“Paoa blong Leftemap,” Liahona, Maj. 2023.
Ol Merikel blong Jisas
Paoa blong Leftemap
Yumi save helpem mo leftemap olgeta we oli stap wet long Sevya i mekem olgeta i go fri.
Lus long wan gem. Bakegen. Mi sakem mi i go long jea blong mi mo hangem hed blong mi i go daon. Mi stap olsem wan blong lukluk nomo, be yet mi nogat paoa blong stanap. Tim blong mifala i traehad tumas. Sam oli kasem kil. Sam oli wokbaot nogud kamaot long fil. Afta we hae skul soka tim blong mifala i lusum ol gem wan afta narawan, mifala i no filim nomo se oli winim mifala—ol hat blong mifala i bin brok bigwan.
Long taem we harem nogud blong mi i stap stat blong kam moa bigwan, wan long ol gel we i moa yang i wokbaot i kam pas. Lukluk long fes blong hem i soemaot long mi wanem bae hem i mekem.
Mi wajem long evri smol step hem i mekem, i givim wan han long wanwan gel, be i no blong tokbaot lus. Hem i givim long wanwan long ol gel ia ol naes toktok, i kamfotem olgeta, mo soem lav mo sore. Mi neva luk yu ron strong blong save kasem evri pas. Hem i bin wan gudfala gem.” Mo long narawan, “Waow, gudfala gem. Mi talem tru, yu plei gud tedei!”
Long evri hae faev we i mekem, wan han blong hem i stap wetem blong olgeta, nara han blong hem i stap long wan solda o i rabem slo wan leg we i kasem kil mo mak blong gras. Mi save filim se hem i stap karem wan samting insaed long hem, wan paoa we mi no save olsem wanem, i pas tru long hem i go long wanwan hat blong ol tim memba. Ol smael i stap blong brebrekem ol soa bodi mo harem nogud. Sloslo, wan afta narawan, evriwan long tim oli stanap wetem wan filing we i niu long ples we mifala i stap.
?Huia i kea long ol kil ia mo harem nogud? ?Huia i kea long kros mo rigret? I no gat wan. ?Be olsem wanem nao wan han we i simpol nomo yet i gat paoa ia blong leftemap wan aot long wan ples blong safaring i go long ples we i gat hop mo paoa?
Letem mi serem sam samting we mi bin lanem abaot paoa blong Sevya blong leftemap mo olsem wanem yumi save help, olsem fren long soka tim.
Long Niu Testeman, yumi rid abaot storian ia blong gel blong Jaeras.
“Nao wan lida long haos blong prea blong ol laen* blong Isrel*, nem blong hem Jaeras, hem i kamtru. Mo taem hem i luk Jisas, hem i kam nildaon long fes blong hem,
“I krae long hem se, “Smol gel blong mi i sik tumas, klosap i ded. Plis yu kam putum han blong yu long hem blong mekem hem i kam gud bakegen.
“Nao Jisas i biaen long man ya, tufala i go” (Mak 5:22–24).
“Nao Jisas i biaen long man ya, tufala i go”
Mi laekem laen ia “Jisas i biaen long man ya, tufala i go” (Mark 5:24). Merikel i no bin hapen yet. Wanem i hapen, i we, wanem ol famli oli stap wantem tumas blong i tekem ples long wan long famli blong olgeta, bae i kam let smol. Be Kraes i stap wetem olgeta finis long wokbaot blong olgeta.
Taem yumi nidim wanem we yumi no save mekem blong yumiwan, yumi save trastem se Jisas i stap kam. Mo yumi save trastem se taem yumi wet wetem fet long merikel blong Hem long laef blong yumi o long laef blong ol lav wan blong yumi, Hem bae i wokbaot wetem yumi. Bae Hem i wokbaot wetem yumi kasem evri ples we bae yumi go, tru long ol wari mo fraet mo sore we i stap wet long yumi long rod we bae i lid i go long fasin blong sevem man.
“Kam putum han blong yu long hem”
Yumi no save givim hiling, be olsem Jaeras, yumi save karem Jisas Kraes i kam, Masta blong hiling, long olgeta we yumi lavem. Jaeras i save se ol han blong Sevya i save leftemap samwan we i stap long ples blong safaring i go long long ples blong hop mo paoa.
Mi lukim laet ia i tekem ples long soka tim blong mifala. Gel ia i stap serem laet blong Kraes long wan soka fil mo letem Hem i mekem hiling blong Hem. Tru long fasin ia blong leftemap laet blong Hem, hem i help blong karem Isrel i kam tugeta.
Wanwan long yumi i nidim blong wan narawan i helpem hem blong i sev, be yumiwan i no save mekem. Nomata long situesen we yumi stap long hem, yumi save trastem se Papa long Heven i givim wan Sevya we i save help blong leftemap yumi aot long ples we i no gat hop long hem. Mo yumi save tekempat wetem Hem olsem we soka hiro blong mi i bin mekem.
?Be olsem wanem sapos ol samting i kam mowas taem yu stap wet long blesing blong Hem blong kam?
