“Folem Eksampol blong Kraes: Stap Kea long Olgeta We Oli Stap long Nid,” Liahona, Maj. 2023.
Folem Eksampol blong Kraes: Stap Kea long Olgeta We Oli Stap long Nid
Stat long ples blong mekem kaekae, i go long ples we i gat nid long hem, i go long wok blong givhan, i gat plante wei blong soem lav long neba blong mifala.
Bae Mi Biliv, i kam long Liz Lemon Swindle, yu no save mekem kopi blong art wok ia
Olsem ol man blong folem Jisas Kraes, ol memba blong Jos Ia blong Jisas Kraes blong Ol Lata-dei Sent oli wok had blong laef folem tu(2) hae loa ia: blong lavem God mo blong lavem neba blong yumi (luk long Matiu 22:37–39). Blong stap folem tufala bigfala loa ia mo eksampol blong Jisas Kraes i wanem we i lidim ol memba blong stap kea long olgeta we oli stap long nid.
?So olsem wanem nao Jos i help blong tekem kea long olgeta we oli gat nid? ?Mo olsem wanem nao yumi save tekem pat long bigfala wok ia?
Ol Wei blong Help
Olsem ol memba blong Jos, mifala i traem blong faenem olgeta we oli stap long nid mo givim help long evri pikinini blong God i nomata long wanem kala blong skin blong olgeta, wanem kaontri, o relijin.
Mifala i tekem kea long olgeta we oli stap long nid long plante wei, i tekem tu:
-
Fasin blong lego kaekae mo yus blong ol fas ofring.
-
Mekem wok blong givhan long wanwan long yumi.
-
Ol program blong indipenden laef.
-
Kaekae raon long wol, edukesen, klin wota, mo ol helt kea program.
-
Ansa long imejensi.
-
Ol volontia projek long komuniti.
Sam long ol wok blong yumaniterian oli kam long bigfala kwanteti, be ol smol wok taem yumi tekem i kam tugeta oli save gat bigfala paoa Hemia samfala eksampol blong olsem wanem ol memba blong Jos oli helpem olgeta we oli stap long nid.
Long stat blong Febwari long 2022, ol Lata-dei Sent long Polan oli helpem ol rifuji wetem transpot, kaekae, mo selta.
Wok blong givhan long medel blong faet
RaeAnn mo Sterling Jarvis—Ol Jos memba long Woso, Polan oli no save wanem bae i hapen taem oli jusum blong karem ol rifuji i kam long hom blong olgeta. Be oli wiling blong help long eni wei we oli save mekem.
I no longtaem afta we faet i stat long Yurop, wan famli blong Yukren we olgeta faev insaed, oli kam kasem doa blong olgeta long 1 oklok long moning. Oli bin travel kolosap 500 mael (800 km) blong save faenem ples blong stap sef long hem. Ol famli Jarvis oli welkamem Maryna mo Serhii Bovt mo trifala pikinini long hom blong olgeta. Taem i pas, oli developem wan ril lav mo wari we oli gat long famli Bovt. “Taem yu serem lav, lav i gro,” Maryna i talem folem eksampol blong seves we famli Jarvis oli givim long olgeta. “I mekem yumi kam moa kolosap long yumi mo long Lod.”
Olsem ol memba blong Jos, yumi wok had blong folem eksampol blong Sevya tru long wok blong givhan long olgeta we oli stap raon long yumi. Pipol i no nid blong ronwe long faet o raorao nomo blong oli nidim help. Evri fasin blong stap kaen long rod blong yumi—i nomata i smol olsem wanem—i save tajem laef blong wan man blong oltaem.
Komuniti We I Stap Serem Samting
Long Laie Hawaii Crops Farm we Jos i onem, i gat moa long 310 famli we oli wok long fam ia blong sapotem famli blong olgeta. Long ol plot blong graon blong olgeta we i 5,059 skwea meta, ol famli ia oli planem taro, maniok, Kumala, bred frut, kova, mo ol nara aelan kaekae.
Fam ia, wan kapol misinari nao i manejem mo kasem sapot long ol nara misinari mo ol memba. Ol volontia oli help kliarem graon, mekem rere graon blong plan, mo oli tijim ol stamba skil blong wok long wan fam.
From ol misinari ia, ol memba, ol volontia, plante pipol we oli nidim kaekae long Hawae oli save gat sapot ia blong famli blong olgeta taem wok i no gat. Komuniti i kam moa strong taem ol pipol oli wok tugeta blong tekem kea long fam mo serem wanem oli planem.
