kasem taem we bae i impoten blong tokbaot.
Tufala i flatem trening blong tufala mo tufala i tekem wan wokbaot blong tufala i go antap long Maonten Rainier Seattle, Wasington. Eksperiens mo weta i bin stat gud tumas kasem taem weta i tanem mo kam moa nogud, mo afta oli luk se olgeta evriwan oli stap lukluk i go long ol ae blong wan bigfala sno we i stap brokbrok mo stap kam.
Oli no bin save wanem blong mekem from se oli no bin toktok raon long hemia. Pikinini boe i askem papa blong hem, “?Papa?, mi mi rere nao long storian ia long saed blong ol imejensi?”
Ol storian we i nid blong gat—long ol hom blong yumi we i saf—i save helpem yumi blong rere long ol bigfala sno we oli stap kam long laef.
“Be fasfala bigfala trutok long yunives i we, God i lavem yumi,”Elda Jeffrey R. Holland blong Kworom blong Olgeta Twelef i talem.1 Ol toktok blong hem oli rimaenem yumi se lav i fandesen blong taem we i no save finis mo blong ol evri dei laef blong yumi. Wetem lav ia we i kam long en, ol storian mo ol koneksen we yumi mekem wetem famli blong yumi oli impoten.
Olsem wan hasban, papa, skul kaonsela, kaonsela long Saed blong helt blong tingting, mi bin faenemaot se ol storian insaed long famli oli impoten tumas mo oli no mas stap lego i stap. Joy D. Jones, foma Jeneral Presiden long Praemeri, i bin talem: “Yumi no save wet se bae jenis i jes hapen nomo olsem wetem ol pikinini blong yumi. … Ol famli storian abaot gospel blong Jisas Kraes,oli ol impoten storian, … i save invaetem Spirit.”2
?Wanem hem i ol storian we i nid blong gat?
Sista Jones i talem mining blong ol storian we i nid blong gat olsem, ol storian we oli simpol, oli kea, i save lidim ol pikinini blong oli save wanem oli biliv long hem, be moa impoten, from wanem oli bilivim hemia.”3 Wan toktok we mi laekem tumas hem ia simpol. I no nid blong mekem ol storian blong yumi oli dip o i tokbaot fulap defdefren samting o iven blong mekem plan from. I tru, sam long ol bes storian i olgeta we yumi no mekem plan from, be i no bitim blong rere oltaem blong gat Spirit i stap wetem yumi blong helpem yumi.
Sista Jones i gohed blong talem: “Wok blong gat jenis wanwan taem i no wan prinsipol blong gospel blong Jisas Kraes. Blong kam olsem Sevya blong yumi, bae i no hapen wanwan taem nomo.”4 I hapen olsem tijing folem tijing, wetem taem mo hadwok.
?Hamas taem nao storian we i nid blong gat, i mas hapen?
Yumi mas toktok wetem ol pikinini blong yumi evri dei. Moa mo oltaem taem yumi gat ol storian we i nid blong gat, bae i kam moa nomol, i kam wan nomol fasin, mo bae oli gat moa laet i stap wetem olgeta.
!Wei we i moa nogud blong gat ol storian we i nid blong gat, hem i blong nogat nomo! Oltaem yumi stap tingting se i no raet taem, o i fasfas tumas, o ol pikinini blong yumi bae oli no andastanem. Yumi no wantem blong talem wan toktok we bae i mekem wan i harem nogud, o talem wan rong samting, o blong mekem wan i sem. Be i gud blong stap traem blong gat wan storian i moa gud bitim blong no stap talem wan samting.
?Long wanem wei nao yumi save gat ol storian we i nid blong gat wetem ol pikinini blong yumi?
Simpol resipi ia we mi bin faenemaot blong stap gat ol storian we i nid blong gat, hem i lav, lisin, mo jenis. Nomata se bae yumi no mekem i stret evriwan long eniwan long olgeta, yumi save traehad blong folem paten ia oltaem.
Lav: Sapos i nogat fandesen mo fasin blong praktisim lav, yumi no save gat ol storian we i gat nid we i mo impoten. Lav hem i, wanem, wetaem, from wanem, mo olsem wanem blong evri samting we yumi mekem long ol famli blong yumi. Ol pikinini blong yumi oli nid blong filim sef taem oli stap konek wetem yumi mo lav i givim ples ia. Yumi save soem lav oltaem. Jisas Kraes i soem long yumi olsem wanem blong mekem hemia.
Sista Jones i talem: “Taem yumi stap fidim mo mekem rere ol pikinini blong yumi, yumi letem blong oli mekem joes, yumi lavem olgeta wetem ful hat blong yumi, yumi tijim ol komanmen blong God long olgeta, mo presen ia blong Hem we i fasin blong sakem sin, mo yumi neva, neva,givap long olgeta. Long en, ?hemia i no rod ia nao we Lod i mekem wetem wanwan long yumi?”5
Lisin: Mi bin lanem samting tru long ol mistek blong miwan we i mekem se fasin blong stap lisin i kam gud mo hem i impoten pat blong eni storian we i nid blong gat. Fasin blong stap lisin i mas kam faswan mo tu taem olsem oltaem. Jisas Kraes i nambawan eksampol blong olsem wanem blong gat ol storian we i nid blong gat mo blong save lisin gud. Yumi lanem long Jon 8 se taem we ol Farisi oli karem woman ia we i brekem loa blong adaltri i kam long Hem, ol fas samting we Hem i talem long woman ia i ol kwestin: “Woman. ?Ol man ya oli go wea? ?I no moa gat wan i stap blong jajem yu?” (ves 10). Blong help blong mekem se i gat nid blong lanem samting i hapen, Hem i askem ol kwestin mo lisin bifo i stap tij.
