E Na’o le Faatekinolosi
O Le Poloaiga Muamua e Muamua
Ua poloaiina i tatou e le Atua ia alolofa ia te Ia ona o mea Ua Ia silafia o le a faia mo i tatou.
O Evagelia taitasi e tolu e uiga tutusa—Mataio, Mareko, ma Luka—o loo toe faamatala mai ai se fesili na tuu atu ia Iesu e uiga i le poloaiga aupito silisili i le tulafono. I le Mataio, o le fai fesili o se loia o le faamoemoega lē mamā, e faaosoosoina le Matai (tagai i leMataio 22:35–36). I le Mareko, o se tusiupu o loo faia le fesili, ae o se tasi e foliga mai e manao ma le faamaoni ia iloa (tagai i leMareko 12:28–34). I le Luka, ua tatou toe foi atu ai i tua i le “ua tula’i le tasi a’oa’o tulafono, ma tofotofo ia te ia” (Luka 10:25).
E ui lava i lo’u talaaga faalegaluega i le tulafono, e faigata ia te a’u ona puipuia le loia i lenei tala. Ae o le a ou tuuina atu ia te ia se togi mo le fesili, e ui lava i lona faamoemoega, auā o le tali a le Faaola e ese le matagofie ma le loloto. E tatau ona ou faafetai foi ia te ia mo lana fesili tulitatao—“O ai fo’i le tagata ma te tuaoi?” (Luka 10:29)—lea na oo atu ai i le faataoto faagaeetia a le Faaola i le Samaria agalelei (tagai i leLuka 10:30–37). Sa tele atu mea na maua e le loia nai lo le mea sa ia manao ai, ae sa matou maua se mea e lē mafaatauina.
O le tala a Mataio i le tali a Iesu ua masani ai outou uma:
“Le Aoao e, o le fea poloaiga o i le tulafono ua sili?
“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe.
“O nā poloaiga e lua ua autu ai le tulafono uma ma le au perofeta” (Mataio 22:36–40
O le alofa i le Atua ma le loto atoa, agaga, ma le mafaufau atoa, ua faaopoopo atu i ai e Mareko ma Luka le “ma lou malosi atoa” (Mareko 12:30; Luka 10:27).
Ou te talosaga atu ia te outou ia mafaufau i le mamalu o poloaiga sili e lua lea e “autu ai le tulafono uma ma perofeta” ma pe aisea foi e muamua ai le poloaiga muamua. O le a le tāua o lena faatulagaga mo i tatou?
O le poloaiga lona lua o se taiala maoa’e mo fegalegaleaiga faaletagata. Mafaufau pe faape’ī le lalolagi pe ana faapea e taliaina ma mulimulita’ia lautele le poloaiga lona lua. Mafaufau i le mea o le a le tupu. Faatasi ai ma isi mea, o le a leai se solitulafono matuia, leai se sauaga faatautala, leai se taufaasese, leai ni sauaga po o se faamata’u, leai se faitatala, ma e mautinoa lava e leai ni taua. O le poloaiga lona lua o le Tulafono Faaauro: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou: aua o le tulafono lea ma le au perofeta” (Mataio 7:12; tagai foi Luka 6:31; 3 Nifae 14:12). I le avea ai ma soo, e tatau ona tatou fuafua e ola i lenei poloaiga lona lua e ala i le aapa atu i le alofa ma le agaalofa ia i latou ua faauigaina e le Alii o ō tatou tuaoi—o lona uiga, o tagata uma lava.
Ina ia lagolagoina “le tulafono lea ma le au perofeta”—o lena tino o le upumoni ma poloaiga na faavaeina e le Atua ma aoaoina e perofeta—e manaomia uma poloaiga muamua ma le lona lua, e galulue soosoo tauau. Ae aisea ua avea ai le poloaiga muamua ma faamuamua sili? E lē itiiti ifo ma le tolu ni mafuaaga e oo mai i le mafaufau.