Ol yumaniterian projek blong Jos oli help blong givim sekiuriti long saed blong kaekae, edukesen, klin wota, mo helt kea seves blong plante milien pipol raon long wol. Jos i givim plante risos tu blong mekem i kam bigwan indipenden laef, ol bisop stoahaos, ol ofis blong faenem wok, ol stoa blong Deseret Industries, Famili Seves counseling, ol kos blong indipenden laef, mo ol graon blong fam mo ol plant blong frut we i blong Jos, olsem blong Laie Hawaii Crops Farm. Ol memba mo ol misinari oli oltaem sapotem ol projek ia, oli givim taem, ol talen, mo ol nara risos we i mekem bigfala jenis long laef blong olgeta we oli stap long nid.
Wan Fasin blong Stap Olsem Fren
Long 2021, abaot 200 memba blong Jos oli ansarem wan kol blong help. Oli go stap long senta long Jemeni, long Yunaeted Stet, mo long ol nara ples blong help mekem wok blong kolosap 55,000 rifuji we oli kam long Afganistan.
Plante long ol volontia oli givim seves long ol ples ia blong tu(2) o tri wik, mo sam oli stap longtaem moa. Ol memba blong Jos oli mitim nid blong olgeta we oli lukaotem tru long fasin blong givim kaekae, ol klos, mo ol nara saplae.
Ol Rilif Sosaeti sista long Jemani oli bin luk se sam long ol woman blong Afganistan oli stap yusum ol set blong ol hasban blong olgeta blong kavremap hed blong olgeta from se oli bin karemaot ol kastom kaliko blong werem long hed, from plante muvmuv mo fasfas olbaot long eapot. Ol sista ia blong Rilif Sosaeti oli kam tugeta mo somap ol kastom kaliko blong ol woman ia we oli nidim—soem fasin blong stap kaen mo respek long narawan mo putum ol defren bilif blong olgeta long saed.
Sista Sharon Eubank, daerekta blong Lata-dei Sent Jariti, i talem, “Ol hadwok blong yumi wanwan i no nidim mane o blong yumi go longwe; i nidim Tabu Spirit blong lidim yumi, mo wan hat we i wantem blong mekem samting, mo talem long Lod: “Mi hemia, sendem mi’ [Aesea 6:8].”1
Strong tingting ia blong givim seves taem ol disasta oli straek hem i from wanem Jos i oltaem wan long ol fas grup blong ansa—tugeta wetem rilif we i blong sot taem mo help we i blong longtaem. Wok blong ol memba mo ol misinari blong Jos i blong helpem olgeta we oli stap long nid blong filim se oli stap sef, oli kasem kea long saed blong bodi mo long saed blong tingting, mo filim lav blong God tru long fasin blong stap kaen long ol narawan.
Wea Nao Olgeta Naen Ia? i kam long Liz Lemon Swindle, yu no save mekem kopi long hem
Oli Singaotem long Wok ia
Doktrin mo Ol Kavenan 4:3 i talem, “From hemia, sapos yufala i wantem blong wok blong God, nao God i singaotem yufala long wok.” Wetem evri samting we Jos i mekem, i gat plante wei blong givim seves.
Plante long ol wok we oli oganaesem blong helpem olgeta we oli stap long nid i kam tru nomo long seves we ol misinari mo ol memba oli givim. I no Evriwan oli save kasem wan rifuji famli lon hom blong olgeta, givim wanem we ol narawan oli nidim long saed blong bodi, o lego evri samting i stap blong save help long taem blong wan disasta. Be evriwan i gat pat blong plei long hem, mo evri kontribusen blong wanwan man o woman oli kasem mo respektem.
Wan long ol impoten wei ol memba oli givim long wok ia hem i tru long fas ofring mo ol donesen blong yumaniterian. Ol tabu donesen ia oli yusum blong helpem olgeta we oli rili stap long nid mo mekem wan jenis long laef blong olgeta we oli kasem help ia. Ol memba blong Jos oli save go givim seves olsem ol yumaniterian misinari, stap olsem fasiliteta blong ol kos blong indipenden laef, mo wok olsem ol volontia long bisop stoahaos mo long stoa blong Deseret Industries. Yu save tekem kea long olgeta we oli stap long nid tru long lokol seves, donetem blad, ol wok blong givhan, prea, mo plante moa.
Yumi evriwan oli singaotem yumi long wok ia. Oli singaotem yumi blong folem eksampol blong Jisas Kraes mo lavem God mo neba blong yumi. Wanem yumi nidim i wan wiling hat.