E Lē Fea le Olaga—ma E Lē Afaina Lea

Taofia le igoa

Pe a foliga mai e lē fea le olaga, ia manatua sa onosa’ia e le Faaola le mea e sili ona lē fea.

Ou te mautinoa sa ou faitio i o’u matua pe ā ma le faaafe taimi a o o’u tuputupu a’e e faapea sa i ai se mea sa le fea. Sa lē tatau ona oo mai ia te a’u le taimi e faamama ai ipu. Sa lē tatau ona tele atu ni a’u feau nai lo nai o’u tei laiti.

O le tali a ou matua sa tutusa lava i taimi uma. O se [faaupuga] autasi, ma le mausali, “E lē fea le olaga!”

Ae e foliga mai sa le’i magoto lava lena mea i totonu [ia te a’u].

O a’u i lea taimi, i le ogatotonu o le luasefulu ma ona tupu o o’u tausaga, o loo mafaufau pea e tatau ona fea le olaga. Pe a oo i le ola ai i le talalelei, sa ou faamoemoeina ni faamanuiaga vave mo le tausia o poloaiga. Ma sa ou manatu o le lē tausia o poloaiga o le a aumaia ai i taimi uma le faanoanoa ma le tiga.

Sa amata ona suia la’u vaaiga ina ua filifili lo’u tuafafine e tuua le Ekalesia. E manino lava sa ia talitonu foi o le ola ai i le talalelei e tatau ona aumaia ai faamanuiaga vave. Ina ua ia lē vaai i faamanuiaga sa ia faamoemoe i ai, sa amata ona ia masalosalo i mea sa ia talitonu i ai.

Ina ia atili ai le fenumiai, ina ua ia tuua le Ekalesia, o nisi o mea sa ia faamoemoe i ai na amata ona sologa lelei. Sa mautinoa lava na te le’i oo i le faanoanoa sa ou manatu o le a oo mai pe a e lē filifili e mulimuli ia Iesu Keriso.

Sa ou fiafia ona sa fiafia o ia, ae sa ou popole foi ina ne’i mafai e lona tulaga faamanuiaina ona faatalitonuina atili ai o ia e lē moni le Ekalesia.

Ae mo a’u, sa ou ola pea i le talalelei, ae o nisi o faamanuiaga sa ou faatalitali i ai sa le’i oo mai lava. Sa foliga mai e lē fea.

Sa toe i ai foi iina le tali, e pei lava ona manino: “E lē fea le olaga.” O ni mea nei se lua ua ou malamalama i ai e uiga i lena mea.

Fesuia’ia o O’u Manatu e uiga i le Lē Fea

O mea lelei ma mea leaga e tutupu i tagata o ē ola i le talalelei faapea foi i tagata e lē o ola ai—o le Atua e “na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu” (Mataio 5:45). O se vaega lena o le olaga.

Ae a la folafolaga o le ola ai i le talalelei e aumaia ai faamanuiaga ma le olioli? Ua faapea mai tusitusiga paia pe afai tatou te tausia poloaiga e faamanuiaina i tatou (tagai Mosaea 2:22). Ae o faamanuiaga atonu e lē oo mai i taimi uma i auala po o taimi foi tatou te faamoemoeina ai. O le ola ai i le talalelei e lē mautinoa ai o le a tele atu a tatou tupe, sili atu ona faamanuiaina, pe itiiti ifo foi tofotofoga nai lo isi tagata. Ma e lē faapea e mafai ona tatou faamoemoeina ni faamanuiaga patino faaletino mai le Atua o se ituaiga o “totogi” mo le amiotonu ai.¹

Ae e i ai faamanuiaga patino e mafai ona tatou faamoemoeina pe a tatou tausia poloaiga. Ua folafola mai ia i tatou ia maua pea le Agaga e faatasi ma i tatou (tagai Moronae 4:3). Ma a o tatou liliu atu i le Alii i le faatuatua, o le a tuuina mai ia i tatou le malosi e fetaiai ai ma tofotofoga ia e mautinoa lava e oo mai.²

Ua folafola mai ia i tatou le olioli ma le filemu moni (o le ituaiga e lē filimaotiina e o tatou tulaga).³ Ma ua folafola mai foi ia i tatou le meaalofa silisili o meaalofa uma o le—ola e faavavau. E pei na saunoa mai ai Elder Dale G. Renlund o le Korama a Aposetolo e Toasefululua, “O le a tauia lou faatuatua i le Tama Faalelagi ma Iesu Keriso e sili atu nai lo se mea e mafai ona e mafaufauina.”⁴

A o suia lo’u malamalama e uiga i le tulaga talafeagai tonu, sa tatau ona ou filifili pe aisea ua ou filifili ai e ola i le talalelei. Pe o ou ola ai ona ou te faamoemoe e faamanuia a’u e le Atua, pe ona o se mea e sili atu?

Sa ou iloaina o le uunaiga sili ona tāua mo a’u o lo’u alofa lea mo le Tama Faalelagi ma Iesu Keriso.

Ua Faatoilalo e le Faaola Mea Uma e Lē Fea

I Lona alofa ma le alofa mutimutivale, sa totogi ai e le Faaola e leai se agasala le tau lē fea, ma ofoina mai le olioli e faavavau ia te a’u e lē atoatoa. Na saunoa Elder Renlund: “E leai lava se mea e faatusalia i le faaituau e lē gata na onosaia e le Faaola. … Ae na Ia filifili lava e faia ona o Lona alofa mo i tatou ma mo le Tama Faalelagi.”⁵ O le faaolataga o se meaalofa e lē tatau ona tatou maua ma e le mafai foi ona tatou maua. Ae ua ofoina mai e le Faaola i tagata uma pe afai tatou te filifili e liliu atu ia te Ia.

Sa aoao mai foi Elder Renlund:

“I le faavavau, o le a foia e le Tama Faalelagi ma Iesu Keriso le fea uma. …

“… Ona o Ia, ua mafai ai ona tatou maua le filemu i lenei lalolagi ma ia lototetele. Afai tatou te faatagaina o Ia, o le a faapaiaina e Iesu Keriso faiga le fea mo lo tatou lelei [tagai 2 Nifae 2:2]. O le a lē na ona Ia faamafanafanina i tatou ma toefuatai mai mea sa leiloloa [tagai Iopu 42:10, 12–13; Iakopo 3:1]; o le a Ia faaaogaina le le fea mo lo tatou manuia.”⁶

E maeu lo’u lotofaafetai mo se Faaola o lē na onosaia le le fea silisili mo a’u ma mo i latou ou te alofa i ai. O loo faatalitali mai o Ia mo i tatou ma aao mafola, ma ofoina mai ia i tatou le meaalofa o le ola e faavavau ma le filemu e faavavau.