Muamua o le natura faavae o lenei poloaiga muamua. O le matagofie ma le tāua e pei o le poloaiga lona lua o le, e lē o tuuina mai ai le faavae e tatau ai mo ō tatou olaga, pe o faamoemoe foi i ai. O le usitaia o le poloaiga lona lua ua avea ai i tatou ma tagata lelei, ae o le a le iuga? O le a le uiga o lo tatou ola ai? Mo le faamoemoega, taitaiga, ma le uiga, e tatau ona tatou vaavaai atu i le poloaiga muamua ma le sili.
O le faamuamua o le poloaiga muamua e lē faaitiitia ai pe faatapulaaina ai lo tatou gafatia e tausia le poloaiga lona lua. I se isi itu, e faateleina ma faamalosia ai. O lona uiga tatou te faalauteleina lo tatou alofa e ala i le taula i le faamoemoega paia ma le mana. O lona uiga ua ia i tatou le Agaga Paia e musuia i tatou i auala e aapa atu ai lea e semanū tatou te lē vaaia e i tatou lava. O lo tatou alolofa i le Atua e siitia ai lo tatou tomai e alolofa atoatoa ai i isi ma le atoatoa auā tatou te faipaaga i le aano moni ma le Atua i le tausiga o Ana fanau.
Lona lua, o le lē amanaiaina o le poloaiga muamua, po o le toe suia o le faatulagaga o poloaiga muamua ma le lona lua, e lamatia ai le leai o se paleni i le olaga ma mea faataumaoi mai le ala o le fiafia ma le upumoni. O le alofa i le Atua ma le gauai atu ia te Ia e saunia ai se iloiloga e faasaga i lo tatou faananau atu e faapiopio amioga mama e ala i le uunaia o i latou i mea matautia. O le agaalofa mo le mafatia o ō tatou tuaoi, mo se faataitaiga, e tusa lava pe oo mai mafatiaga ona o lana lava solitulafono, e tamalii ma lelei. Ae o se agaalofa e lē puleaina e mafai ona taitai atu ai i tatou, e pei o le atalii o Alema o Korianetona, e fesiligia le faamasinotonu o le Atua ma le malamalama i Lona alofa mutimutivale (tagaiAlema 42:1).
E i ai i latou, mo se faataitaiga, o e talitonu o le alofa atu i isi o lona uiga e tatau ona tatou feliuai pe lē amanaiaina tulafono a le Atua i se ala po o ni auala e fautuaina pe talia ai le agasala. Sa saunoa elder Jeffrey R. Holland i lenei manatu sesē ina ua ia aoao mai:
“Afai la o le alofa o la tatou anavatau lea, e pei onatatauai, ia ala atu la i le upu o ia te Ia lea o loo faatino ai le alofa ona tatau ai ona tatou lafoai ese le agasala ma soo se faaiteite o le lagolagoina e isi. … Na malamalama manino lava Iesu i le mea e foliga mai o loo galo i le toatele o la tatou aganuu faanei onapo: e i ai se eseesega tāua i le va o le poloaiga ia faamagalo le agasala (lea sa Ia maua le mana lē faatapulaaina e faia ai) ma lapataiga e tetee ai i le lē amanaiaina (lea Na te lei faia lava i se taimi e tasi).”1
E pei ona faamalamalama atu e Alema ia Korianetona, tatou te manaomia le faamasinotonu ma le alofa mutimutivale, ma e na o le ala atu i le alofa lava o le Atua i le meaalofa o Lona Alo ma i le meaalofa a Lona Alo o le salamo e mafai ai ona tatou maua uma mea ia e lua (tagaiAlema 42:13–15, 22–24).
