E Na’o le Faatekinolosi
Manatu e Fitu e Avea ai o se Nuu e Sili Atu ona Lotogatasi ma Agaga Faauo o le Au Paia
O le faamalosia o a tatou faapotopotoga e amata ia i tatou.
Atapue na faaalia e le au faataitai
I totonu o se Ekalesia o loo salalau atu ona tagata i le kelope, o la tatou molimau i le Tama Faalelagi ma le Alii o Iesu Keriso e tuufaatasia ai lo tatou nuu o le Au Paia o Aso e Gata Ai. Tatou te taumafai faatasi ia avea atili e faapei o lo tatou Faaola, i le opomauina o Lana upumoni e faapea “afai tou te le tasi e le a a’u outou” (Mataupu Faavae ma Feagaiga 38:27).
I le 4 Nifae tatou te faitau ai i le tulai mai ma le pa’ū o se nuu e totonugalemu ia Keriso. Sa leai ni a latou finauga ia i latou, sa latou “tuutele mea uma” (4 Nifae 1:3), sa latou tausia o latou tagata matitiva, ma sa uunaia i latou e le “alofa o le Atua” (4 Nifae 1:15) i o latou loto. Ua tasi i latou (tagai 4 Nifae 1:17). Peitai, i le āluga o taimi sa latou tuua ai nei tulaga faatauaina ma liliu atu i totonu, ma aveesea ai le nuu lotogatasi sa latou mauaina muamua.
E mafai faapefea ona tatou agai atu i se nuu e sili atu ona faatotonugalemu ia Keriso e pei ona sa i ai muamua? O manatu nei e fitu e mafai ona fesoasoani ia i tatou ia sili atu ai ona lotogatasi o ni fanau a le Atua.
1. Faailoa Atu Oe Lava ia i Latou E te Lē Iloa
I le avea ai ma Leoleo Mamoe Lelei, e silafia patino i tatou e lo tatou Faaola ma “valaau ana lava mamoe i o latou igoa” (Ioane 10:3). E mafai ona tatou mulimuli i Lana faataitaiga e ala i le saili ia iloa ma malamalama le tasi i le isi. E mafai foi ona tatou fesoasoani i isi ia lagona le faatauaina. Po o le a lava le telē o lau siteki po o le laitiiti o lau paranesi, e i ai lava se tasi e mafai ona e iloa atili.
O le faailoaina atu o oe lava e faaalia ai lou popole e uiga i ou uso ma tuafafine, pe tou te talanoa ma se tasi o loo auai i le lotu mo le taimi muamua pe talanoa i se tagata ua leva o le ekalesia e lē masani ona faia se tou talanoaga. E faaalia ai le lotofaafetai mo le mea na ta’ua e Elder Randy D. Funk, a o avea o ia ma se tasi o Fitugafulu, “lo latou naunau e o mai i totonu o le lafu ma tumau ai i le lafu.”1 I talanoaga i le lumanai, manatua le faataitaiga a le Faaola i le mamana tele ma le magafagafa i le mafai ona valaau se tagata i o latou igoa.
2. Taulai Atu i La Tatou Galuega Masani—o le Galuega o le Faaolataga ma le Faaeaga
I le tusi atu i le Au Paia i Korinito, sa aioi atu ai le Aposetolo o Paulo ina ia leai ni “ina nei i ai ni maseiga ia te outou; a ia maopoopo lava i le loto e tasi ma le manatu e tasi” (1 Korinito 1:10). O se tasi o auala e tutusa ai le mafaufau o le galulue faatasi agai atu i taumafaiga masani ia i ai i luga ma tumau ai i le ala o feagaiga, po o fea lava o tatou i ai i le taimi nei i la tatou malaga. O valaaulia e ola, tausi, valaaulia, ma tuufaatasia i le galuega o le faaolataga ma le faaeaga2 ua tuuina mai ai ia i tatou ni avanoa tuufaatasi o ni tagata tausi feagaiga.
