“Malamalama i le ‘Aisea?’” Liahona, Fep. 2023.
Autalavou Matutua
Malamalama i le “Aisea?”
Ina ua taia au i se tofotofoga matautia, sa ou ita ma sa ou fia iloa le mafuaaga.
O nisi o i tatou e faaaluina le tele o ō tatou olaga e fesili ai “aisea?”
“Aisea na ou sau ai iinei?”
“Aisea ua tele naua ai a tatou poloaiga?”
“Aisea e faatagaina ai e le Atua mea leaga e tutupu?”
I la’u misiona, e toatele tagata na fesili mai ia te a’u i nei ituaiga o fesili. Ma e i ai lava sa’u tali mo i latou. Sa ou faatuatua i le talalelei ma iloa e tusa lava po o le a le mea na tupu, o le a i ai lava le Atua iina mo a’u.
Pe o le sa ou manatu sa ou faia.
I le sefulufa o masina i la’u misiona, sa ou ala a’e ai i se tasi taeao ma sa i ai se mea na sese. Sa ou lagona lo’u matua’i niniva lava ma amata fesasia’i a’u upu. O aso uma lava mulimuli ane, ua faasolo ina leaga tele. Sa lagona ua puaoa le olaga. Sa ou vaivai. Sa lē mafai ona ou faia ni talanoaga, faitau a’u tusitusiga paia, po o faamalositino. E oo lava i le ala umi na lagonaina le faigata.
E lei umi ae ou malaga i se vaalele i le fale ua vave nai lo le mea na ou fuafuaina. Na faafuasei lava ona faamutaina la’u misiona, ma o a’u fuafuaga mo le olaga sa lei tupu e pei ona sa ou faamoemoeina. Sa faafuasei ona ou faia le fesili lea na fesili mai ai le toatele ia te a’u i la’u misiona:
Aisea na faatagaina ai le Atua le tupu o lenei mea ia te a’u?
O Le Leai o ni Tali
Sa ou saili mo ni tali. Sa ou mautinoa o le a ou toe foi i la’u misiona auā sa tele pea mea na totoe ou te faia ma aoao ai! Sa ou faamaoni ma usiusitai, o lea sa tatau ai ona faamanuiaina a’u mo lena mea, a ea? O aso uma lava ou te fai ifo ai ia te a’u lava, o le a maua e fomai se fofo ma o le a ou toe foi atu. Sa ou tatalo lē leoa ai lava. Ae i le āluga o taimi, e aunoa ma ni tali, sa faamalosia au e talia ua uma la’u misiona.
E aunoa ma ni tali, na mavae atu le taimi e pei o se miti. Sa leai se mea na lagonaina e moni. Sa ou lagonaina i taimi uma le faagalegale moe. O mea e sili ona ou fiafia i ai ua matuā faigata mo a’u. Sa tuputupu ae lo’u leiloa faaleagaga ma liliu ese mai le Atua. I lo’u tigā sa ou talitonu ai e lē mafai ona ou toe foi atu i le malamalama. O lea na ou maua ai le toafimalie i le pogisa.
Ae ina ua mavae ni masina o le pogisa, sa tupu se vavega, ma sa iloa e le fomai ua ou maua i le mai moe (narcolepsy) ma le faaletonu o maso (cataplexy) o se faaletonu lea e faaleagaina ai le vaega o le faiai lea e mafai ona pulea ai le taamilosaga o le ala ma le moe.
Sa lei mafai ona foia lo’u tulaga, ae sa mafai ona ma taulimaina o’u āuga. Ma o lenei tali o se ave o le faamoemoe lea na musuia ai foi a’u e toe maua le malamalama o Keriso i lo’u olaga.
O lea, i le lotomaualalo, sa ou faia ai se tatalo faamaoni ma toe fesili atu,
Aisea na tupu ai lenei mea ia te a’u?
Ma i lo’u faamoemoe faafouina, na ta’u mai ai e le Agaga ia te a’u ua uma ona ou iloaina le tali.
Faaaogaina o Upumoni i Lo’u Lava Olaga
O se tasi o mau ou te fiafia lava i ai o le Roma 8:28, “Ua matou iloa foi e galulue faatasi mea uma e lelei ai i latou o e ua alofa atu i le Atua.” O mea uma—e aofia ai luitau.
Sa ou iloa lenei upumoni.
Sa ou aoaoina lenei mea i le tele o taimi i la’u misiona. Ae ou te lei faaaogaina i lou lava olaga. Sa ou iloaina sa ou fausia le ita i le Atua talu ona ou toe foi vave mai i le fale mai la’u misiona. Ou te lei mauaina le filemu na Ia folafola mai auā ou te lei faatagaina o Ia e ofoina mai nā faamanuiaga ia te au.
E pei ona aoao mai Peresitene Russell M. Nelson, “O le olioli o tatou lagonaina e itiiti lava se mea e faatatau i tulaga o tatou olaga a o mea uma o loo faatatau i le taulaiga o ō tatou olaga.”1
I la’u vaaiga faatapulaa, sa ou ita ia te Ia ma ou te lei manao ia fiafia seia oo ina alu lo’u olaga i le ala sa ou manao i ai. Ae na faamanatu mai e le Tama Faalelagi ia te au sa i ai se faamoemoega maualuga atu i lo’u tigā—ina ia mafai ai ona ou sau ia Keriso, ia suia, ma maua le olioli. “Na pa’ū Atamu ina ia i ai tagata; ma ua i ai tagata ina ia latou maua le olioli” (2 Nifae 2:25).
Na aoao mai Elder D. Todd Christofferson o le Korama a Aposetolo e Toasefululua: “I le lotolotoi o le afi a le tunu auro, nai le ita i le Atua, ia faalatalata atu i le Atua. Valaau atu i le Tama i le suafa o le Alo. Savavali faatasi ma i La’ua i le Agaga, i lea aso ma lea aso. Tuu atu ia i La’ua pe a mavae se taimi e faaali mai lo La’ua faamaoni ia te oe. Sau ma le faamaoni ia iloa i La’ua ma ia e iloa moni oe lava. Ia Faamuamua le Atua.”2
Ua ou malamalama nei o le iloaina o loo faatasi le Tama Faalelagi ma Iesu Keriso ma i tatou o le a le aveesea ai i taimi uma tui o lenei olaga. O loo ou tauivi pea ma lou mai. Ae o le faatuatuaina ma le alofa ia i La’ua o le a aumaia ai pea le uiga i tigā ia e foliga mai e leai se uiga ma “aisea” tatou te onosaia ai. O puapuaga uma, o faanoanoaga uma, o tigā uma e mafai ona suia mai se tui e agi mai i se lesona na aoaoina ma le alofa e lo tatou Tama Faalelagi ma Lona Alo, o Iesu Keriso.
A o faaauau pea ona ou sailia i La’ua, e faaauau pea ona La aoaoina au ma ofo mai ia te au le olioli i aso taitasi.
E alala le tusitala i Uosigitone, ISA.