Tolu, o le poloaiga muamua e tatau ona muamua ona o taumafaiga i le alofa e lē o faavaeina i upumoni a le Atua e lamatia ai le faaleagaina o le tagata po o tagata o loo tatou taumafai e fesoasoani i ai. Na aoao mai Peresitene Russell M. Nelson:
“Ona e alolofa le Tama ma le Alo ia i tatou i se alofa lē faatuaoia, atoatoa, ma ona ua La’ua silafia e lē mafai ona tatou vaai i mea uma La te silasila i ai, ua La tuuina mai ai tulafono o le a taitaiina ma puipuia ai i tatou.
“O loo i ai se sootaga malosi i le va o le alofa o le Atua ma Ana tulafono.”2
Ia, o mafuaaga na e tolu e muamua ai le poloaiga muamua, ae atonu e tatau ona tatou lisiina se isi mafuaga se tasi e lava mo ia lava: o le poloaiga muamua e muamua ona sa faamuamua e le Atua.
O le poloaiga muamua ma le sili ua tuuina mai ai le vaaiga moni mo le olaga. Sa faamalamalamaina e Peresitene Ezra Taft Benson i se tasi taimi:
“A tatou faamuamua le Atua, o isi mea uma o le a fetaui lelei pe aveesea foi mai o tatou olaga. O lo tatou alofa mo le Alii o le a pulea ai mea o loo manaomia mo lo tatou alolofa, o mea o loo manaomia mai ai o tatou taimi, o mea tatou te fiafia i ai o loo tatou tulituliloaina, ma le faatulagaga o a tatou mea e faamuamua.”3
O Le Alofa o le Atua mo i Tatou: Tuuina Mai ia i Tatou “Se Avanoa e Alualu ai i Luma e Pei o Ia Lava”
O le Atua, o lē ua poloaiina i tatou ia alolofa ia te Ia, na muai alofa mai ia i tatou (tagai1 Ioane 4:19). Mafaufau mo sina taimi po o le a le uiga o le alofa o le Atua mo oe ma a’u e oo mai i lenei taimi i lo tatou olaga ma pe o le a foi lona muai faamalumalu mai. E oo lava a o le’i i ai o tatou agaga, sa tatou ola o se atamai po o ni atamai e lei foafoaina. Na afio ifo le Atua i le lotolotoi o atamai ma faia se fuafuaga e mafai ai ona tatou alualu i luma. I upu a le Perofeta o Iosefa Samita:
“O le Atua lava ia, i le silafia ai ua i ai o Ia i le lotolotoi o agaga [po o le atamai] ma le mamalu, ma talu ai e sili atu lona atamai, sa silasila atu ai e tatau ona faatulagaina ni tulafono e mafai ai e le toatele ona maua le avanoa e alualu ai i luma e pei o Ia lava.”4
E pei ona outou silafia, o Lana fuafuaga ua aofia ai lo tatou avea ma Ana fanau agaga, o se laasaga mamalu lea i luma, o lo tatou “esetete muamua” (Aperaamo 3:26). Ona Ia faatuina lea o le ala lea atonu tatou te maua ai le faaopoopoga faaletino i le faaleagaga—o se “esetete lona lua” (Aperaamo 3:26)—e tāua i le mauaina o le atoatoaga o le avea ai ma mamalu lea e olioli ai le Atua lava Ia. Sa manaomia ai le foafoaga o se lalolagi e fai ma nofoaga o se “tulaga nofovaavaai” (Alema 12:24), o se oti faaleagaga ma le faaletino, ma se Faaola e togiola ma faatoetu mai i tatou. I nei mea uma, na tuuina mai ai e le Atua ia i tatou le faitalia e filifili ai ma ua saunia ai ni taunuuga ma ni faamanuiaga e sili atu ma itiiti ifo e tusa ai ma le mea e mafai ona tatou filifilia.