E mafai ona tatou taulai atu i nei tiutetauave e fa ua tofia mai le lagi e talanoaina ai manaoga o la tatou iunite ma nuu i le lotoifale. I le avea ai ma se paranesi, uarota, siteki, po o le misiona, e mafai e tagata o le ekalesia ma taitai ona fefautuaai faatasi ina ia malamalama atili ai i le auala e auauna atu ai le tasi i le isi i se faamoemoega masani. O le galulue faatasi i lenei faamoemoega masani e mafai ona tuufaatasia ai i tatou i ni auala tulaga ese.
3. Aloese mai le Amataina po o le Faasalalauina o Tala Feaveai
O tala, po o le faitatala tiga atonu e moni pe lē moni foi, e mafai ona tupu mai ai se vaaiga lē lelei i isi ma vavaeese ai o tatou sootaga. Aua e te talitonu i tala leaga, talu ai o le faia o lena mea e fatuina ai ni mavetevete i le faavae o ō tatou nuu o le Ekalesia. E tusa lava pe moni se tala, aloese mai le faasalalauina po o le amataina. E leai se tasi e atoatoa, ma e leai se tasi e tuusaunoa mai le manaomia o le fesoasoani a le Atua, o le mea lea aua le avea ma tagata muamua e lafoina lau maa (tagai Ioane 8:7).
Afai e manaomia e se tagata o le uarota po o le paranesi se faasa’oga, e tatau i taitai ona fefautuaai faatasi ma ia faalilolilo. Na poloai mai Keriso, “afai e agaleaga mai lou uso ia te oe, ia e alu ma aoai ia te ia tau lava o oulua ma ia” (Mataio 18:15).
4. Auauna Atu ma se Ataata
Na saunoa mai Elder Adrián Ochoa o le Fitugafulu e faapea, “e finagalo le Alii ia avea oe ma se vaega o Lana galuega tele. O le a lē avea lava le fuafuaga o le fiafia ma mea sili ona moni ia te oe nai lo le taimi o loo e fesoasoani ai i isi ia ola ai.”3 O ō tatou tofiga faaleauaunaga o se tasi lea o auala e mafai ai ona tatou faia ma le fiafia lenei mea.
Pe e te auauna soo atu pe manaomia ona e saili po o le a lou tofiga faaleauaunaga, e mafai ona tatou sailia pea lava pea le Agaga ia iloa le mea e finagalo le Atua tatou te faia e auauna atu ai i isi i Lona suafa. A o tatou saili e mulimuli i le faataitaiga a le Faaola o le auauna atu i le toatasi, e mafai ona tatou lagonaina le olioli ma le agalelei o le talalelei a Iesu Keriso i le fatuina o se nuu faafeiloai.
5. Saili ia Malamalama Atili le Tasi i le Isi
E tofu i tatou uma ma ni uiga ma natura eseese. Ma e manaomia i tatou uma i le tino o Keriso (tagai 1 Koronito 12:12–31). E mafai ona tatou saili ia malamalama ma sili atu le faatauaina o tagata uma. A o tatou taumafai ia faamasani lelei le tasi i le isi, atonu tatou te iloa ai e mafai ona tatou lagolago lelei atu manaoga o le tasi ma le isi.
Mo se faataitaiga, o se tasi o uiga e ono ese mai ia i tatou e i le va o le matamuli ma le fiafia e faamasani. O nisi tagata, e masani ona ta’ua o ni “tagata e fiafia e faamasani,” e lagona le toafimalie tele i faatulagaga o vaega o tagata e toatele po o tofiga e manaomia ai i latou e fegalegaleai ma tagata latou te lē iloa. O isi, ua ta’ua o “tagata matamuli,” e masani lava o tulaga e fiafia i ai e mafai ai ona latou fegalegaleai ma vaega toalaiti o tagata ia e mafai ona latou fesootai ma le vavalalata i ai. I ia ituaiga uma e lua, e i ai uma uiga auaumamā e tāua i le galuega a le Alii. Ua tuuina mai e le Ekalesia le tele o avanoa ia e sili atu ona masani ai i nisi o taimi, e fetaui mo tagata e fiafia e faamasani e pei o le lauga i le lotu, faia o le galuega faafaifeautalai, po o le auai i gaoioiga faatasi ma isi latou te lē iloa lelei. A o tatou saili e faamalolosia lo tatou nuu, e mafai ona tatou iloa manaoga o tagata matamuli ma faia laasaga e fesoasoani ai ia i latou ia auai ma le toafimalie atili i le galuega o le faaolataga ma le faaeaga i se auala e faaatoatoa ai o latou malosiaga ma uiga auaumamā matamuli.
