“Help mo Hop we I Kam long Jeneral Konfrens,” Liahona, Maj. 2023.
Ol Voes blong Ol Lata–dei Sent
Help mo Hop we I Kam long Jeneral Konfrens
Mi neva tingting blong harem wan ful toktok long jeneral konfrens we i tokbaot stret wanem we mi stap eksperiensem.
Foto blong man we i raet mo famli blong hem i kam long Cody Bell
Afta we fas bebi blong mi i bon, mi stap safa from pen mo taet blong hem. I wan gudfala taem long laef blong mi from mi gat wan pikinini boe, be mi no save eksperiensem ful glad ia blong save gat wan bebi from mi draon long wari.
Long taem blong tes ia, mi prea fulap long Papa long Heven. Mi askem Hem blong helpem mi blong go tru long hadtaem ia. Wetem Jeneral Konfrens we i stap kam long taem ia, mi stap prea tu se bae mi faenem kamfot long ol toktok we bae i kamaot long ol lida blong Jos.
Taem mi stap lisin long ol toktok blong fas sesen blong jeneral konfrens, mi stat blong filim kamfot. Afta, long taem blong seken sesen, Elda Jeffrey R. Holland blong Kworom blong Olgeta Twelef Aposol i tokbaot draon long wari. Hem i se blong draon long wari i save mekem yumi filim “olsem se oli sakemaot yumi finis”1 (Ol Sam 31:12). Mi neva tingting blong harem wan ful toktok we i tokbaot stret wanem mi stap eksperiensem.
Hemia i wan spesel taem blong mi. Toktok ia i helpem mi mi save se Papa long Heven i lavem mi mo we Hem i save long mi. Hem i save wanem mi stap go tru long hem. Hem i wantem blong helpem mi mo givim hop long mi. Hem i mekem hemia tru long toktok blong Elda Holland.