Aoaoga Faavae o le Talalelei

Punaoa mo le Autalavou ma Tamaiti

Ua i ai i mātua le uluai tiutetauave e aoao a latou fanau e uiga ia Iesu Keriso ma Lana talalelei. O Le Ekalesia a Iesu Keriso o le Au Paia o Aso e Gata Ai e i ai faalapotopotoga, polokalama, ma isi punaoa e fesoasoani ai i mātua i a latou taumafaiga. E mafai faatasi e mātua, taitai o le Ekalesia, ma uo ona fesoasoani i tamaiti uma ma talavou ia o mai ia Keriso.

Ata pue o tamaiti o le Peraimeri na pueina e Ben Johnson

Peraimeri

O le Peraimeri o se faalapotopotoga a le Ekalesia mo tamaiti e ta’i 18 masina e oo i le 11 tausaga. I le Peraimeri, e aoao tamaiti e uiga ia Iesu Keriso ma Lana talalelei e ala i lesona, musika, ma gaoioiga. E mafai e le Peraimeri ona fesoasoani i tamaiti ia lagonaina le alofa o le Atua mo i latou.

Vasega o le Korama a le au Perisitua Arona ma Vasega a Tamaitai Talavou

Ia Ianuari o le tausaga e atoa i ai le 12 tausaga o tamaiti, latou te siitia atu ai mai le Peraimeri i le korama a le Perisitua Arona (mo tama) po o vasega a Tamaitai Talavou (mo teine). I a latou korama ma vasega, e faaauau pea e le autalavou ona faamalosia a latou molimau ma auauna atu i isi.

Polokalama a Tamaiti ma le Autalavou

I Lona talavou, ua tupu a’e Iesu “i le poto ma le tino ma ua alofagia o Ia e le Atua atoa ma tagata” (Luka 2:52). E fesoasoani le polokalama a Tamaiti ma le Autalavou i tagata talavou o le Ekalesia e mulimuli i le faataitaiga a Keriso. Latou te aoao ma tuputupu ae i vaega uma o ō latou olaga—faaleagaga, faaleagafesootai, faaletino, ma faaleatamai.

Mekasini a le Ekalesia

O le mekasini a le Ekalesia mo tamaiti o le mekasini o le Uo. O le Mo Le Malosi o le Autalavou o le mekasini mo le autalavou. O nei mekasini e aofia ai tala, aoaoga, ma gaoioiga ua tusia faapitoa mo tamaiti ma le autalavou.

O le Tusitaiala o le Mo Le Malosi o le Autalavou

Mo Le Malosi o le Autalavou: O Se Taiala mo le Faia o Filifiliga o loo aoao ai le autalavou e uiga i upumoni o le talalelei. Ua aoao ai i latou i le ala e faia ai faaiuga o le a fesoasoani ia i latou e mulimuli ai ia Iesu Keriso. E aofia ai foi tali i fesili atonu o i ai i le autalavou e uiga i le ala e ola ai i le talalelei.

Potutusi o le Talalelei

O le Potutusi o le Talalelei e tele punaoa faatekinolosi, e aofia ai vitio, musika, tala o tusitusiga paia, ma gaoioiga. O loo aofia ai foi punaoa e fesoasoani ai i mātua ma taitai e aoao atu mataupu faavae o le talalelei. O loo maua nei punaoa i le Potutusi o le Talalelei i le ChurchofJesusChrist.org ma i le polokalama o le Gospel Library.

Konafesi a le MMA

E amata atu i le tausaga e atoa i ai lo latou tai 14 tausaga, e valaaulia ai le autalavou e auai i konafesi o le Mo Le Malosi o le Autalavou (MMA). O nei mea e tutupu e aofia ai gaoioiga ma vasega e fesoasoani e faamalosia le faatuatua ia Iesu Keriso ma fesoasoani ai i le autalavou ia tuputupu ae faaleagaga, faaleagafesootai, faaletino, ma faaleatamai.

Mai i Tusitusiga Paia

O le a lagona e fanau le filemu a o tatou aoao atu i latou e uiga i le Atua (tagai i le Isaia 54:13; 3 Nifae 22:13).

O mātua e nafa ma le aoaoina o a latou fanau ina ia malamalama i le talalelei (tagai i le Mataupu Faavae ma Feagaiga 68:25).

Na poloaiina e le Alii mātua e tausi a’e a latou fanau “i le malamalama ma le upumoni” (Mataupu Faavae ma Feagaiga 93:40).

Punaoa Faaeletonika mo Tamaiti

Tala o tusitusiga paia (scripturestories.ChurchofJesusChrist.org): Saili itulau valivali, vitiō, ma tala o tusitusiga paia ua tusia mo tamaiti faitau.

Vitiō (ChurchofJesusChrist.org/children/videos): Matamata i vitiō mo ma e uiga i tamaiti.

Faaputuga a tamaiti i le Potutusi o le Talalelei: I le polokalama ma i le ChurchofJesusChrist.org, o le faaputuga o le Potutusi o le Talalelei i lalo o le “Tamaiti” o loo i ai musika, vitiō, tala, ma isi gaoioiga.

Sailiili Atili

Afai e i ai ni au fesili e uiga i punaoa a le Ekalesia mo tamaiti ma autalavou, e mafai ona e talanoa i ou uso po o tuafafine o auaunaga, ou taitai o le uarota po o le paranesi, po o faifeautalai. E mafai foi ona e maua le tele o punaoa i le ChurchofJesusChrist.org.