“Avea o se Nuu o Siona,” Liahona, Fep. 2023.
Avea ma se Nuu o Siona
A o ma fegalegaleai ma nisi mai tulaga eseese, na ma iloa o ō latou aafiaga tele ma le talatuu e faatamaoaigaina ai le matou uarota ma le nuu.
Ata pue mai faaaloaloga a le tusitala
I ni nai tausaga ua mavae atu, sa faamanuiaina i ma’ua e fesoasoani e auauna atu ma faasoa atu le talalelei i le toatele o tagata sulufai Aferika o loo nonofo i Spokane, Uosigitone, ISA. A o le’i o mai i le Iunaite Setete, o le toatele o i latou na vaai i tulaga matautia o taua, matelāina, ma aiga na vavaeese faamalosi mai le tasi ma le isi i o latou atunuu o Rwanda, Kenya, Uganda, Tanzania, ma le Ripapelika Temokarasi o Congo.
Ua tatou iloa e lē o uarota uma i le lalolagi atoa e i ai tagata sulufai i o latou eria, ae o uarota ma paranesi uma e i ai tagata mai siosiomaga eseese, ma o loo tatou taumafai uma lava e faapotopoto Isaraelu ma fausia Siona i le mea o tatou nonofo ai. Ma te fia faamatala atu pe faape’i le “alofa, faasoa atu, valaaulia”1 mo ma’ua a o ma faasoa atu nisi o aafiaga na ma maua i nai tausaga ua mavae. Ma te talitonu o nei mataupu faavae e mafai ona faatatau i uarota i le lalolagi atoa.
Auauna atu
E pei o Amona ma isi atalii o Mosaea i la latou misiona i sa Lamanā, sa tatou mananao i la tatou auaunaga e afua mai i se uunaiga e fesoasoani i isi ia lagona le alofa o Keriso mo i latou (tagai i le Mosaea 28:1–3; Alema 26:15). E pei ona saunoa mai Elder Jeffery R. Holland o le Korama a Aposetolo e Toasefululua i se tasi taimi: “Ua tali mai tatalo … o le tele o taimi … e ala i le faaaogaina e le Atua o isi tagata. Ia, ou te tatalo o le a Ia faaaogaina i tatou. Ou te tatalo ia avea i tatou ma tali i tatalo a tagata.”2
Na taunuu mai Nyafuraha Mukushaka i Spokane ia Iuni 2019 mai Burundi. E lei umi ae amata ona faigaluega o ia i se falegaosi tioata i le 6:00 i le taeao i aso taitasi. O le faasologa o taimi o pasi i le taeao sa lei mafai ai e ia ona oo atu i le galuega i le taimi amata. Mo le fa masina a o sauni o ia ia maua se laisene avetaavale, e feala i luga tagata o le au paia i le 4:40 am i taeao taitasi, malaga atu i lona fale, ona ave lea o ia i le galuega. Sa ia faasoa atu lenei aafiaga i ona mātua ma lona tuagane, o e na taunuu i Spokane ia Aokuso 2021. Sa amata ona fiafia lona tamā, o Vincent, i le talalelei toefuataiina ina ua ia saili po o ai o le a naunau e tuuina atu lea auaunaga i lona afafine. Na auai Vincent i le Ekalesia ia Novema 2021.
Na taunuu mai Kayitesi Muhorakeye ma lana tama teine, o Divin, mai le Ripapelika Temokarasi o Congo e ala i Rwanda, i Spokane ia Ianuari 2021 e saili se galuega ma se fale ina ia mafai ai e lo latou aiga o se fanau e toafitu ona siitia mai Texas. Sa fesoasoani tagata o le Ekalesia ia i latou e saili ma siitia atu i se fale. E to’afa tagata o le aiga ua auai i le Ekalesia talu mai lena taimi.
O auala e alolofa ma fesoasoani ai i o tatou uso ma tuafafine e o mai mai Aferika e matuā eseese lava ma e mafai ona fetaui i le faatulagaga o taimi a soo se tasi e naunau e aapa atu. Sa manaomia e a matou uo le fesoasoani i le aoaoina o le Igilisi, agai i le faleoloa, lesitalaina o tamaiti mo le aoga, aoaoina e ave se taavale, tatalaina o se teugatupe i le faletupe, aoao i le kukaina o meaai faa-Amerika, ma isi mea. Sa ma sailia ma le malosi ni avanoa nai lo le faatalitali mo se tasi e fesili atu mo se fesoasoani po o se faatalitali seia oo ina faigofie ona fesoasoani atu.
Uso Huber ma Henry Rashidi a o lei papatisoina Henry. Sa lelei le galulue faatasi o tagata o le uarota ma faifeautalai i le aoaoina atu ma le faaaumeaina.
