Ako Moadto, Ako Moserbisyo: ang Sugilanon sa Gugma Luyo sa Tema nga Kanta

Daghan ang kinabuhi nga napanalanginan pinaagi sa kalamposan sa “Ako Moadto, Ako Moserbisyo:: 4600” nga inisyatiba sa Area sa Pilipinas. Gawas sa dinasig nga panan-awon sa Area Presidency, ang suporta sa lokal nga mga lider sa pagkapari ug ang mga paningkamot sa mga lider sa kabatan-onan, ang milagroso nga kalamposan sa kampanya gipadako usab sa makadani nga awit nga tema nga gipasundayag ni Loredel “Daday” Ducena-Baluyot.

Ang paghimo sa sikat nga awit uban sa iyang bana nga si Justin usa ka paghago sa gugma. Human sa unang fireside sa Kapangulohan sa Area nga gipasalida sa Facebook niadtong Mayo 16, 2021, si Daday ug Justin mibati sa espiritu ug nadasig sa pagsulat sa kanta. Human sa pipila ka semana, ilang gipresentar ang kanta ngadto sa area production team sa Simbahan ug mitanyag sa paggamit niini aron makatabang sa pagpadayon sa kusog sa kampanya. Ang kanta girebyo ug gi-aprobahan, ug pagka-Hulyo ila na kining gi-rekord uban sa tabang ni Brio Divinagracia sa paghan-ay ug duyog nga bokalista. Ang kanta opisyal nga gilunsad atol sa follow-up nga fireside sa Kapangulohan sa Area niadtong Nobyembre 21, 2021.

Gawas sa 2021 nga tema nga kanta sa kabatan-onan nga “Buhat nga Mahinungdanon,” ang “Ako Moadto, Ako Moserbisyo” ni Daday nahimong inila human nahimong kabahin sa mga komperensiya sa kabatan-onan, YSA, ug FSY sa tibuok nasod. Gipaminaw usab kini ug giawit lakip sa 2022 nga tema nga kanta sa kabatan-onan nga “Salig sa Dios.” Bag-ohay lang, gisulat pag-usab sa magtiayon ang kanta isip kabahin sa fireside sa Kapangulohan sa Area niadtong Nobyembre 20, 2022 nga naglunsad og mas taas ug mas komprehensibo nga “Duol Ngadto kang Kristo: Ako Moadto, Ako Moserbisyo” nga inisyatiba.

“Dako kaayo nga dungog kanamo sa dihang ang Kapangulohan sa Area mihangyo nga among sublion sa pagbuhat ang kanta aron mahimo gihapon kini nga bahin sa subli nga paglunsad nga kampanya,” mipaambit ang musikero nga nakat-on sa kaugalingon nga si Justin. “Siya mibakasyon dayon sa trabaho ug migahin kami og tibuok tapos sa semana sa paghunahuna ug pagtinabangay sa kanta,” mitug-an si Daday.

Mga batchmate sa MTC sa Abril 2020, ang magtiayon mikuha gikan sa ilang mga kasinatian sa misyon sa una nilang pagsulat sa kanta. Si Justin miserbisyo ubos sa Philippines Bacolod Mission samtang si Daday mitrabaho sa Philippines Urdaneta Mission. Sa iyang pagbalik gikan sa iyang misyon, si Daday gipili aron morepresentar sa nasod sa 2021 Youth Music Festival ug sa kadugayan nahimong host sa binuwan nga programa sa internet nga “Paminaw Kaniya pinaagi sa Musika.” Nagkaila sila pag-usab sa dihang mipauli si Justin gikan sa iyang misyon, ug ang hinanali nga panimpalad sa gugma misangpot sa ilang kasal sa Templo sa Manila niadtong Pebrero 3, 2022.

Sa pagtrabaho og usab sa kanta, sila mipahayag og pasalamat alang sa paghatag og gibug-aton sa templo tungod kay kini ang ilang paborito nga dapit. “Isip batan-ong magtiayon nga nag-atubang og daghang mga hagit sa kinabuhi, ang templo mao ang among luwas nga dangpanan diin kami makadawat og kalig-on ug giya,” miingon si Justin. “Uyon ko,” midugang si Daday. “Kami nagpuyo layo sa templo, apan kami kanunay naghinam-hinam nga moadto didto ug mobati sa Espiritu sa Ginoo.”

Uban sa ilang gugma sa usag usa nga gipalig-on sa ilang gugma sa musika, misyonaryo nga buhat, sa templo, ug sa Ginoo, si Daday ug Justin mikonsiderar sa ilang kaugalingon nga swerte kaayo nga nakakaplag sa usag usa sa ilang panaw subay sa dalan sa pakigsaad.