Jenis: Taem yumi stat blong gat lav, lisin mo konek, ?wanem nao yumi mekem long ples ia? ?I nid blong yumi sakem sin, tij, lisin moa, givim seves, talem sori, fogiv? Ol stori we i nid blong gat oli sud givim long yumi wan janis blong jenis. Oltaem yumi mas wantem blong stap traehad blong stap, olsem we Presiden Russell M. Nelson i bin talem, “paoa blong mekem mo stap gud moa evri dei.”6
?Long wanem wei nao yumi save gat ol storian we i nid blong gat oltaem?
Bae spirit i lidim yu tru long revelesen blong wanem nao i bes blong famli blong . Tingting long ol tingting ia we oli putum we i kam long ol eksperiens blong ol famli blong yumi.
Famli skripja stadi: Taem mi askem ol pikinini blong mitufala wanem mitufala i mekem blong helpem olgeta moa blong gat ol storian abaot gospel, oli talem se hem i long ol taem blong stap stadi long ol skripja tugeta evri naet yusum Kam Folem Mi.
Famli testemoni miting evri fast Sandei: I no wan stret testemoni we yumi stap mekem oltaem be wan taem we evriwan long famli blong mifala oli gat blong serem ol filing, ol bilif, ol hadtaem mo ol sakses. Waef blong mi oltaem mitufala i traehad blong testifae abaot Jisas Kraes. Miting ia i kam wan long ol impoten eksperiens we i jenisim ol laef insaed long hom blong mifala.
Famli dina: Taem mifala i talem, “Wanem taem ia?” long taem blong dina, ol pikinini oli save se i taem blong evriwan blong serem wan samting we i bin go gud mo wan samting we oli filim se i save kam moa gud yet abaot dei ia. Oltaem hemia i lidim olgeta blong soem mo talem tangkyu, lav, samtaem oli taet, mo plante taem ol storian abaot gospel we oli no stap hapen oli hapen.
Ol storian wetem wanwan: Mi laekem tumas taem we mitufala i gat evri manis long fast Sandei blong sidaon wetem wanwan long ol pikinini blong mitufala blong, prea mo talem nem blong olgeta wanwan, lukluk long ae blong olgeta mo askem ol kwestin long olgeta. Mi traem blong lisin mo konek wetem ol filing blong olgeta mo ol nid blong olgeta. Long stat oli no filim gud tumas, be naoia oli stap misim sapos mifala i no mekem. Mi hop se oli save se taem blong mi wetem olgeta i moa impoten bitim eni narafala samting, mo se mi wantem blong gat ol storian we i nid blong gat wetem olgeta evri dei.
Luklukbak long ol gol: Mifala i krietem ol gol blong olgeta wanwan, olsem kapol mo olsem famli evri Jenuware. Afta, mifala i toktok raon long fasin blong kam antap, mo stap gohed strong long olgeta evri manis long taem blong wan skripja stadi taem, o wan lesen blong famli haos naet. Hemia i lid i go long ol storian we i nid blong gat.
Wok tugeta olsem kapol o papa mo mama: Evri Sandei naet, taem mi mo waef blong mi i stap go tru long ol kalenda blong mifala blong evri wik, mitufala askem mitufala wan abaot wanem mitufala stap filim mo wanem we mitufala i stap traehad from o wanem mitufala i nidim help wetem. Mitufala i gat ol storian we i nid blong gat abaot mared laef blong mitufala mo wanwan pikinini blong mitufala, mo wanem mitufala i nid blong mekem blong sloslo gospel blong Jisas Kraes i save gro moa insaed long wanwan hat blong mitufala.
Waef blong mi i save lisin gud bitim mi mo hem i moa gud long taem blong stap helpem mitufala blong stap balens mo lukluk nomo long rod blong kavenan. Mi lanem plante samting long hem mo gat blesing se hem i bin jusum mi blong taem we i no save finis.
Famli blong mitufala i no stret gud evriwan long saed blong stap mekem ol samting ia, be mifala i traehad mo gohed blong stap traem.
Stap rere bifo ol bigfala sno i brokbrok i kam
No wet kasem taem we ol bigfala sno blong laef oli stap kam from mared blong yu, ol pikinini, o ol narafala rilesensip. I no wan samting blong sapos be wetaem. Gospel mo ol narafala storian we i nid blong gat, oli stap mekem yumi rere gud inaf nomo sapos oli tekem ples wanwan taem mo from i nid blong mas mekem.
Blong stap tugeta wetem waef blong mi, ol pikinini mo famli blong taem we i no save finis, i bigfala gol blong mi mo stamba tingting blong evri samting we mi mekem we i tekem tu, wanwan storian we i nid blong gat.
Mi mekem mistek, olsem we yumi evriwan i mekem, be tru long paoa blong Jisas Kraes mo fasin blong sakem sin, oli leftemap mi. Sevya i promes blong mekem yumi kam strong tru long paoa blong Hem mo hop ia we i stret gud evriwan we Hem i stap givim tru long Atonmen blong Hem. !Yumi no nidim blong stap stret gud evriwan, be yumi nidim blong stap traehad blong kam antap! Wanwan long yumi i gat paoa ia i stap wetem yumi. Bae yu no save lus. Sakses i stap oltaem tru long hadwok.
Presiden Nelson i bin promesem se “taem yufala i stap jusum blong letem God i stap win insaed long laef blong yufala, bambae yufala i gat eksperiens, blong yufalawan, se God i wan God blong ol merikel [Momon 9:11].”7 Hemia i save minim tu blong letem God i win long ol storian we i nid blong gat. Evri samting i posibol tru long Sevya blong yumi, Jisas Kraes, we i tekem tu, ol storian we i nid blong gat. !Lav i ansa blong Hem oltaem!
Man we i raet long ples ia i stap long Wasington, YSA.