Galuega Faafaifeautalai i le tulaga faale-Tagata Patino ma i Luga o le Initoneti
A o amata ona o mai nei tagata sulufai e tautatala faa-Swahili i le lotu, sa ma manaomia ni faifeautalai e mafai ona tautatala i le gagana Swahili ma le Igilisi. Sa amata ona aoaoina e faifeautalai i le uarota le Swahili, ae i le leai ai o ni tagata e tautatala i lea gagana o se gagana muamua, sa telegese le aoaoina. Ia Mati 2019, na o atu ai taitai misiona o le Misiona a Uosigitone Spokane e piki mai ni faifeautali fou mai le malaevaalele. Ina ua faafeiloai e le peresitene o le misiona ma lona faletua ia Elder Noel Cohen, sa la faapea mai o ana pepa misiona na ta’ua ai e na te iloa tautala faa-Swahili. Sa la fesili atu, “o le a le lelei o lau tautala faa-Swahili, Elder?”.
Sa tali atu Elder Cohen o le faa-Swahili o lana gagana moni. Sa ia malaga atu i le Iunaite Setete mai Kenya i le tausaga na muamua atu. Ona faaaluina lea e Elder Cohen lana misiona atoa i le matou uarota, ma o ia ma ana soa faamaoni e toatele sa galulue ma le lē faavaivai e alolofa ma valaaulia le toatele o nei tagata sulufai lelei ma tagata malaga mai e aoao e uiga i le talalelei toefuataiina. I le faafetai ai mo le fesoasoani a tagata o le uarota, na faapea mai ai Elder Cohen, “Sa matou faia le tele o aoaoga, ae o tagata o le aupaia sa faia le tele o le faaaumeaina.” (Aoao atili e uiga i aafiaga o Elder Cohen i le itulau 25.)
Sa ma aoaoina e sili atu le silafia e le Alii nai lo i maua i le ala e faapotopotoina ai Ana fanau. Pe a tatou agai i luma ma galulue ma le faatuatua lotogatasi, o le a musuia ma taialaina i tatou e le Agaga Paia, e tele lava i auala e ese mai mea sa tatou faamoemoeina.
Ina ua oo mai le KOVITI-19 i le tautotogo o le 2020, sa tatou popole uma i le auala e faaauau ai le galuega. O le au sulufai Aferika o ni tagata e matuai lelei i agafesootai ma agaga mafanafana, lea sa faigata ai ia i latou le tuuaesea. Ua leai faatasiga a vaega toatele i fale o tagata o le ekalesia ma uo Aferika. Ia Me 2020, sa matou faia ai se anapogi faaleuarota ma tatalo ina ia faamanuia e le Tama Faalelagi olaga o a matou uo Aferika i le faaletino ma le faaleagaga ma fesoasoani ia i latou ia o mai ia Keriso.
E pei ona masani ai i le Ekalesia atoa, sa amata ona aoao atu a tatou faifeautalai i luga o le initoneti. Sa latou amataina se itulau Facebook e uiga i le Ekalesia i le gagana Swahili.
Na faapea mai lo matou taitai misiona a le uarota i lena taimi, o Brian McCann, “A o matou anapopogi mo le Alii e fesoasoani i le galuega faafaifeautalai a Swahili, i o matou mafaufau sa matou manatu ai o le uiga o le galuega faafaifeautalai faaSwahili i Spokane. Ae na faaali moni mai e le Alii ia i matou le faaaogaina o tekinolosi i le taimi o le KOVITI-19, ma na faafuasei lava ona faailoa mai e faifeautalai, ‘O loo matou aoaoina lenei tagata i Nouei ma lenei tagata i Uganda ma lenei tagata i Kenya.’”
O Sifa, o se tagata sulufai Aferika e nofo i Nouei, na mauaina le itulau Facebook ma amata ona faia lesona i le taeao po lava, i le taimi o Spokane. Sa faafesootai e Sifa ana faifeautalai i le lotoifale, ma faatasi ai ma le fesoasoani a faifeautalai i Spokane, sa ia aoao ai e uiga i le talalelei toefuataiina. Sa papatisoina o ia ma lana tama tama i Nouei ia Tesema 2020. Sa iloa e Sifa tagata i Uganda mai lona taimi o se tagata sulufai iina, ma e lei umi ae matou aoaoina tagata e 20 i se nofoaga o tagata sulufai i Uganda.
Faauoga ma le Faafeiloaia o Isi
O se tasi o o matou taitai misiona talu ai o le uarota na sau ma se faaupuga lea na totoina i loto o tagata o le uarota: “O i matou o tagata sili ona faauo i le Ekalesia.”
