Sau, Mulimuli Mai ia te A’u

Mataio 4; Luka 4

E Faapefea Ona Tatou Teteeina Faaosoosoga?

O Faaosoosoga e Tolu, saunia e Gary E. Smith © 1982

O tagata uma e tali atu mo i latou lava i le lalolagi e faaosoosoina. E oo lava i le Faaola sa faaosoosoina foi. Ae na mafai ea ona agasala o Ia? Na aoao mai Peresitene Howard W. Hunter (1907-95) e faapea: “Pe ana faapea e leai se avanoa e gauai atu ai i faatosinaga a Satani, semanū e leai se tofotofoga moni, leai se manumalo moni i le taunuuga. … Sa atoatoa o Ia ma leai se agasala, e lē ona sa tatau ona ia faapea, ae nai lo o lena, na manino lava ma naunau e manao ia avea ai” (“O Faaosoosoga o Keriso,” Ensign, Nov. 1976, 19).

Tagai i mea e mafai ona e aoaoina mai aoaoga nei a taitai o le Ekalesia i le ala na teena ai e le Faaola ia faaosoosoga.

Ia Maua le Malosi mai Tusitusiga Paia

“Ina ua fetaiai ma lē faaosooso sili lava ia, ua ‘le [gaua] Iesu i tofotofoga’ (Mosaea 15:5). Sa Ia tali atu i le mau: “E lē na o mea e ai e ola ai le tagata, a o afioga uma e tulei mai i le fofoga o le Atua” (Mataio 4:4). O poloaiga ma faatulagaga o le talalelei o lo tatou puipuiga foi lea, ma e pei foi o le Faaola, e mafai ona tatou maua le malosi mai tusitusiga paia e tetee ai faaosoosoga.”

Elder D. Todd Christofferson o le Korama a Aposetolo e Toasefululua, “Ia Tatou Faatamatane,” Liahona, Nov. 2006, 48.

Faamalosia Muamua Oe Lava

“Sa matua taofia e ia le talanoaga, ma poloai atu: ‘Ina alu ese ia oe, Satani,’ o lona uiga, ‘Alu ese ia—alu ese ma o’u luma—ou te lē faalogo atu—ou te le manao ia te oe.’ Ona tatou faitau lea, ‘ona tuua ai lea o ia e le tiapolo.’ [Mataio 4:10–11.]

“O le mea tonu lea e tatau ona tatou faia, pe afai ua sili ia i tatou le puipuia o le agasala nai lo le feagai ma le galuega sili ona faigata o le tau togafitia o le agasala. A o ou suesue i le tala i le Togiola, ma ona faaosoosoga, ou te mautinoa sa faaaoga e ia ona malosi uma e faamalosia ai ia lava, ina ia tetee atu i faaosoosoga nai lo le tau ma le faaosoosoga ina ia faatoilaloina.”

Aoaoga a Peresitene o le Ekalesia: Spencer W. Kimball (2006), 108.

Talanoaga

Mafaufau i ituaiga o faaosoosoga (fia’ai, faamaualuga, ma le mana) o loo faamatala mai i le Mataio 4. O a nisi o auala e faamalosia ai oe lava faaleagaga mo nā ituaiga o faaosoosoga?