Na o le Faatekinolosi: Talavou Matutua
O Lesona e uiga i le Fiafia mai le Au Paia i Tusitusiga Paia
O loo tatou saili uma atu mo le fiafia, ma o faataitaiga a le Au Paia i tusitusiga paia e mafai ona faasino atu ai i tatou i le itu sa’o.
Ata pu’e mai Pexels
O le lalolagi o se nofoaga faanoanoa i nisi o taimi. I se tulaga patino ma le lautele, e i ai le faanoanoa, lē fea, ma le mafatia. I se tasi taimi po o se isi itu, tatou te iloa uma ai o loo tatou “malaga e ala atu i se vanu o loimata.”1
Ae peitai ua aoaoina foi tatou e faapea, “ua i ai tagata, ina ia latou maua le olioli” (2 Nephi 2:25).
E mafai faapefea ona moni lenei mea?
I tusitusiga paia, na saili tagata mai tisipenisione uma e faatu Siona ma maua le fiafia o loo manumalo ai iina. Ma o nisi o i latou ua matua’i faamanuiaina lava! A o tatou faitau e uiga i na Au Paia, tatou te aoao ai i le mea e maua ai le olioli tele e oo lava i le lotolotoi o tofotofoga tetele.
O Le Nuu o Alema: Tausia o Feagaiga
I lo latou faamoemoe faalilolilo i talaane o vai o Mamona, sa “pati o latou lima i le olioli” (Mosaea 18:11) ina ua latou aoaoina e mafai ona latou ulu atu i le “lafu a le Atua” (Mosaea 18:8) e ala i le feagaiga o le papatisoga. Sa latou mauaina foi le Agaga Paia (Mosaea 18:13), lea, e tusa ai ma le saunoaga a Peresitene James E. Faust (1920–2007), o “le faamautuuga aupito silisili o le filemu i totonu i lo tatou lalolagi lē mautu.”2
Sa galulue malosi le nuu o Alema e faatumauina le Agaga ia i latou a o latou “savavali sa’o i luma o le Atua” (Mosaea 18:29). Ma o le tausia o a latou feagaiga na faamaonia ai le tāua tele i lo latou fiafia—ina ua oo i latou lava i le pologa, sa laveaiina i latou e le Alii ona sa latou tausia a latou feagaiga: “Ina ea ia o outou ulu … ona ua Ou iloa le feagaiga na outou faia mai ia te au; ma o le a Ou osifeagaiga ma o’u tagata ma laveai i latou mai le pologa” (Mosaea 24:13).
Sa malamalama lelei tagata o Alema i le mea na aoao mai talu ai nei e Sister Jean B. Bingham, o lē sa avea ma Peresitene Aoao o le Aualofa: “E gaogao ’i’i le fiafia pe afai tatou te faafesuia’ia faamanuiaga o le olioli e faavavau ia faigofie mo na o sina taimi. … O le ki i le fiafia tumau o le ola lea i le talalelei a Iesu Keriso ma le tausia o a tatou feagaiga.”3
O Sa Nifae o le 4 Nifae: Aveeseina o Faailoga
Ina ua mavae se asiasiga mai le Faaola toetu, sa faaaluina e sa Nifaē le toeitiiti lua selau tausaga e nonofo faatasi ai i le fealofani. “Ma e moni e lē mafai ona i ai o ni tagata e sili atu ona fiafia i totonu o tagata uma na foafoa e le aao o le Atua” (4 Nifae 1:16).
O se tasi o a latou auala mo le fiafia o le faavaeina lea o le tutusa:
“Sa leai se mauoa ma se matitiva, pologa ma se saoloto …
“Sa leai ni sa Lamanā, po o soo se ituaiga o tagata” (4 Nifae 1:3, 17).