O lea, e amata mai i lo tatou tulaga muamua o ni atamai, ua faaogatotonugalemu e lo tatou Tama Faalelagi o Ia lava ma Lana galuega i totonu o i tatou—i lo tatou tino ola pea ma le ola e faavavau. Na te vaai i ai o Lana galuega ma le mamalu e faia ai (tagaiMose 1:39). Ou te lē talitonu e tatau ona Ia faia soo se mea, aisea la ua Ia faia ai lenei mea mo i tatou? O le a Lana uunaiga? Pe mafai ona avea ai ma se isi lava mea ae lē o le alofa? O se faamaoniga manino o lenei mea o le meaalofa o Lona Alo:
“Aua ua faapea lava ona alofa mai o le Atua i le lalolagi, ua Ia au mai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).
Pe ua tele naua ea le ole atu ina ia tatou faatotonugalemuina o tatou olaga i le Atua ma alolofa ia te Ia e pei ona Ia alofa mai ia i tatou, ma o tatou loto atoa, agaga, mafaufau, ma le malosi atoa? E mafai faapefea ona tatou teena Lona alofa mo i tatou ma taofia lo tatou lava alofa mai ia te Ia i le iloaina o lo tatou alofa i le Atua o le ki lea i lo tatou lava fiafia?
O Lo Tatou Alofa mo le Atua: O Le Faataitaiga a le Faaola
Afai tatou te alolofa i le Atua ma le fuataga atoa o ō tatou loto, agaga, mafaufau, ma le malosi, o lo tatou taulai i le olaga o le faataunuuina lea o Ona manaoga. Ioe, e leai se tagata, na faia lena mea e sili atu le atoatoa ma le atoatoa nai lo lo tatou faataitaiga, o Iesu Keriso, o lē na matauina muamua, “E le tuua au e toatasi e le Tama; aua ou te faia pea lava o mea e lelei ia te ia” (Ioane 8:29). O Lana faamuamua aupito maualuga o le faamamaluina lea o le Tama.
O lena faamuamua aupito maualuga, lena faamaoni aupito maualuga, na mafai ai e Iesu ona vaai i Lana Togiola e ala i lona faamaeaina, e inu lena ipu oona i le matāua mulimuli lava. I lenei osigataulaga maoae (ma le silisiliese moni lava), o le malosi o puapuaga o le Faaola “na oo ai ia te a’u lava,” na Ia faapea mai ai, “o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou lē inuina le ipu oona, ma teena ai” (Mataupu Faavae ma Feagaiga 19:18). Ae ui i lea, o Lona alofa ma le naunau e viia le Tama e sili atu i puapuaga e lē mafai ona malamalama i ai. I upu a le Alii lava ia, “E ui i lea,ia i ai i le Tama le viiga, ma sa Ou inu ma faauma ai a’u tapenapenaga mo le fanauga a tagata” (Mataupu Faavae ma Feagaiga 19:19; faaopoopo le faamamafa).
A o tautau Keriso i luga o le satauro, o lo tatou taunuuga, lo tatou tino ola pea, ma lo tatou ola e faavavau o loo tautau i le paleni, ma o le mea na liliuina le fua mo lo tatou manuia i le filimaoti ai pe o le a i ai se uiga o lo tatou i ai, o le alofa o Iesu Keriso i le Tama ma Lona loto atoa, agaga, mafaufau, ma le malosi atoa.
Ona tatou maua lea o la tatou mamanu ia Keriso: o le faamaoni i le Atua i lo isi mea uma ma luga atu o isi tagata uma; o se iloa lelei o lo tatou tali atu ia te Ia, i taimi uma ma i mea uma; ma se naunautaiga faananau ia iloa ma faia Lona finagalo. O lo tatou taiala lenei i le faia o faaiuga. A tatou alolofa muamua i le Atua, tatou te vaai i le lalolagi ma o tatou olaga e ala i Ona fofoga nai lo mata o soo se isi lava tagata (e oo lava i se faatosinaga i ala o faasalalauga faaagafesootai).
O lea la, e faape’ī foliga o le faamuamuaina o le poloaiga muamua? E lē mafai ona ou lisiina mea uma e manaomia e le Alofa i le Atua nai lo isi mea uma, ae ou te fia faamatalaina nisi o faataitaiga.
