Saunia mo Lau Faatalanoaga ma le Alii

Saunia e John A. Neubauer

O faatalanoaga faaperisitua ua tatou maua i le asō e mafai ona fesoasoani ia i tatou e saunia ai mo le faatalanoaga o le a tatou faia i se aso ma le Alii.

E lei leva ona uma ona ou papatiso o se tagata liliu mai, ae valaauina au e avea ma se fesoasoani i le au peresitene o le korama a toeaina. I la’u fonotaga muamua ma le peresitene o le matou korama, na ia saunoa ai i le vaiaso a sau o le a matou faatulagaina ai ni faatalanoaga.

Ina ua ou fesili po o ai o le a matou faatalanoaina ma po o le a le faamoemoega o faatalanoaga, sa ia fai mai, “O a tatou faatalanoaga o le a aofia ai nisi o fesili masani, ma o le a tatou talanoa e uiga i manaoga o le korama ma manaoga faaleaiga. Ae ou te fia mafaufau o le faamoemoega o a tatou faatalanoaga o le fesoasoani lea i uso o la tatou korama ia saunia mo le faatalanoaga o le a latou faia i se aso ma le Alii.”

O se malamalamaaga faaleagaga ou te manatua pea, e ui lava ina sa ou faalogo i ai i le 23 tausaga ua mavae.

O Le Auala Tatou Te Auauna Atu Ai e Taulia

I totonu o le ono masina, na suia ai tuaoi o la matou siteki ma uarota. Sa valaauina au e avea ma peresitene o le korama a toeaina mo le matou uarota fou, e ui ina sa faatulagaina ou te alu ese mai le setete i totonu o le tolu masina. Ina ua vaetofia au e le peresitene o le siteki, sa ia fai mai, “Uso Neubauer, e lē popole le Alii po o le a le umi tatou te auauna atu ai; E popole o Ia i le auala tatou te auauna atu ai.” O lea la, i le taimi na ou mauaina, sa ou faatalanoaina ai le toatele o uso o le korama i le mea e mafai ai.

Mulimuli ane, ina ua 70 o’u tausaga, sa toe valaauina a’u e avea ma peresitene o le korama a toeaina. Na tupu lenei mea ina ua faatoā uma ona fofogaina mai e le Au Peresitene Sili ma le Korama a Aposetolo e Toasefululua e faapea, o uarota po o paranesi taitasi, o le a tuufaatasia ai faitaulaga sili ma toeaina i se korama e tasi. Sa ou toe mafaufau i lena malamalamaaga na faasoa mai e lo’u peresitene muamua o le korama a toeaina ia te au i le tele o tausaga ua mavae: “O le faamoemoega o a tatou faatalanoaga o le fesoasoani lea i uso o la matou korama ia saunia mo le faatalanoaga o le a latou faia i se aso ma le Alii.”

E faapefea la ona fesoasoani se taitai i se uso o le korama e saunia mo se faatalanoaga ma le Alii? I faatalanoaga o auaunaga ma i talanoaga a korama, ua ou fesili atu ai i uso o le korama: “Afai e te iloaina o le ono masina o le a e tu ai i le afioaga o le Alii, o le a se mea o le a e suia i lou olaga e sauniuni ai mo lena taimi?” E tele lava ina ou faatagaina tagata e mafaufau e uiga i le tali. Ae o nisi taimi e faasoa mai ai e se tasi ni malamalamaaga patino e uiga i o latou lagona i lena taimi ma le Alii.

O A Mauga e Manaomia ona Sii Ese?

Sa ou faasoa atu foi i uso o le korama nei saunoaga mai ia Peresitene Russell M. Nelson: “E faaaoga e le Alii mea e lē mafai e ausia ai mea faigata.”¹ “Faatasi ma le faatuatua ia te Ia, e mafai ai ona tatou aveesea mauga i o tatou olaga.”² Ona ou fai atu lea o se isi fesili: “O le a se mea atonu o le a e faia pe a toe afio mai le Alii?” Na ou fai atu ia i latou e mafaufau loloto po o a mauga i o latou olaga e manaomia ona aveese ina ia mafai ai ona latou faia mea latou te mananao e fai pe a toe afio mai le Alii, mea e manaomia ona latou faia e saunia ai e talanoa faafesagai ma Ia.

Ua ta’u mai e tusitusiga paia ia i tatou e i ai se aso o le a tatou tutu ai i luma o le Alii ina ia faamasinoina: “Ma o le a oo mai a mavae ona solo atu o tagata uma mai lenei oti muamua i le ola, ona ua avea i latou ma tagata tino ola pea, e ao ina latou o atu i luma o le nofoa-faamasino o le Paia e Toatasi o Isaraelu; ma ona oo mai ai lea o le faamasinoga, ma ona faamasino ai lea o i latou e tusa ma le faamasinoga paia a le Atua” (2 Nifae 9:15).

Ou te tatalo e ala i le mafaufau mamao e uiga i mea tatou te mananao e tautatala atu ai ma i ai i lena aso tele, o le a mafai ai e i tatou taitoatasi ona fesiitai soo se mauga e manaomia ona aveesea ina ia mafai ai ona tatou saunia mo la tatou faatalanoaga ma le Alii.

E alala le tusitala i Iuta, ISA.