E foliga mai e faigofie, ae o le faavaeina o lenei lē faatuaoia e tatau ona sa faia ai se galuega, talu mai le taimi a o lumanai ai le asiasiga a le Faaola, “sa fevaevaeai le nuu, o le tasi e faasaga i le isi” (3 Nifae 7:2).
E masani ona faamalosia e le lalolagi ia ta’u faailoga e vavae ai. E pei ona ta’u atu talu ai nei e Peresitene Russell M. Nelson i le autalavou matutua, “E olioli le fili i faailoga ona ua latou vaevaeina i tatou ma faatapulaa ai le ala tatou te mafaufau ai ia i tatou lava ma le tasi ma le isi.”4 O pulega ua tatou fatuina e ala i faailoga e lē mai le Atua—“Ua ia valaauina i latou uma … ia o mai ia te ia ma taumamafa i lona agalelei” (2 Nifae 26:33).
A o faia e sa Nifae le tutusa i totonu o i latou lava, “sa faamanuiaina tele i latou e le Alii i le laueleele” (4 Nifae 1:7).
O Le Aai o Enoka: Tuufaatasia i le Alofa
O le aai o Enoka ua na o le pau lea o le faataitaiga i tusitusiga paia o se nuu atoa ua “aveina a’e i le lagi” (Mose 7:23). Afai o le lagi o le “mau faatasi ma le Atua i se tulaga o le fiafia e lē gata” (Mosaea 2:41), o le aai o Enoka o le faataitaiga sili lea mo i tatou e mulimuli ai!
Na faapefea la ona Iatou faia?
Sa “tasi o latou loto ma tasi le mafaufau” (Mose 7:18)—sa fusia faatasi i le sailiga o le mamalu e faavavau. O le galulue faatasi e pei o lena e manaomia ai le alofa mama o Keriso auā e aofia ai le faamoemoe ma le galue mo le faaeaga o isi tagata—i le iuga o le lē manatu faapito!
Atonu na aoaoina e le aai o Enoka mai ia Enoka le ala e alofa ai i fanau a le Atua i lenei ala. Ina ua faaalia “mea uma ua faia e le fanauga a tagata,” o Enoka “sa vaai atu i lo latou amioleaga … ma ua tagi … ma sa malena lautele lona loto e pei o le faavavau” (Mose 7:41).
Pe a tatou lagonaina le alofa faa-Keriso mo isi, tatou te uunaia i latou e auai faatasi ma i tatou i luga o le ala i le faaeaga e ala i le mulimuli ia Iesu Keriso. E pei ona saunoa Bonnie H. Cordon, le Peresitene Aoao o Tamaitai Talavou: “Sau ia Keriso. O mai nei, ae aua le sau na o oe!”9
Ola ai i le Fuafuaga o le Fiafia
E tusa lava pe o le faanoanoa e fusia ai lou fiafia, e mafai ona susulu mai se upumoni se tasi: e manao lo tatou Foafoa i lo tatou fiafia e faavavau—O Lana fuafuaga o le fuafuaga o le fiafia! Ua tatou i ai ina ia fiafia e lē mafuatia, e pei lava o Ia.
Ae o le upu autu o le avea ai. Tatou te lē o taumafai e tau lava ina lagona le fiafia. O loo tatou taumafai e avea ma tagata fiafia.
Mai le Au Paia i tusitusiga paia, ua tatou aoao ai o le fiafia o se sini e mafai ona faatinoina ma o le aitema o faatinoga autu o le faatinoina lea o le faatuatua i le Atua ma Iesu Keriso. A o tatou faitau i tusitusiga paia, o le faatuatua lea e taitai atu ai i le usiusitai i poloaiga a le Atua. O le faatuatua foi e taitai atu ai i le salamo ma le faamagaloga o a tatou agasala e ala i le Togiola a Iesu Keriso, lea na fesoasoani i nei Au Paia ia maua se fuataga o le fiafia lea e olioli ai le Tama Faalelagi ma Iesu Keriso—le fiafia ua tatou mafaia uma.