Faamuamua le Poloaiga Muamua: “Tausi i Au Poloaiga”
E mautinoa lava o se tasi o vaega aupito tāua o le tausia o le poloaiga muamua o le usiusitai atoatoa lea i le Atua. E pei ona fetalai mai le Faaola, “Afai tou te alolofa mai ia te au, ia outou tausi mai i au poloaiga” (Ioane 14:15; tagai foiMataupu Faavae ma Feagaiga 42:29). Sa tumau Iesu i le tausiga o poloaiga taitasi ma poloaiga uma a Lona Tama ma faaali mai ia i tatou le uiga o le usiusitai i le Atua i le olaga moni.
Sa i ai se taimi na saunoa mai ai sa’u uo lelei e uiga i lo matou naunautaiga lautele e fetuunai pe a oo mai i poloaiga a le Atua. Sa ia matauina, mo se faataitaiga, mai ana matauga ma ona lava aafiaga, o se fesili e amata i le “Pe popole moni ea le Alii pe afai ou te … ?” o le a taliina i taimi uma “Leai.” O se auala talafeagai lea e tuusaunoa ai e toetoe lava o soo se mea, afai e mafai ona tatou faatalitonuina i tatou lava o le a lē popole lava le Alii i se mea e matuā itiiti lava e pei ona tatou manatu i ai. Ae na iloa e la’u uo o le fesili sesē lenei. E lē o le, pe popole le Alii ae o le, pe o le a tatou faia ea mea na tatou folafola atu. O le fesili “O le a le faailoga o le a ou tuuina atu i le Atua e faatatau i lo’u alofa mo Ia?” po o le “O le a le uiga o le tausia o Ana poloaiga ma feagaiga ma le atoatoa ma le mamalu?”
Ioe, o se tasi o vaega sili ona tāua o le tausia o le poloaiga muamua o le tausia lea o le poloaiga lona lua ia alolofa i o tatou uso ma tuafafine. Fai mai le Aposetolo o Ioane, “Pe afai e faapea mai se tasi, Ou te alofa i le Atua, a e ita i lona uso, o le pepelo lava ia; auā o le le alofa i lona uso ua ia vaai atu i ai, pe mafai faapefea ona alofa o ia i le Atua ua ia le vaai atu i ai?” (1 Ioane 4:20). Ma ua ia i tatou fetalaiga masani a le Alii, “O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:35).
Faamuamua le Poloaiga Muamua: “Fafaga A’u Mamoe”
O le gauai atu ma le totoa i le gauai atu ma le lotopulea i poloaiga a le Atua o le auauna atu lea ia te Ia ma Lana galuega. Iā Peteru, ma i tatou, o loo taitaia ai e le Alii Lana fesili fai soo faatolu: “Pe e te alofa mai ia te au?” (Ioane 21:15–17). Ma, e pei o Peteru, o la tatou tali e tatau ona faapea, “Ioe, e sili atu nai lo lau galuega po o soo se mea po o se isi lava.” Ma e taitasi i tatou ma faalogo i le siufofoga o le Leoleo Mamoe: “Fafaga i au tamai mamoe” (Ioane 21:15); “fafaga i au mamoe” (Ioane 21:16–17).5
Ou te mautinoa o loo fiafia lo tatou Tama Faalelagi ma Lona Alo Pele i lo outou agalelei taitoatasi, po o le a lava le utiuti po o le le taua atonu e foliga mai i se lalolagi tele o mafatiaga. O faatinoga uma ma taulaga uma e taua. Ou te talitonu foi ua latou fiafia i mea o loo tatou faia faatasi o ni O Le Ekalesia a Iesu Keriso o le Au Paia o Aso e Gata Ai ma fegalegaleaiga ma isi. Ae o se tasi o faataitaiga, o le fesoasoani e faaitiitia ai mafatiaga o loo tulai mai i le taua o i ai nei lea o loo taulai atu i Iukureini e moni lava e faa-Keriso. Tatou te taumafai pea lava pea e taulai atu i le manaoga o loo i ai, ma aua nei faailoa atu i le lima taumatau le mea o loo faia e le lima agavale, ae ou te faamoemoe o se Ekalesia e mafai ona tatou tuuina atu ni tala sili ona atoatoa e agai i luma ina ia e iloa atili ai mea o loo e faia o se vaega o le tino o Keriso e fafaga ai Ana mamoe.
