O Le Nofoaga Na Manaomia Ai Au e le Alii

Saunia e Noel Cohen, Nairobi, Kenya

Sa ou faamoemoe e valaauina au i Aferika i la’u misiona, ae sa manaomia au e le Alii i se isi vaega o Lona tovine.

Sa auai uma o’u mātua i Le Ekalesia a Iesu Keriso o le Au Paia o Aso e Gata Ai i Kenya, ma sa auauna atu uma i la’ua i ni misiona talai. Talu mai lava lo’u laitiiti, sa la aoaoina au e tatau foi ona ou auauna atu i se misiona. Sa ou tulimata’i atu i ai.

I le iva masina ae ou te lei maua lo’u valaauga, sa ou siitia atu ai mai Kenya i New Jersey, ISA, lea sa faigaluega ai lo’u tina. Ina ua ou auina atu la’u talosaga mo le misiona, sa ou manatu o le a manaia le toe foi atu i Aferika i la’u misiona. O le mea moni, sa ou faamoemoe e valaauina au iina.

Ae ina ua ou mauaina lo’u valaauga o le misiona, sa ou iloa ai o le a ou alu i le Misiona a Uosigitone Spokane i le Iunaite Setete. Ou te lei iloa po o fea lena mea, ae o le manatu muamua lava na fetalai mai le Agaga i lo’u mafaufau o le, “O iina e manaomia ai oe e le Alii.”

Ina ua ou tulaueleele i Spokane i ni nai masina mulimuli ane, sa faafeiloai au e le peresitene o le misiona ma fai mai ia te au se fesili: “Sa ou tilotilo i lau talosaga. E te tautala moni lava i le faa-Swahili?”

“Ioe,” o la’u tali atu lea. “Sa ou ola ae ou te tautala i le gagana Swahili ma le Igilisi.”

“Ia, ona,” na ia fai mai ai, “ua suia lou valaauga o le misiona mai le tautala faa-Peretania i le tautala faa-Swahili.”

Sa tatalo o ia mo se faifeautalai e mafai ona tautala i le faa-Swahili. O nisi o faifeau i le misiona sa taumafai foi e aoao le faa-Swahili e i latou lava ia. E lei umi ae ou iloa le pogai.

Sa maua e Spokane se vaega toatele o tagata sulufai mai malo i sasae o Aferika o Tanzania, Kenya, Burundi, Rwanda, ma Uganda. O le toatele o nā tagata sulufai na uluai o mai mai le Ripapelika Temokarasi o Congo. E fai si ese teisi o le latou Swahili mai le Swahili sa ou tautala ai, ae sa mafai lava ona matou malamalama i le tasi ma le isi. Sa iu ina ou faaaluina la’u misiona atoa i le uarota lava lea e tasi i Spokane e aoaoina na tagata sulufai.

O Le Alofa o le Mea Aupito Telē Lea

E tele ina faapea mai tagata o le Ekalesia, “E lē kea tagata i le tele o lou iloa seia oo ina latou iloa le telē o lou manatu atu.” I le taimi o la’u misiona, sa ou aoaoina ai le moni o lena faamatalaga i le manuia faafaifeautalai.

I o latou atunuu, o le toatele o aiga sulufai sa matou aoaoina sa vaaia ni mea leaga maoae i feteenaiga ma taua e faigata ona mafaufauina. Sa latou molimauina moni le inoino ma mea leaga e mafai e tagata soifua ona faia i isi. E toatele na leai se faamoemoe i tagata soifua ma sa tatau ona sosola ese mai o latou fale.

Ina ua amata ona aoaoina i latou e faifeautalai, sa lē o le tele o mea na matou iloa e uiga i le talalelei na fesoasoani ia i latou e o mai ai ia Keriso. Sa sili atu le tele o le faaali atu e i matou ma tagata o le uarota ia i latou le alofa faa-Keriso. Ina ua matou faaali atu ia i latou le alofa ma tausia i latou, sa latou toe lagonaina le faamoemoe. Sa latou vaaia o loo i ai pea ni tagata lelei i le lalolagi ma o tagata lelei na latou iloa i le uarota sa fesootai i le talalelei a Iesu Keriso. Sa latou mananao ia lagonaina lena alofa, ia avea ma se vaega o lena alofa, ina ia latou o mai ai i le lotu ma toe foi mai i le lotu.

“Ua tumu lau ekalesia i le alofa,” sa ta’u mai e se tasi tagata aoao ia te a’u.

Ae matou te lei fesili atu mo se fesoasoani i le faaaumeaina, e fesili tagata o le Uarota a Lincoln Heights, i le vaaia o le vaega a Swahili, pe o le a se mea e mafai ona latou faia. E masani ona ta’u mai e aiga sulufai ia i matou, “Sa fesoasoani lenei tagata ia i matou i lenei mea ma sa fesoasoani lenei tagata ia i matou i lena mea.” Sa amataina foi e le uarota se Aoga Sa i le faa-Swahili.

Sa matagofie le vaaia o tagata o le uarota o alolofa i tagata Aferika i le Ekalesia. O le alofa o le mea aupito telē lea na taitai atu ai i lo matou manuia i tagata Swahili. O nisi tagata o le ekalesia e ofo atu le aumaia i taavale i le lotu, o nisi e talimalo i aiga, o nisi e asiasi atu i aiga, ma o nisi e faia ni mea mo aiga e lē iloa atu. Ma o le epikopo o le uarota, o Philip Huber, o lē sa galue malosi e aoao le faa-Swahili, sa i ai pea iina e faaalia lona alofa ma le lagolago. Sa lē mafai ona ou talosagaina se uarota e sili atu ona lelei e galulue faatasi ai.

O Lana Galuega Lenei

O i tatou uma lava o fanau a le Atua. Na te silafia i tatou ma o le a ia faaaogaina i tatou i eria e sili ona tatou auauna atu ai ia te Ia i o tatou tomai tulaga ese. O Lana Galuega Lenei. E lē se tatou galuega lea. Na te tuuina i tatou i le mea e sili ona Ia silafia. A maua e faifeautalai lo latou valaauga, atonu latou te lē o i le mea latou te mananao e o i ai, ae e mautinoa lava e auina mai e le Alii i latou i le mea e finagalo o Ia latou te o i ai. O le nofoaga Na te auina atu i ai i latou o le laueleele lea ua Ia saunia ai tagata e talia i latou.

Ina ua ou taunuu i Spokane, sa ou lagonaina e pei ou te lē tau alu i Aferika. I Spokane, sa ou lagonaina e pei na aumai au i se tamai Aferika i totonu o Amerika.

O nisi taimi ou te mafaufau ai i la’u misiona ma faapea atu, “Sa matuā tele naua lena mea mo au e avea ai ma se vaega. Pe sa tatau moni ea ona avea au ma se vaega o lena mea?”

Ua faalotomaualaloina au ma faafetai i le manatu sa manaomia au.