Welkam long Namba Ia

Wan Ples blong Haed long Strong Win

Foto i kam long Getty Images

?I bin hapen finis long yu blong haed andanit long wan selta taem win mo ren i kam strong? Taem wota i stap kam daon, i faerap strong long ruf mo katemaot ol nara noes. ?Olsem wanem nao bae yu save stap drae long medel blong wan strong win mo ren? Paoa blong Sevya mo Hem i stap i olsem wan selta blong yumi

Namba blong Liahona ia i fokas long olsem wanem Jisas Kraes i karem pis i kam long strong win blong laef. Yumi no save haed aot long ol hadtaem mo ol jalenj. Olsem selta i kipim yumi drae from ren, taem yumi invaetem Jisas Kraes blong kam wetem yumi long wokbaot blong yumi, hem i helpem yumi faenem pis long taem blong strong win. Mi invaetem yufala blong ridim atikol we i kam long Elda Dieter F. Uchtdorf “Mi Mi Putum Pis blong Mi I Stap Wetem Yufala” (pej 4). Hem i tijim, “Jisas Kraes, we i kontrolem ol samting, i save mekem ol hadtaem blong yumi i kam isi” mo “pis i no nid blong kamaot long hat blong yumi, nomata sapos i nid blong yumi safa, bigfala sore, mo trastem Hae God.”

Mi bin eksperiensem “ol strong win” tu long laef blong mi. Ol hadtaem ia oli bin tijim mi se Jisas Kraes i tru man ia nomo we i stap oltaem blong yumi save fanem help mo pis long Hem. Olsem we mi serem long atikol blong mi ia “Paoa blong Leftemap” (pej 40), Sevya blong yumi i save mo bae i kam wetem yumi long wokbaot blong yumi blong go hom. Hem i stap wetem yumi taem yumi wet long ol blesing we oli promesem yumi from. Mo i neva let blong Hem i leftemap yumi. Hem i lavem yu. Mi prea se bae yu letem Hem i stap olsem selta blong yu mo ples we yu save haed long hem nomata wanem yu fesem.

Wetem lav,

Bonnie H. Cordon

Yang Woman Jeneral Presiden