Ol Eksampol blong Fet

Yu Bin Save Oltaem I Kam

I kam long José G. Franco, Yuta, USA

Mi bin kasem testemoni blong mi blong gospel ia we i bin kambak, be mi gat 10 manis i stap yet long kontrak blong mi olsem wan minista blong wan nara jos.

Foto i kam long Leslie Nilsson.

Taem mi gat 9 yia, tut blong mi i soa bigwan. Mi no moa save holemtaet soa ia, be mifala i no gat mane blong go long hospital. Long taem ia, mi bin stap wetem enjel bubu woman blong mi long Meksiko.

Wetem wota blong ae i ron, hem i askem mi, “?Yu bilif long Jisas mo Hem i save helpem yu?”

Mi talem long hem, yes mi bilif. Hem i askem mi blong go long nara rum, nildaon, mo prea from wan merikel. Mi bin kapsaetem hat blong mi long prea, be nogat wan samting i hapen. No save wanem blong mekem, mi putum moa presa long tut blong mi mo mekem namba tu prea. !I no longtaem soa ia i lus! Taem mi ron i go blong talem long bubu woman, mi faenem hem i nildaon, stap prea long God blong helpem smol apu boe blong hem. Mi neva fogetem taem ia, mo mi glad tumas from bubu woman blong mi.

Ol nara eksperiens long saed blong spirit i folem.

Taem mi kasem 14 yia, mi muv i go long Teksas, USA, blong joenem papa mo mama wetem ol brata mo sista blong mi. Mi faenem wan lokol jos mo mi stat blong atendem oltaem nomo. From eksperiens we mi gat wetem God, mi wantem blong serem nem blong Hem mo gospel blong Hem wetem evriwan we bae i harem mi. Taem mi gat 15 yia, mi enrol long ministri skul blong kam wan minista. Blong tu (2) yia, mi atendem Baebol klas bifo skul, afta skul, mo long ol wiken.

Wan moning long hae skul, mi harem noes long loka rum blong ol boe. “Yu Momon!” wan i singaot strong. Mi neva harem toktok ia bifo, be i saon olsem wan rabis toktok.

Long wan nara taem mi faenemaot se man we oli singaot long hem i wan gud fren blong mi Derek.

“Mi sore oli singaotem yu wan Momon,” mi talem.

Derek i smael mo askem, “?Yu no save wanem ia wan Momon, ?”

Hem i talem long mi se i niknem blong ol memba blong Jos Ia blong Jisas Kraes blong Ol Lata-dei Sent.

“?So, yu wan Kristin Man?” Mi askem.

Taem hem i talem yes, mi hapi blong save se mitufala i serem fet long Jisas Kraes.

“?Yu bin askem God?”

“?Huia ol Momon,” mi tingting, “mo wanem oli bilif long hem?”

Mi go long intanet blong faenemaot. Afta long sam minit, mi bin disaed se fren blong mi i no wan Kristin Man mo we bae hem i go long hel. So, mi mekem wanem mi save mekem blong talemaot trutok long hem.

Blong nekis tu(2) yia, mi ridim evri buk we mi save faenem abaot Jos, mo hemia i tekem tu Buk blong Momon—mi ridim flatem tu(2) taem. Mi mitim Derek tu mo ol fultaem misinari mo traem blong helpem olgeta.

Taem mi kasem 17 yia, mi graduet long ministri skul, oli odenem wan minista, mo kam wan pasta blong wan smol kongregesen long Teksas. Tu(2) manis i pas afta long odinesen blong mi, mi gat wan nara diskasen wetem ol misinari.

Wan long olgeta i askem, “?Yu bin ridim Buk blong Momon, mo yu tekem evri lesen we mifala i save givim, be yu bin askem God sapos ol mesej blong mifala i tru? Yu save harem save ansa we bae i kam long Hem, ?i stret?”

“Be yes,” mi ansa wetem hae tingting.

“Long wei we mi mi luk, i wan win win situesen blong yu,” misinari i ansa. “Sapos yu askem God sapos wanem fren blong yu biliv long hem i tru mo God i talem no, bae yu winim misin blong yu we yu bin statem wokbaot ia from. Be sapos Hem i se mesej blong mifala i tru, nao, yu tingbaot hamas save bae yu kasem.”

Mi neva tingting long hem olsem. Long naet ia mi nildaon long rum blong mi afta we mi bin ridim Moronae 10:3–5. Ansa blong mi we i kam long God i bin simpol mo i gat paoa. Long wan smol voes we i kwaet, Hem i ansarem mi: “Yu bin save oltaem i kam.”

Wan Niu Japta long Laef blong Mi Olsem Wan Disaepol

Naoia we mi gat wan testemoni blong gospel we i kambak, ?olsem wanem long ministri blong mi? Mi gat 10 manis i stap yet long kontrak blong mi olsem wan minista. Afta long plante prea mo toktok wetem God, Mi disaed blong finisim seves blong mi. Blong nekis 10 manis we i stap, mi gohed blong serem ol trutok we i stap long Baebol we mifala i stap yusum, be taem mi gat janis mi ademap save long saed blong gospel we i kambak. Ol pipol oli tingting long ol trutok ia, mo smol grup blong mi ia oli gro long 20 go kasem kolosap long 150.

Afta we mi komplitim kontrak blong mi, oli givim long mi wan posisen blong stap, be mi save se hem i taem blong mi baptaes long Jos. Hem i taem blong mi statem wan niu japta long wokbaot blong mi olsem wan disaepol.

Taem mi talem long ol memba blong famli blong mi, oli no hapi—long fastaem. Be tri manis i pas afta we mi joenem Jos, mi bin baptaesem mama blong mi mo tu long ol brata mo sista blong mi. Afta long ful taem misin blong mi long Oklahoma Oklahoma Siti Mission, mi baptaesem yangfala sista blong mi.

Sapos wan i askem mi from wanem mi jenisim rilijen blong mi, mi ansa oltaem, “mi no jenisim rilijen blong mi—mi stap yet olsem wan strong Kristin Man. Be, mi mekem rilesensip blong mi nomo wetem Sevya i kam moa strong blong kasem baptaes mo kam wan memba blong Jos blong Hem—Jos Ia blong Jisas Kraes blong Ol Lata-dei Sent. Mi kam blong save Hem gud moa long laef blong miwan naoia bitim bifo from Kambak blong gospel, Buk blong Momon, ol profet blong tedei, mo ol tabu odinens blong fasin blong sevem man mo fasin blong kam olsem wan god we i gat i stap long tempol.”

Tedei mi gat janis ia blong wok olsem wan fultaem seminari tija. Mi stap dediketem laef blong long Jisas Kraes yet mo gospel blong Hem. Mi stap gohed yet blong talem long eniwan we i wantem blong lisin long “gud nius we i save mekem olgeta man oli harem gud tumas” (Luk 2:10).