O le tausia o le poloaiga muamua o lona uiga foi o le faalauiloaina o le galuega a le Alii i le lalolagi, o le fesoasoani e aumaia le ola e faavavau o fanau a lo tatou Tama. E leai se isi faataitaiga sili atu e mafai ona ou mafaufau i ai nai lo le galuega faafaifeautalai na tuuina atu pe o le a tuuina atu e le toatele o outou. O matou i le Toasefululua e mananao i avanoa uma matou te maua e faatasi ai ma faifeautalai ona o le agaga faagaeetia ma faafouina tatou te lagonaina faatasi ma i latou o e ua matuā aafia vave i le fafagaina o mamoe ma tamai mamoe a le Atua.
I o tatou taimi, o le faapotopotoina o le nuu o le feagaiga a le Atua i le lalolagi ma i le lalolagi o agaga, e pei ona faamamafa mai e Peresitene Russell M. Nelson, o se vaega tāua o le uiga mo i tatou o le tausia o le poloaiga muamua ma le sili.
Faamuamua le Poloaiga Muamua: Valaau atu ia te Ia; Taumamafa i Ana Afioga
O le isi auala tatou te faamuamua ai le poloaiga muamua e iloa faigofie lava. O le valaau atu lea i le Atua i le tatalo ma taumamafa i Lana afioga mo le malamalama ma le taitaiga. Tatou te fia iloa ma faia mea e finagalo ai o Ia. Tatou te fia iloa mea e na te silafia. Tatou te mananao e aoao mea uma o le a Ia aoao ai i tatou o Ni Ona soo. Tatou te manaomia faaaliga faaletagata lava Ia.
Ua uunaia i tatou e Amoleka ia tagi atu i le Atua i le suafa o Keriso mo le alofa mutimutivale, ia tagi atu i lo tatou aiga, ma tagi atu i o tatou fanua ma lafu. Ua Ia uunaia i tatou e tagi atu i le Atua e faasaga i le mana o ō tatou fili ma faatosinaga a le tiapolo. “Ioe, ma a outou le tagi atu i le Alii, ia tuu o outou loto ia faatumuina, ia alu atu pea ia te ia i le tatalo e le aunoa, mo lo outou manuia, ma le manuia foi o i latou o e ua siomia ai outou” (Alma 34:27).6
Ua ta’u mai ia i tatou e Nifae ia “taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia” (2 Nifae 32:3). O se faaeega paia ofoofogia i o tatou aso le i ai o le tele o afioga tusitusia a le Atua o loo maua i le tumutumu o ō tatou tamatamailima—e maua e i tatou taitoatasi—faapea foi ma aoaoga o loo i ai nei a perofeta ma aposetolo o loo lolomiina i mamanu ma gagana eseese. E lē pei o se isi lava taimi i le talafaasolopito o le lalolagi. Fesili ifo ia te oe lava, O le a le mea ua faamoemoeina e le Atua i lenei mea?
Ou te fiafia e tatalo. Ou te fiafia i tusitusiga paia. Ou te manao i le malamalama ma le atamai uma ua naunau lo’u Tama Faalelagi e tuuina mai ia te a’u. Ou te iloa e lē faailoga tagata o Ia ma o le a Ia tuuina mai ia te oe ma au mea uma o le a tatou saunia ai i tatou lava e talia. Alofa tele i le Atua ina ia e tulitulimatāgauina ai fesootaiga faifai pea ma Ia e ala i auala ua Ia faauuina. Ma manatua le faataitaiga a Peresitene Nelson—tausia se faamaumauga o mea e te maua e ala i le Agaga Paia ma faatino ia tusa ai.
