E Na’o le Faatekinolosi
Auauna Atu i Valaauga i le Taimi ma Le Nofoaga e Manaomia ai i Tatou e le Alii
E ui e mafai ona faamaloloina i tatou mai valaauga, ae e lē faamaloloina lava i tatou mai le faia o mea lelei.
Atapue na faaalia e le au faataitai
Ina ua 14 o’u tausaga, na siitia atu ai lo’u aiga ma auai ai i se uarota fou. E lei leva ae valaauina lo’u tama e avea ma epikopo. Sa fai si lē mautonu mai la matou vaaiga tapulaa—sa i ai isi alii agavaa i le uarota, ma sa lei lagonaina e lo’u tamā e pei na ia iloaina tagata o le ekalesia po o ō latou manaoga taitoatasi i le iloa lelei sa ia manao i ai.
Ae sa ia faia le mea sili na te mafaia ma auauna atu ma le faamaoni, ma galue malosi ia iloa i latou sa ia auauna atu i ai. E oo atu i le taimi na faamutaina ai lana auaunaga, sa ia lagonaina le alofa tele mo tagata o le matou uarota.
Ma i le taimi lava na faamalolo ai o ia, sa valaauina ai o ia i le vasega pepe.
Sa ofoofogia le matamata i le suiga. Sa ia alofa i tamaiti o le vasega pepe ma sa magafagafa e uiga i le fuafuaina o lesona ma gaoioiga na fesoasoani ia i latou e atiina ae ai se faavae malosi i le talalelei. E ui ina sa suia lona valaauga i le uarota, ae sa ia nofo latalata lava i tagata o le uarota ua ia iloa ma alofa ma faaauau pea ona aoao i auala fou e auauna atu ai i ona uso ma tuafafine.
Sa tele foi se taimi sa ia te ia e tuuto atu ai i lo matou aiga; e lei leva ona faamalolo o ia, ae mulimuli lo’u tina i se uunaiga e toe foi i le aoga ma maua ai se faailoga maualuga atu, o lea sa faateleina ai tiutetauave a lo matou tama i lo matou fale a o faaaluina e tinā le tele o le taimi e suesue ai. O se faamanuiaga moni lava mo lo matou aiga le i ai o lana fesoasoani i lena taimi.
Na suia tiutetauave o lo’u tama, ae o le tāua ma le aafiaga o ona tiutetauave e lei suia lava. Sa silafia e le Alii le mea e sili ona lelei mo le uarota ma lo’u aiga. E pei ona faamalamalama mai e Peresitene Dallin H. Oaks, Fesoasoani Muamua i le Au Peresitene Sili: “Tatou te le manatu ai ua ’itiiti lo tatou taua’ pe a faamaloloina i tatou, ma tatou te le manatu foi ua ’sili lo tatou taua’ pe a valaauina i tatou. E leai se “valaauga telē pe itiiti” i le galuega a le Alii. E na o le “agai i luma po o le solo i tua,” ma o lena eseesega e faalagolago lea i le auala tatou te taliaina ai ma faatinoina ai lo tatou faamalologa ma o tatou valaauga.”1
Valaauina e Auauna Atu, Tofia e Galue
Ina ua talanoa e uiga i le galuega faafaifeautalai, sa faailoa ai e Elder David A. Bednar o le Korama a Aposetolo e Toasefululua le eseesega i le va o le tofia i se nofoaga ma le valaauina e auauna atu:
“Faamolemole ia manatua o le fuaiupu muamua o se valaau e auauna atu o se faifeautalai faamisiona i le Ekalesia toefuataiina a le Alii. O le fuaiupu lona lua e faailoa atu ai se tofiga e galue i se nofoaga ma se misiona faapitoa. O le tāua o le eseesega o loo faailoa atu i nei fuaiupu e lua e tatau ona tatou malamalama uma i ai.
“I le aganuu o le Ekalesia, tatou te talanoa soo i le valaauina e auauna atu i se atunuu e pei o Atenitina, Polani, Korea, po o le Iunaite Setete. Peitai e lē o valaauina se faifeautalai i se nofoaga; ae, o loo valaauina o ia e auauna atu.”2
Atonu e fesoasoani le mafaufau i valaauga i le ala lava e tasi. Ua ta’u mai ia i tatou i le Mataupu Faavae ma Feagaiga 4:3 e faapea “afai [ua ia i tatou] le manao e auauna atu i le Atua ua valaauina [tatou] i le galuega.” Po o fea lava e “tofia i ai” i tatou ma po o a o tatou tiutetauave patino, e valaauina lava i tatou e auauna atu i le Alii ma faamanuia Ana fanau o se vaega o ō tatou tiutetauave o le feagaiga. E mafai ona tatou lotogatasi i lo tatou faamoemoega ia “lagona le olioli i le auauna atu i le Atua e ala i le auauna atu i Ana fanau [tagai Mosaea 2:17],” ma le iloaina o “valaauga e fesoasoani foi ia i [tatou] e faateleina ai lo tatou faatuatua ma faalatalata atili atu ai i le Alii.”3 Po o le a lava le faalapotopotoga po o valaauga tatou te auauna atu i ai, o i tatou uma o vaega o le galuega lava e tasi—o le galuega o le faaolataga ma le faaeaga.