O isi auala e mafai ona tatou saili ai ia malamalama atili ma lagolago e le tasi le isi e aofia ai le nofouta i talaaga faaleaiga, tamaoaiga, manaoga faalesoifua maloloina, mea e fiafia i ai, ma le mea o loo i ai tagata taitoatasi i luga o le ala o feagaiga. I le saunia ai mo ituaiga uma o gaoioiga, vasega, fonotaga, ma fegalegaleaiga, e mafai ona tatou manatua le auala e fesoasoani ai i tagata uma ia lagona le faaaofiaina ma vaai po o le ā le manaomiaga o i latou i le galuega a le Alii. E moni lenei mea i le aapa atu i tagata o le ekalesia i le tele o mea e fiafia i ai ma faapea talaaga.
6. Faamagalo atu ma Saili le Faamagaloga
Ua talanoa mai le Feagaiga Fou e uiga i le tele o faamalologa faavavega ma valaauga paia i le avea ai ma soo. O se molimau tumau o lo tatou tomai e suia ai. O se faapotopotoga faafeiloai ma faatotonugalemu ia Keriso e lē atoatoa pe a aunoa ma le aoaoga faavae o le faamagaloga. E tāua pe a tatou faia se mea sese i isi ma pe a latou faia se mea sese ia i tatou, e mafai ona tatou faalelei uma e ala i lo tatou Togiola (tagai 2 Koronito 5:18).
Na uunaia i tatou e Peresitene Russell M. Nelson ia “faaaoga le lotomaualalo, lototele, ma le malosi e manaomia uma e faamagalo atu ai ma saili ai le faamagaloga.”4 E ui atonu e lē faigofie le faamagalo atu o isi, ae e mafai ona faalautele ai lo tatou gafatia e alolofa atu ai. A o sailia le faamagaloga mai isi atonu e lē agalelei, e mafai ona faamalosia ai lo tatou gafatia e salamo.
O le faaalia o le agaalofa i faaletonu ma mea sese a isi e faalauteleina ai le aapa atu o le alofa o le Atua e ala mai ia i tatou. O le faamagalo atu e aumaia ai la tatou vaega Au Paia o Aso e Gata Ai latalata atili atu ia Keriso ma mafai ai ona tatou maua atoatoa o tatou “loto ia lalagaina faatasi i le lotogatasi ma le alofa o le tasi i le isi” (Mosaea 18:21).
7. Fatu se Nuu o le Saolotoga o Tapuaiga i Tapuaiga Ma Talitonuga Uma
O le fatuina o se nuu faalelotu e sili atu ona lotogatasi ma agaga faauo e oo atu i talaatu o tuaoi o la tatou lava tapuaiga. A o ofoina atu e tagata o le Ekalesia le auaunaga i le lalolagi atoa mai Atenitina i Zimbabwe, e mafai ona tatou alolofa i tagata uma, e tusa lava po o a o latou talitonuga faalelotu.
Na aoao mai Elder Ronald A. Rasband o le Korama a Aposetolo e Toasefululua: “I le avea ai ma se ekalesia, tatou te auai faatasi ma isi tapuaiga e puipuia tagata o faatuatuaga ma faatauanauga uma ma a latou aiā tatau e talanoa mai ai i o latou talitonuga maumaututu. E lē faapea ai tatou te talia o latou talitonuga, pe latou te talia foi o tatou, ae e tele atu mea e tutusa ai tatou nai lo i latou o e mananao e faaumatia la tatou tapuaiga.”5
Fai ni talanoaga ma isi e uiga i le mafuaaga latou te alolofa ai i o latou talitonuga, ma faasoa atu ia i latou le mafuaaga e te alofa ai i ou talitonuga. Vaai po o a mea e mafai ona outou faia faatasi e faamalosia ai lou nuu. O le faauo atu ia i latou e lē auai i lo tatou faatuatuaga e fatuina ai le lotogatasi e lē mafaatamaia lea e fiafia i ai le Atua, auā “ua tasi lava [tatou] uma ia Keriso Iesu” (tagai Kalatia 3:28).