I le 2019 sa matou faia ai se po o se aganuu Aferika e aoao atili ai e uiga i a matou uo Aferika ma mea latou te fiafia i ai. Fai mai Kimberly McCann, “Sa i ai ni a matou moa falai, ma sa latou aumaia ni meaai e atagia ai la latou aganuu. Sa latou faia ni pesepesega ma siva, ma sa matuai fiafia lava.”
Fai mai Brian McCann: “Ou te manatu soo se tasi na faaaluina soo se taimi faatasi ma a tatou uo Aferika e iloa lo latou matagofie ma le agalelei. Ma e te fia i ai i lena mea. O le a tatou lē maua le tele o masina ma tausaga o faauoga ma le faaaumeaina ma le mafutaga pe afai tatou te faatalitali seia oo ina papatisoina i latou. Tatou te fia avea ma se vaega o o latou olaga i le taimi nei. E tele naua mea latou te aoao ai i tatou e uiga i uiga faa-Keriso.”
Atonu o le mea sili lava, e manaomia ona lagona e tagata ua latou maua ni aiga iinei i la tatou aulotu o le Au Paia. Sa amata ona aoao e nisi o tagata o le uarota le faa-Swahili ina ia fesootai lelei ai ma mafai ona fesootai atu ia tatou uo Aferika. Sa amata ona tatala e tagata o le uarota ma a matou uo Aferika o latou fale i le tasi ma le isi. Sa tāua tele lenei mea i le toatele o tagata sulufai o e na vavaeese mai o latou aiga pe na maliliu tagata o le aiga i le taua.
Mo se faataitaiga, na maliliu uma mātua o Nshimiyana Adolphe i sauaga i le Ripapelika Temokarasi o Congo ma sa mātuaoti i le ono o ona tausaga. Sa taunuu o ia o se tagata sulufai i Spokane i le 20 tausaga mulimuli ane ia Aokuso 2021. A o faamanatuina le Kerisimasi o se tagata fou liliu mai i se fale o se tagata o le ekalesia, sa ia fai mai, “O le taimi muamua lenei i lo’u olaga ua ou lagonaina ai lo’u avea ma vaega o se aiga.”
O Moses Lwakihugo, mai le Ripapelika Temokarasi o Congo, na maliu lona tamā i le taua i le 1997. Sa nofo Mose i tolauapiga a tagata sulufai mo le silia ma le 10 tausaga. I le taimi nei o se taitai perisitua i le vaega a Swahili i le matou uarota, sa ia fai mai, “Sa ou mātauina se mea ese e uiga i tagata o le Ekalesia. Latou te ola moni lava i mea latou te aoao atu. I isi lotu sa avea ai au ma se vaega, e leai se tasi na sau e asiasi mai ia te au. I le uarota lenei, sa siaki mai tagata ma aumai ni meaai ina ua mama’i lo’u aiga. Ou te lei vaai lava i se ekalesia ua sili ona tumu i le alofa.”
A o aoao Mose e uiga i le talalelei toefuataiina, sa ia valaau atu i lona uso faaletulafono, o Maroyi, e ta’u atu ia te ia e uiga i le Ekalesia. Na fai mai Maroyi, o le e nofo i se nofoaga o tagata sulufai i Burundi, “Matou te manaomia lenei ekalesia i Burundi.” E lei umi ae amata ona aoao atu e Mose lona tuafafine ma lona uso faaletulafono e ala i le telefoni, faatasi ma faifeautalai. Sa papatisoina le tuafafine ma le uso faaletulafono o Mose, faatasi ai ma isi e toavalu i Burundi, i le aso lava lea na papatiso ai Mose i Spokane. Ua matuā tupu ma toatele lava le vaega i Burundi ua latou manaomia ai se isi fale e taulima ai tagata uma e o mai i Aso Sa uma.
O le aao o le Alii e taialaina lenei galuega, ma o le aafiaga o Vumilia Tambwe ua faapupula mai ai lena mea. Sa i ai o ia i le fale ia Setema 2016 ina ua tuitui atu ni faifeautalai tamaitai se toalua i lona faitotoa. Na malaga atu Vumilia i le Iunaite Setete i le lima tausaga na muamua atu mai le Ripapelika Temokarasi o Congo e ala atu i Kenya. Sa faatasi atu o ia ma le agalelei i tamaitai faifeau ae sa lē gauai atu o ia i le la sāvali.
