“Ogatusa ma le Finagalo o le Alii,” Liahona, Fep. 2023.
Sau, Mulimuli Mai ia te A’u
Ogatusa ma le Finagalo o le Alii
E avea atili i tatou e faapei o Keriso pe a tatou mulimuli i Lana faataitaiga o le faia o le finagalo o Lona Tama.
O nisi o faaiuga sili ona tāua tatou te faia i le olaga o faaiuga ia e aafia ai isi. E masani lava o le tulaga lea pe a tatou filifili e talia valaauga e auauna atu i le Ekalesia.
Mo se faataitaiga, ina ua valaauina au e avea ma se peresitene o le misiona, sa valaauina lo’u toalua, o Lucie, e avea ma a’u soa. Sa ma mananao ia lotogatasi a o ma auauna atu. Sa ma iloa o lona uiga sa taua mo i ma’ua o se ulugalii ona ogatusa ma le finagalo o le Alii. O le mea e sili ai, o le a aafia foi a tatou fanau i o tatou valaauga ona o le a latou o faatasi ma i tatou. Sa laiti i latou, e 14 tausaga, 11, ma le 7. O le tuua o le aiga mo le tolu tausaga o le a avea ma se fetuunaiga telē i o latou olaga, o lea o le ōgatusa ai ma le finagalo o le Alii o le a tāua foi mo i latou.
Sa matou filifili o se aiga sa matou mananao e auauna faatasi i le Alii. E pei ona fai mai lo’u toalua, “Sa matou mananao uma lava e faasino atu i le itu e tasi.” Ma o se aiga sa faamanuiaina i matou a o matou auauna atu faatasi i le Misiona a Ripapelika Temokarasi o Congo Mbuji-Mayi.
O le auauna atu faatasi na faamalosia ai lo matou lotogatasi ma le gafatia e fetaiai ai ma luitau e faatatau i se aganuu fou, i se aai fou, ma se gagana fou i le lotoifale. Sa fesoasoani ia i matou ina ia faateleina le malosi maufetuunai a o matou tali atu i le manaomia ona auai i semina faaleautaitai ma konafesi faalesone ma taulimaina ai pea manaoga o a matou fanau. Sa amata ona anoa atili a matou tatalo faaleaiga ma le suesueina o tusitusiga paia, ma na faateleina le malosi o a matou molimau a o matou vaavaai atu i tagata liliu mai, tagata o le ekalesia, ma faifeautalai o alolofa ma talia le talalelei.
Faia o le Finagalo o le Tama
Aisea e tāua tele ai mo i tatou le saili ia iloa ma faia le finagalo o lo tatou Tama Faalelagi?
I lenei mea, e pei ona i ai i mea uma, o le Alii o Iesu Keriso ua faatuina se faataitaiga. Sa Ia saunoa:
-
“Aua ou te le’i alu ifo mai le lagi e fai lo’u lava loto, ao le finagalo o Le ua auina mai a’u’ (Ioane 6:38).
-
“E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo’u Tama o i le lagi” (Mataio 7:21).
-
“Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au” (Ioane 7:17).
I ni isi upu:
-
E avea atili i tatou e faapei o Keriso pe a tatou mulimuli i Lana faataitaiga o le faia o le finagalo o le Tama.
-
E tatau ona tatou usiusitai ina ia tatou agavaa.
-
A o tatou mulimuli i le faataitaiga a Keriso o le saili e fai le finagalo o le Atua, ua tatou aoao e ala i lo tatou usiusitai e moni mataupu faavae o le talalelei.
E ala i le mulimuli ai i le Faaola, o le a tatou avea atili ai e pei o Ia. Ma a o tatou avea atili e faapei o Ia, e avea atili i tatou e faapei o le Tama. Ina ia mafai ona tatou aoao e fai le finagalo o le Tama e ala i le usiusitai i aoaoga a le Alo.
Atiae i luga o se Papa
Na fetalai foi Iesu Keriso o i latou o e faalogo ma faia Ana fetalaiga e pei o se “tagata poto, ua atiae lona fale i luga o le papa:
“Ma sa to mai uaga, ma oo mai lologa, ma agi mai matagi, ma taia lena fale; ma sa lei pau lava, ona sa faavaeina i luga o se papa” (Mataio 7:24–25).
E faapena foi, ona aoao e Helamana ona atalii: “Ia manatua, o luga lava o le papa o lo tatou Togiola, o le Keriso lea, o le Alo o le Atua,e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.” (Helamana 5:12).
O lona uiga a tatou faaōgatusa o tatou loto ma le finagalo o le Atua ma usitai i Lona finagalo, o le a tuuina mai ia i tatou le malosi tatou te manaomia e taulima ai afā o le olaga. O le a tumau lo tatou faatuatua.
Ata pue mai faaaloaloga a le tusitala
I le avea ai o se aiga o loo galulue faatasi i le galuega faamisiona, sa matou molimauina le upumoni—mo i matou lava ma mo isi—ina ia matou iloa Iesu Keriso e ala i le faia o Lona finagalo. Sa matou vaaia le mea e tupu i olaga o i latou o e faalogo i Lona siufofoga, usitai i Ana poloaiga, ma talia Lona finagalo i o latou olaga. Sa matou mauaina faamanuiaga a o matou faataunuuina o matou lava valaauga, ma sa matou vaaia le tuputupu ae faaleagaga o faifeautalai ma tagata o le Ekalesia i le lotoifale, e aofia ai tagata faatoā liliu mai, o ē na taliaina valaauga, faasoa atu Lana talalelei, ma auauna atu i le tasi ma le isi. Sa matou aoaoina o le faia o Lona finagalo e faigofie. O lona uiga o le faia o le mea o loo manaomia mai ia i tatou e fesoasoani ai i le Atua e faataunuuina Lana galuega ma Lona mamalu, ‘ia aumaia le tino ola pea ma le ola faavavau o le tagata’ (Mose 1:39).
Sa matou vaaia lena mea, e pei o le nuu o le Tupu o Peniamina, o i latou o ē faaōgatusa i latou lava ma le finagalo o le Alii ua “malilie e ulu atu i se feagaiga ma lo matou Atua e fai lona finagalo, ma usiusitai i ana poloaiga i mea uma e poloaiina ai i matou” (Mosaea 5:5).
Faasoaina Atu o Lana Folafolaga
Ina ua ma taliaina le valaauga na tuuina mai e Peresitene Russell M. Nelson e auauna atu o ni taitai misiona, sa ma iloa ma lo’u toalua o loo ma faia le mea na finagalo le Alii ma te faia. Ma sa ma fiafia ina ua faatasi mai le ma fanau i lena auaunaga. Sa ma tuua mea uma, ae sa ma iloaina o faamanuiaga matagofie o loo i luma atu. Sa ma naunau e faasoa atu le folafolaga a le Faaola: “O lenei foi le finagalo o le ua auina mai au, ia maua le ola e faavavau e i latou uma o e vaai i le Atalii ma faatuatua ia te ia, ou te toe faatuina foi i latou i le aso gataaga” (Ioane 6:40).