Pagdan-ag sa Kalibotan Pinaagi sa Musika

Usa ka serye sa konsiyerto sa Pasko ang nagtapos sa 2022 nga selebrasyon sa Dan-agi ang Kalibotan nga inisyatiba, nga nagpasiugda sa gugma sa Pilipino sa musika ug sa tanang butang nga bahin sa Pasko. Ang Presidente sa Area sa Pilipinas nga si Elder Steven R. Bangerter mipasabot kon sa unsang paagi ang Pasko mahitungod sa mga gasa, gikan sa mga artista nga migasa kanato sa ilang mga talento ngadto sa atong Amahan sa Langit nga naghatag sa katawhan og labing talagsaon sa tanan nga mga gasa, ang pagkatawo sa Iyang Bugtong Anak.

Ang MTC Activity Center nahimong usa ka tinuod nga bukana [hall] sa musika samtang ang tulo ka mga pasundayag nagpakita og world-class nga kalingawan ug inspirasyon. Ang pianista sa konsiyerto nga si Dr. Sunbeam Choi miabli sa serye niadtong Disyembre 17 samtang gilipay niya ang mga tumatan-aw gamit ang mga awit sa Pasko og mga klasikal nga piyesa. Ang Philippine Madrigal Singers, ang premiere choir sa nasod, misaka sa entablado niadtong Disyembre 20 ug nakapadani pinaagi sa ilang mga pagkanta sa mga klasiko sa Pasko sama sa “O Holy Night” ug “Have Yourself a Merry Christmas,” ingon man usa ka medley sa Pilipino nga mga klasika sama sa “Pasko Nanaman,” “Noche Buena,” ug “Pasko ng Madla.”

Ang makapahingangha nga pasundayag mao ang gabii uban sa “Asia’s Nightingale” nga si Lani Misalucha ug mga higala niadtong Disyembre 21. Si Lani giubanan sa mga artista nga mga Santos sa Ulahing mga adlaw, Tawag ng Tanghalan season 2 finalist nga si Anton Antenorcruz, ang mga artista sa “Hear Him through Music” nga gipangulohan ni Daday Ducena-Baluyot, ug ang Southern Luzon Regional Choir. Si Lani mahigugmaon nga mihandom kon giunsa niya pagpasundayag kaniadto uban ang choir atol sa Christmas Lighting Programs didto sa Manila Temple grounds kapin na sa duha ka dekada ang milabay. “Mapasalamaton kaayo ko nga mibalik pag-usab og pasundayag alang sa Simbahan,” kahilakon siya.

Si Yandell Villacorte, usa ka pastor gikan sa Gates of Praise Taytay, nagpahayag sa sinsero nga pasalamat nga nakatambong sa konsiyerto. “Isip usa ka mahiligon sa musika, ug isig ka Kristiyano, nalingaw kaayo ko sa konsiyerto, ilabi na sa dihang si Lani ug Anton mikanta sa ‘The Prayer,’” matod pa niya. “Nabati gayod nako ang espiritu sa Ginoo.”

Sulagma lang, ang musika sa Pasko sa Pilipino mibuntog usab sa tibuok kalibotan nga eksena sa Simbahan sa dihang ang Broadway star ug Disney royalty nga si Lea Salonga mao ang gi-feature nga guest artist sa 2022 nga mga konsiyerto sa Pasko sa The Tabernacle Choir and Orchestra at Temple Square gikan sa Disyembre 15-17. Sa wala pa niana, ang Temple Square Christmas nga kasaulogan nga “The Promise of Christmas” nga gi-premiere niadtong Nobiyembre 26 nag-feature sa “Liwanag Niya,” ang opisyal nga awit nga tema sa Dan-agi ang Kalibotan sa Pilipinas nga sinulat sa tandem nga managtiayon nga sila si Justin ug Daday Baluyot.

“Ang pag-shoot sa music video usa ka nindot nga kasinatian, apan ang pagpasundayag sa kanta nga buhi uban sa Southern Luzon Regional Choir ug pagpakigbahin sa entablado uban sa akong idolo nga si Lani Misalucha usa ka hingpit nga damgo nga natuman,” si Daday malipayon nga mipaambit.

Sa iyang panapos nga pakigpulong, si Elder Yoon Hwan Choi, Unang Magtatambag sa Kapangulohan sa Area sa Pilipinas, nahingangha sa propesyonal nga lebel sa mga talento nga iyang nasaksihan. Gidayeg usab niya ang pagkamahinatagon sa mga Pilipino, gikan sa mga tigpasundayag nga mihatag sa ilang panahon ug mga talento ngadto sa 7,420 ka mga sundalo nga nagserbisyo sa gubat sa Korea. Siya mikutlo ni Presidente Thomas S. Monson nga miingon, “Siya nga naghatag og kwarta naghatag og daghan; siya nga nagahatag ug panahon nagahatag ug labaw pa; apan siya nga naghatag sa iyang kaugalingon naghatag sa tanan.” ug gitapos pinaagi sa paghagit sa tanan sa Pagdan-ag sa Kalibotan pinaagi sa paghatag sa ilang kaugalingon.