Mulimuli ane i lena afiafi, sa o atu ai tamaitai faifeau i le fale o se aiga o le au paia mo le taumafataga o le afiafi o e e lei leva ona avea ma se aiga talimalo mo tagata sulufai. Ona o le eseese o le gagana, sa lē mafai ai e le aiga sulufai ma le aiga talimalo ona fesootai le tasi ma le isi. Sa pata uma tino o tagata o le aiga sulufai, ma sa lē iloa e le aiga talimalo le auala e fesoasoani ai ia i latou. Ina ua latou ta’u atu i tamaitai faifeautalai e uiga i le faafitauli, sa ta’u atu e tamaitai faifeautalai i le aiga o le ekalesia e faapea sa faato’ā la feiloai atu lava i se tamaitai e igoa ia Vumilia e tautatala faa-Swahili ma le Igilisi. Sa toe foi atu faifeautalai ina ia maua mai se fesoasoani mo ia. Sa iloa e Vumilia o pata mageso na mafua ona o le faaaogaina sese e le aiga o le kulimi seleava e uu ai le tino.
Sa avea le aiga talimalo ma Vumilia ma ni uo lelei, ma sa latou faia se patī mo le avea ai o Vumilia ma se tagatānuu ia Ianuari 2017. Sa amata e Vumilia lana malaga agai atu i le avea ma se tagata O Le Ekalesia a Iesu Keriso o le Au Paia o Aso e Gata Ai ona o le faauoga moni sa ia oo i ai mai tagata o le Ekalesia.
O se isi faataitaiga o le aao o le Alii i lenei galuega na tupu a o lei oo i le Aso Faafetai i le 2018. Sa lagona e Diann Ross le uunaiga e alu i le faleoloa. A o i ai iina, sa ia mātauina se aiga Aferika o loo tauivi ma le masini ATM. O aiga o Rusimuka ma Lwakihugo na malaga mai talu ai nei mai se tolauapiga a tagata sulufai i Burundi. Sa fesoasoani Sister Ross i aiga i a latou faatauga ma valaaulia i latou i le taumafataga o le afiafi o le Aso Faafetai. Sa vave ona avea le au Rosses, le au Lwakihugos, ma le au Rusimuka ma ni uo mamae.
Tapuai Faatasi
A o toe amata sauniga a le Ekalesia i le taimi o le faamaʻi KOVITI-19, o le tulafono a le Setete o Uosigitone na faatagaina nao le 25 pasene o fale e mafai ona faapotopoto ai. O lona uiga o le a faia muamua e le matou uarota ni sauniga faamanatuga se fa e taulimaina ai tagata uma. Sa tonu ia i ma’ua e faia se tasi o nei sauniga faamanatuga e fa i le faa-Swahili.
Ia Setema 2020, sa valaauina ai i maua ma isi ulugalii e auauna atu o ni faifeautalai o auaunaga e galulue faatasi ma tagata sulufai Aferika e tautatala i le gagana Swahili i Spokane. O la matou misiona o le faafaileleina lea o se lagona o le alofa, taliaina, ma le faauo atu i tagata sulufai Aferika ma fesoasoani i nei uo e aumai ma faatasia i lo matou nuu.
Ia Ianuari 2021, sa faatulaga aloaia ai e taitai o le siteki se vaega o Swahili faatasi ma ni tagata se toatolu ua papatisoina ma le toatele o isi na auai. O le sauniga faamanatuga e faaliliuina i le gagana Peretania ma le Swahili, ma e matou te faatasi i vasega a le autalavou ma le Peraimeri i le uarota o loo matou auai ai. O nei uso ma tuafafine uma, pe ō mai mai se tolauapiga a tagata sulufai po o se vaega ese o Aferika, e i ai ni tala anoa ma tāua e faasoa atu. Ua saunia e sauniga faamanatuga se avanoa tāua e faalogo ai e uiga i le auala na fesoasoani ai le faatuatua i a matou uo Aferika e faatoilalo faigata maoae. O a matou uo mai Aferika e o mai ma se talatuu faa’oaina, ma o lo latou fiafia i musika ma pesepesega ua avea ma se vaega faatamaoaigaina o le sauniga faamanatuga.
Ua matou vaaia ni faataitaiga ofoofogia o le lototele ma le malosi i le feagai ai ma faigata. Ua matou vaaia le faamagaloga, alofa, ma le alofa tunoa ma ua maofa pea i faataitaiga o lo latou faatuatua ia Iesu Keriso. O le toatele o tagata sulufai na o mai mai Aferika sa faalagolago i le faatuatua e faatoilalo ai tofotofoga. A o matou taumafai e aoao la latou gagana ma fesoasoani ia i latou e faatautaia le olaga i se atunuu fou, ua fausia se faauooga moni lava.
Atonu o le lesona aupito sili e mafai ona tatou aoaoina uma o le lautele lea o le aiga. O le avea moni lava ma uso ma tuafafine o lona uiga o tagata e o mai i la matou uarota o le a lē avea i latou lava o ni “tagata ese, po o ē ua aumau, a ua nuu faatasi ma le au paia, o le aiga foi o le Atua” (Efeso 2:19).