Avea ma Se Vaega o “le Tino o Keriso”
Na faamalamalama mai e Peresitene Henry B. Eyring, Fesoasoani Lua i le Au Peresitene Sili e faapea, o valaauga uma e tuuina mai e fesoasoani ia i tatou ia avea atili e faapei o Keriso ma faamanuia ai olaga o isi: “E oo lava i tagata sili ona fou o le Ekalesia e iloaina o se valaauga e auauna atu o se mea e tatau ona faia ma le alofa. E ala lea i le tuuina atu o ō tatou loto atoa i le Matai ma tausia Ana poloaiga o le a tatou iloa ai o Ia. …
“Ua valaauina oe e fai ma sui o le Faaola. E avea lou leo ma siufofoga o le Alii pe a e molimau atu, e avea ou lima ma Ona aao pe a e siitia ma fesoasoani atu i isi.”4
Pe a papatisoina i tatou ma osia feagaiga e galulue i le suafa o Keriso, e avea i tatou ma vaega o “le tino o Keriso” (1 Korinito 12:27). O vaega eseese o le tino e eseese galuega e fai, ae e tutusa uma lava le tāua; o le mea aupito sili ona tāua e faapea e galulue faatasi le tino e faataunuu se faamoemoega autasi. I le tusi lesona o le Sau, Mulimuli Mai ia te A’u o loo ta’ua ai, “I lenei ituaiga o lotogatasi, e lē na o le faailoaina o eseesega ae ia faapelepele i ai, auā a aunoa ma tagata o le ekalesia e eseese meaalofa ma tomai, o le a tapulaa foi le tino.”5
E silafia e le Alii o tatou tomai ma gafatia eseese, ma Na te silafia foi le auala e faaaoga ai e faamanuia ai i tatou ma tagata o siomia ai i tatou, lea e aofia ai le valaaulia o i tatou e auauna atu i valaauga ma tofiga eseese i taimi eseese. O se valaauga e lē faatatau i tulaga, vaega, po o agavaa; e faatatau i le naunau e gauai atu i le finagalo o le Atua ma talia o le a Ia valaauina i tatou i le mea e sili ona Ia manaomia ai i tatou i se taimi ma se nofoaga patino.
O Le Galuega a le Matai
Na faamamafa mai e Peresitene Gordon B. Hinckley (1910–2008), i lana saunoaga muamua ina ua uma ona valaauina o se Peresitene o O Le Ekalesia a Iesu Keriso o le Au Paia o Aso e Gata Ai, le tāua o valaauga uma i le Ekalesia:
“E leai se valaauga i lenei ekalesia e faatauvaa pe itiiti foi lona taunuuga. O i tatou uma lava i le faataunuuina o ō tatou tiute e aafia ai olaga o isi tagata. O i tatou uma taitoatasi e tusa ai ma o tatou tiutetauave, na fetalai mai ai le Alii: ‘O le mea lea, ia e faamaoni; tu i le tofi ua Ou tofia i ai oe; fesoasoani i e vaivai, sii i luga lima ua tautau i lalo, ma faamalosi tulivae ua vaivai’ [Mataupu Faavae ma Feagaiga 81:5]. …
“E te maua se avanoa sili mo le faamalieina i le faia o lou tiute e pei foi o a’u i lo’u tiute. O le alualu i luma o lenei galuega e faalagolago lea ia tatou taumafaiga tuufaatasi. Po o le a lava lou valaauga, ia faia i le agaga lava lea e tasi ia maua ai le lelei e pei foi ona ou faia i lo’u valaauga. O le mea sili ona tāua o le galuega lenei a le Matai. O le tatou galuega o le feoa’i lea ma agalelei e pei ona sa Ia faia.”6
O upu a Peresitene Hinckley ua faapupula atoatoa mai ai mea na aoaoina e lo’u tama o se epikopo, taitai o le vasega pepe, toalua, ma se matua: ua fetalai mai le Alii ia i tatou e auauna atu i valaauga eseese i o tatou olaga atoa, ae Na te lē taofia lava le valaauliaina o i tatou ia avea atili e faapei o Ia a o tatou galulue e faamanuia olaga o i latou o siomiaina i tatou.