Faamuamuaina o le Poloaiga Muamua: Tali Atu i le Atua
Se’i o’u toe ta’ua se isi auala se tasi tatou te faatamaoaigaina ai le poloaiga muamua e pei ona muamua i o tatou olaga. O le ola lea ma se lagona o le tali atu i le Atua—tali atu mo le taitaiga o ō tatou olaga ma mo aso taitasi o ō tatou olaga. O lona uiga o le teena ma le faatoilaloina o faaosoosoga, salamo ma le faamagalo atu, tetee atu i le manatu faapito, ave i o tatou luga le suafa o Keriso, ma le atiina ae o le uiga o Keriso. O lona uiga o le vaavaai atu e oo lava i o tatou mafaufauga ma ā tatou upu faapea foi ā tatou amioga (tagai Mosaea 4:30 ma leAlema 12:14). O lona uiga o le gauai atu “i uunaiga a le Agaga Paia” ma le avea “e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tamā” (Mosaea 3:19).
E le o se avega mamafa, mamafatu lea e te tali atu ai. Ae, o le faailoaga o se Tama atamai, naunau, ma agaalofa o lē e silafia le ala i le faataunuuina ma le olioli tupito. O se faailoaga ua Ia saunia se avanoa mo i tatou e lē mafai ona tatou fatuina mo i tatou lava—ma e lē mafai ona tatou ausia e aunoa ma Lana fesoasoani. O le “ola i le faafetai i aso uma, mo le alofa mutimutivale ma faamanuiaga e tele ua ia to mai i o [tatou] luga” (Alema 34:38). Ma o le matālalaga o lenei tali atu tatou te lagona ai le fiafia o le Atua ia i tatou. Ua tatou malamalama e olioli o Ia e oo lava i taumafaiga aupito itiiti tatou te faia e alolofa ai ia te Ia ma o tatou loto atoa, agaga, mafaufau, ma le malosi atoa. O le a se faamautinoaga sili atu ma le filemu e mafai ona e maua nai lo le molimau a le Agaga Paia i lou agaga e fiafia lou Tama Faalelagi ma lou Togiola ia te oe ma lou ala i le olaga?
O le laina pito i lalo e faapea ua poloaiina i tatou e le Atua ia alolofa ia te Ia ona o mea Ua Ia silafia o le a faia mo i tatou. Ua Ia poloaiina i tatou ia fealofani mo le mafuaaga lava e tasi. O le alofa o le Atua e suia ai i tatou. O le alofa o le Atua e suia ai lo tatou alofa mo le tasi ma le isi. O lenei alofa e tatau ai mo lo tatou iloaina o Ia, le Atua moni e toatasi, ma Iesu Keriso lea na Ia auina mai (tagaiIoane 17:3). O le ki lea i lo tatou avea e faapei o Ia.
Ou te iloa o le alofa o lo tatou Tama Faalelagi mo oe e moni ma e lē uma. E sili atu ona faaalia ma le mamana e ala i le alofa tunoa o Lona Alo, o Iesu Keriso. Ou te faamanuia ia te outou ina ia ufiina outou e le alofa o le Atua a o outou alolofa ma taumafai e auauna atu ia te Ia. Ou te faamanuia ia te outou o le a outou lagonaina Lona alofa ma o le a avea ma faatosinaga sili ona mamana i lou olaga. Ou te iloa ma e mafai ona faamautinoa atu ia te outou o loo soifua lo outou Tama Faalelagi, e pei foi o Lona Alo, lo tatou Alii toetu, ma e faapena foi Lana avefeau o le alofa tunoa, o le Agaga Paia. Ou te iloa ma tatalo o le a e iloaina atoatoa.