“Seevae e Lei Nonoaina ma le Alofa o le Faaola,” Liahona, Fep. 2023.
O Leo o le Au Paia o Aso e Gata Ai
Seevae e Lei Nonoaina ma le Alofa o le Faaola
A o ou tootuli ma le lē onosai e nonoa se isi foi o pea seevae, sa aoao mai e le Alii ia te au se lesona faamaualalo e uiga i Lona alofa mo i tatou.
Mo ni nai tausaga, sa ou galue o se faiaoga faapitoa mo aoaoga mo tamaiti i le va o le lima ma le valu tausaga. O a’u tamaiti aoga e tauivi ma le tele o manaoga faapitoa—mai manuaga matautia o le faiai ma le faaletonu o le mafaufau i le aoaoina o manaoga faapitoa.
O le toatele o a’u tamaiti aoga e leai ni tomai o le galueaiina e i latou lava ma ua lē mafai ona nonoa o latou lava seevae. Ou te viia mātua o e faatau seevae mo a latou fanau i seevae e iai fusi Velcro, ae ou te tomumu e uiga i mātua o e faatau seevae fainonoa mo a latou fanau.
Ata na saunia e Enya Todd; ata pue mai faaaloaloga a le tusitala
O le ia i o seevae ua nonoaina lelei o se faafitauli o le saogalemu mo tamaiti. O lea la, i le tele o taimi i aso taitasi, e mafai ona maua atu o ou tootuli ai ma nonoa seevae o a’u tamaiti aoga laiti. I le taimi o le aso aoga, e alu ai le taimi ma e lē talafeagai.
Talu ai nei, a o ou tootuli ma le lē onosai i luga o le malae taalo e nonoa se isi foi o pea seevae, sa oo mai se manatu matagofie i lo’u mafaufau. Sa ou vaai faalemafaufau i le Faaola o tootutuli i tafatafa o Ona soo e ofo atu se auaunaga agalelei e ala i le tausia o ō latou vae. Ona oo mai ai lea o upu a le Faaola i lo’u mafaufau: “E moni, ou te fai atu ia te outou, auā na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:40).
Sa ou lagonaina le alofa o le Faaola mo le tamaitiiti lea sa ou tootuli ai i tafatafa e auauna atu i ai. Na faafuasei lava ona ou lagonaina le alofa o le Alii mo a’u. Sa ou lagonaina le vaaia ma le talisapaia e Ia o itula ou te faaaluina ma le lē faavaivai i vaiaso taitasi e taumafai ai e auauna atu i Ana fanau laiti ma sili ona vaivai.
O lenei aafiaga matagofie na ou maua ai le filemu, malosi, ma le faamautinoaga o loo o’u i ai i le mea e tatau ona ou i ai, i le faia o le mea e tatau ona ou faia. Ou te faafetai mo le Alii ma Lona alofa mutimutivale agamalu i lo’u olaga. Ma o lenei ou te faafetai mo avanoa i aso taitasi e tootuli ai ma nonoa seevae.