E Na’o le Faatekinolosi: Talavou Matutua
E Mafai Faapefea Ona Ou Lagonaina le Olioli o le Talalelei ma Gasegase Faalemafaufau?
Sa ou tauivi ma lo’u soifua maloloina faalemafaufau i lo’u olaga atoa, ae o se suiga i se vaaiga na faaali mai ai ia te a’u le telē o lo’u tuputupu a’e e ala i lea tauiviga.
Ae e le’i faigofie i taimi uma lo’u olaga. Sa amata ona ou oo i āuga o popolega faaagafesootai ma le atuatuvale a o talavou ma sa maua i le ADHD i le aoga maualuga. Ina ua pe ā ma le 15 masina o o’u auauna atu i la’u misiona talai, sa amata ona ou oo i ni mafaufauga e pule i le ola. E le’i leva, ae maua a’u i le ma’i o le paipola [bipolar] II.
Sa ou feagai ma se faaiuga faigata. Sa ma talanoa ma lo’u peresitene o le misiona e uiga i lo’u alu i le fale lea e mafai ona ou maua ai le fesoasoani sa ou manaomia. Ae sa lē mafai ona ou faagaloina lagona o le lē fiafia i le Alii. Sa ou lagona le pei o lo’u manao e nofo ma faaauau pea ona auauna atu i tagata na ou alofa i ai o se manaoga amiotonu.
Mulimuli ane, sa ou iloa ai sa i ai tagata na manaomia a’u e le Alii e feiloai i ai i le fale ma sa i ai avanoa mo lo’u loto nutimomoia ina ia faamaloloina ai. Ma ua ou iloa o la’u galuega faafaifeautalai sa taliaina e Ia.
E ui lava i lena faamautinoaga, ae sa ou mafaufau pea pe aisea na tatau ai ona ou tauivi tele. Ua aoao mai tusitusiga paia e faapea “ua i ai tagata, ina ia latou maua le olioli” (2 Nifae 2:25), ma le “galuega” ma le “mamalu” o le Alii o le “aumaia le tino ola pea ma le ola faavavau o le tagata” (Mose 1:39). O mea uma la e faia e le Alii ina ia mafai ai e i tatou uma ona toe foi atu ia te Ia ma i’u ai ina fiafia, a ea?
Ae faafefea a’u? Aisea ou te oo ai i gasegase faalemafaufau ia e faalavelave i lo’u tomai e filifili ai le fiafia? Aisea o le a faatagaina ai a’u e le Alii ou te oo i le lototiga tele? Pe sa ou faia se mea sese e tatau ai mo lo’u ma’i? O ni nai vaaiga na fesoasoani ia te a’u e maua ai sina malamalamaaga.
O Le Iloaina o le Faaola
E masani ona ou mafaufau e uiga i le tala ia Keriso o loo faamaloloina le tagata tauaso ma fesiligia po o ai na agasala e mafua ai ona faaletonu. O le tali musuia a Iesu na sili ona uigā ia te a’u: “E le’i agasala lenei tagata, po o ona mātua: ae peitai ina ia faaalia ai o galuega a le Atua ia te ia” (Ioane 9:3). Ona faamaloloina faavavega lea e Keriso le tagata, aoao atu se lesona e faateleina ai le faatuatua, faatuatuaina, ma le malamalama i Lona mana ma le fuafuaga.
Sa faaalia galuega a le Atua i lenei tagata, ma ou te iloa e mafai foi ona faaali mai ia te a’u. Ua ou vaai i Ana galuega ua faaalia i le agaalofa ua ou maua e ala i o’u tofotofoga ma le agaalofa o loo ou taumafai e faaali atu ia i latou o siomia a’u. Ua ou vaai i Ana galuega ua faaalia i le ala ua ou iloa ai lo’u Faaola ma aoao ai e Na te silafia a’u ona sa Puapuagatia o Ia mo a’u i Ketesemane ma luga o le satauro.
Lagonaina o le Olioli E Sili Atu le Matagofie
I le lua masina talu ai, sa lagona e lo’u tinā le faagaeetia e le Agaga e ta’u mai ia te a’u o loo ia mafaufau e uiga i tofotofoga sa ou oo i ai. Sa ia fesili mai ia te a’u, “Ae faapefea pe afai e lē o tutupu nei mea ia te oe ae e mo oe?” Sa ia tuuina mai lana molimau e faapea, ona o le tiga na ou oo i ai, o le a ou maua ai se gafatia loloto atu e lagona ai le olioli.
O se mataupu faavae lenei na malamalama i ai Atamu ma Eva. I le Faatoaga o Etena, sa i ai Atamu ma Eva “i se tulaga o le lē sala, e aunoa ma se olioli, ona sa laua lē iloa se pagatia.” (2 Nifae 2:23). Ina ua ou lagonaina le olioli, e sili atu foi ona matagofie auā ua ou iloa lagona o le faanoanoa.
Na aoao atu e Liae ia Iakopo, o lē na fanau i le vao ma e le’i vaai lava i le olaga faigofie i Ierusalema, e faapea o le Alii “o le a faapaiaina ou puapuaga mo ou manuia” (2 Nifae 2:2). I le iuga, ou te faafetai mo a’u tauiviga ma gasegase faalemafaufau. Ou te iloa a tatou faatagaina o tatou puapuaga e aumaia i tatou ia latalata atili atu i le Tama Faalelagi ma Iesu Keriso ma faamamāina i tatou, o le a avea atili i tatou e faapei o i La’ua.
O lenei malamalama e lē faafaigofie atili ai a’u tauiviga, ae e aumaia ai ia te a’u se vaaiga e faavavau. I aso faigata, ou te maua ai le faamoemoe i le mafaufau i feagaiga na ou osia ma le Tama Faalelagi. Ou te iloa Na te tausia Ana folafolaga pe a ou tausia a’u folafolaga. Ou te manaomia pea faamanuiaga faaletino e pei o togafitiga, vai, ma mausa ia e faatumauina ai le maloloina o lo’u mafaufau, ae o le tuufaatasia o i latou e i ai meafaigaluega faaleagaga e pei o le suesueina o tusitusiga paia, tatalo, ma le tapuai i le malumalu e faia ai se eseesega tele i lo’u soifua maloloina faalemafaufau.
Ma i aso pe a ou lagonaina le olioli e ui lava i o’u tauiviga, ua faamanatu mai ai ia te a’u vavega e mafai e Iesu Keriso ma Lana Togiola ona aumaia i lo’u olaga.