O Mataupu Faavae o le Auaunaga

Auauna atu ma le Lotomaualalo

O le atiina ae o le lotomaualalo sili atu o le a faaleleia atili ai lo tatou tomai e galulue ai e pei ona sa faia e le Faaola.

E mafai ona avea atili i tatou e pei o le Faaola a o tatou aoao e auauna atu e pei ona sa Ia faia. O le faaaogaina o faataitaiga a Keriso ma Ona soo i le Feagaiga Fou, o le a tatou aoao ai i le auala e atiina ae ai uiga faa-Keriso ia e mafai ona fesoasoani ia i tatou i a tatou taumafaiga e auauna atu e pei o le Faaola.

O Ioane o lo o Papatisoina Iesu, saunia e Harry Anderson

O Ioane le Papatiso o se Faataitaiga o le Lotomaualalo

Sa faamanuiaina Ioane le Papatiso i lana galuega. Sa ia aumaia le toatele i se malamalama sili atu o le upumoni. Ae sa malamalama Ioane o lana matafaioi autu lava o le saunia lea o tagata ina ia suia e le Faaola. Na iloa e Ioane o Iesu “e ao ina tupu, a e ao ina ou faaitiitia” (Ioane 3:30). Sa ia iloaina po o ai e tatau i ai le viiga ma le mamalu. Sa Ia silafia le mea na sau ai le mana e fai ai le lelei. Atonu na maua e isi mea lelei uma sa latou faia, ae sa faataitaia e Ioane le uiga faa-Keriso o le lotomaualalo.

Ina ua afio mai Iesu ia Ioane ma talosagaina ina ia papatiso, sa tali atu Ioane ma le lotomaualalo ma le te’i i le talosaga: “E ao ona e papatisoina mai o a’u ia te oe, a ē maliu mai ea oe ia te au?” (Mataio 3:14). Ona toe faaali atu lea e Ioane o le lotomaualalo e ala i le usiusitai i le taitaiga a le Faaola ma faia e pei ona sa Ia talosaga ai.

Ona o lona lotomaualalo, sa mafai ai e Ioane ona saunia le ala mo le toatele e o mai ia Iesu Keriso.

Faataitaia o le Lotomaualalo i le Auaunaga

O le taumafai e aoao le lotomaualalo o le a fesoasoani ia tatou taumafaiga e auauna atu i le tasi ma le isi.

1. E manaomia le lotomaualalo e talia ai se tofiga e auauna atu mai ia i latou ua valaauina e taitai i tatou (tagai i le 1 Peteru 5:1–6; Filipi 2:8). O le lotomaualalo e fesoasoani tatou te agai ai i luma ma le faatuatua o le a faamanuiaina e le Alii a tatou taumafaiga (tagai i le Eteru 12:27; Mataupu Faavae ma Feagaiga 1:28).

2. E manaomia le lotomaualalo e saili ai le taitaiga ma mulimuli i uunaiga. O le lotomaualalo o le a atili aoaoina atili ai i tatou ma tatala ai uunaiga a le Agaga. (Tagai i le Mataupu Faavae ma Feagaiga 112:10.) O se lotomaualalo e sili atu ona saunia e maua musumusuga ma e mālū ma tumu i le agaalofa. O le mauaina o musumusuga o le a fesoasoani ia i tatou e auauna atu ai i le ala o le a sili ona lelei mo i latou tatou te auauna atu i ai.

3. E manaomia le lotomaualalo e mafuta ai ma auauna atu i se tasi e ese mai ia i tatou (tagai i le Roma 12:3–5; Filipi 2:1–3). E tusa lava po o a eseesega, o le taumafai ia malamalama pe faapefea ona tatou tutusa e mafai ona fesoasoani tatou te fesootai lelei ai ma isi. O le faataitaia o le tomai o le faalogo ma le faaeteete e mafai ona fesoasoani tatou te malamalama ai ia i latou, aoao mai ai, ma iloa le auala e mafai ona tatou fesoasoani ai ia i latou. O le fesili ifo ia i tatou lava i le fesili “O le a se mea o le a sili ona fesoasoani ia te au pe ana ou i ai i o latou seevae?” atonu tatou te maua ai ni manatu.

4. E manaomia le lotomaualalo e iloa ai o loo tatou aoao pea ma tuputupu ae faatasi. E mafai ona tatou onosai i isi ma faamoemoe o le a latou onosai ia i tatou. (Tagai i le Kolose 3:12–13.) O le sailia o manatu faaalia i auala e mafai ona tatou faaleleia e manaomia ai le lotomaualalo.

5. I le itu o le mauaina o auaunaga, o le taliaina o le fesoasoani e lē faigofie i taimi uma. Tatou te mananao lava ia lagona e mafai ona tatou taulimaina na o i tatou lava ia faafitauli. Peitai, o le taliaina o le auaunaga a isi o se auala lea e faamalolosia ai faauooga, talu ai o le auauna atu i isi e siitia ai le alofa i le va o i tatou. O le faatagaina o isi e auauna mai ia i tatou e manaomia ai le mālū, se loto agamalu, ma le lotomaualalo e tatau ona tatou galulue uma ia maua. (Tagai i le 1 Peteru 3:8–9.)

Atiina Ae o le Lotomaualalo

A oo ina tatou iloa le Faaola, o le a sili atu ona tatou iloa le mea o le a Ia faia e auauna atu ai i o tatou tulaga. E faapefea ona tatou atiina ae le uiga faa-Keriso o le lotomaualalo?

1. E mafai ona tatou anapopogi ma tatalo mo le lotomaualalo (tagai i le Helamana 3:35; Salamo 35:13).

2. E mafai ona tatou manatua ma faafetai mo mea na Ia faia mo i tatou (tagai i le Mosaea 4:11).

3. E mafai ona tatou iloa lo tatou faalagolago ia te Ia (tagai i le Mosaea 2:23–25; Eteru 12:27).

4. E mafai ona tatou salamo (tagai i le Alema 5:26–29).

5. E mafai ona faateleina lo tatou lotomaualalo pe a tatou valaaulia le Agaga i o tatou olaga (tagai i le Mataupu Faavae ma Feagaiga 11:12).

Suesue Ia Iloa Atili

Tagai i le ala na faaalia uma ai e Iesu ma Ioane le Papatiso le lotomaualalo i le vitio o le Tusi Paia “O Le Papatisoga o Iesu” o loo maua i le ChurchofJesusChrist.org/media.

Maimoa ia Kevin J Worthen, peresitene o le Iunivesite o Polika Iaga, o loo faamatala mai po o le a le lotomaualalo ma pe mafai faapefea ona suia ai lou olaga: “Filifili ina Ia Lotomaualalo” (Iunivesete o Polika Iaga, faigalotu, Ian. 4, 2022), speeches.byu.edu.

Faitau manatu o Elder Adrián Ochoa e uiga i le lotomaualalo ma le faataoto i le atalii faamaumau oa (tagai i le Luka 15:11–32): “O Le Filifiliga o le Lotomaualalo,” Ensign, Iulai 2020, 38–41.