“I gud yu talem long Tija ia blong Hem i nomo kam”
Taem Kraes i stap long rod blong Hem blong go long haos blong Jaeras , Hem i let smol. Rod i gat fulap man, mo taem Hem i traem blong mekem wei blong Hem i go tru, wan woman blong bigfala fet, we i wet long hiling han blong Hem tu, i tajem ol klos blong Hem.
“Sipos mi save tajem klos blong hem nomo, bambae sik blong mi i finis ya.
“Taem hem i tajem, wantaem nomo blad blong hem i no moa ron, mo hem i save we sik blong hem i finis.” (Mak 5:28–29).
?Wanem filing blong Jairus? ?Yu ting se Jaeras i filim olsem wanem long ol stop stop long rod blong olgeta? Taem hem i lego haos blong hem Gel blong hem i stap finis long poen blong ded. Long taem ia, taem Sevya i stap lukaotem woman ia we i hilim hem mo stap toktok long hem, wan man we i aot long haos blong Jaeras i kamtru wetem wan nius we i nogud: “Smol gel blong yu i lus finis: I gud yu talem long Tija ia blong Hem i nomo kam.” (Mak 5:35).
!I bin wan bigfala blesing blong woman ia we i bin wet blong longtaem! !Be long Jaeras wetem famli i wan bigfala lus mo harem nogud, we oli no gat evri taem ia blong stap wet! Samtaem taem yumi stap wet, i save hapen se bae i had blong holem taet hop ia se Hem i stap kam. Be blong Jaeras mo famli blong hem, naoia i let blong hop long merikel we oli nidim. Smol gel blong hem i ded. I gud yu talem long tija ia blong Hem i nomo kam.
?From wanem? From bae yumi no save stopem ol merikel blong Sevya. Ded laen blong yumi i no save stopem Hem, o save blong yumi long wanem we i posibol i no save stopem paoa blong Hem.
Sapos yumi luk wetem ae blong fet taem yumi stap wet, bae yumi luk hop se paoa blong Hem blong hiling i stap kam (luk Alma 58:11). Ol hop ia oli save jenisim ol hat blong yumi mo konfemem fet blong yumi long Hem. Nomata sapos i luk olsem janis i pas finis, Hem bae i kam yet; bambae taem blong yu bae i kam.
Gel blong Jaeras I Girap Bakegen, i kam long Gabriel Max / Peter Horree / Alamy Stock Photo
“Yu no harem nogud, yu bilif long mi nomo”
Taem we Jisas i harem nogud nius ia, Hem i talem long Jaeras, “Yu no harem nogud, yu bilif long mi nomo” (Mak 5:36). Ol toktok blong Sevya i go long Jaeras i soem long yumi hamas Hem i save long yumi, se yumi stap wet. Ministri blong Hem i no save stop, no mata sapos yumi stop. Kwiktaem Hem i askem long Jaeras blong go fored wetem fet.
“?From wanem yufala i stap mekem bigfala noes ya? ?From wanem yufala i stap krae olsem? Gel ya i no ded ya. Hem i stap slip nomo. …
“Nao hem i holem han blong gel ya, i talem long hem se, “Talita kum,” we i min se “Smol gel. Yu stanap” (Mak 5:39, 41).
?YU kasem wanem i stap ia? “Hem i holem hanblong gel ia.” I gat paoa long ol han blong Hem. Presiden Howard W. Hunter (1907–95) i bin talem long wan taem, “Eni samting we Jisas i tajem wetem ol han blong Hem, oli laef.”1 ?Wanem yumi save mekem blong save kasem ol hiling han blong Hem? ?Mo olsem wanem yumi save stap olsem ol han blong Hem blong save leftemap olgeta we oli stap harem nogud mo olgeta we oli nogat hop?
“Nao wantaem nomo, gel ya i stanap, i wokbaot”
Kwiktaem nomo laef i kambak long gel blong Jaeras: “Nao wantaem nomo, gel ya i stanap, i wokbaot” (Mak 5:42). Long laef ia bae i gat ol taem we bae yumi mas girap aot long ol hadtaem blong yumi. Blong wanwan long yumi, ol hadtaem ia oli no semmak long evriwan oli defren smol—sam long yumi oli lus long wan gem long fil, sam oli lusum wan lav wan. Safaring bae i kam. Be Hem bae i neva lego yumi, i no mata hamas safaring ia i bigwan o i nogud. Samtaem, Hem i letem yumi wokbaot i go long ded o ol ples we i nogud blong mekem se Hem i save givim ol han blong Hem ia mo fulumap ol ples ia wetem laef.
Wetem saen blong Atonmen blong Hem—mak blong nil long wanwan han blong Hem—Hem i soem long yumi yumi Ministri blong Hem: “Luk, mi bin raetem yu long insaedhan blong han blong mi” (1 Nifae 21:16). Ministri blong Kraes bae i oltaem, stap, mo bae i oltaem kam yet, blong leftemap wan ded we yumi no save ronwe long hem, nomata long bodi o long spirit, mo evri samting ia oli tekem ples from atonmen blong Hem we i pemaot praes.
Taem ol hat i brok mo ol hadtaem oli kamkamaot, yumi save luk long ol han ia we oli karem mak blong nil long tugeta insaedhan we i no gat fasin blong kaen mo lav nomo be i gat paoa blong save win. Taem yumi eksasaesem fet long Hem, bae Hem i putumbak evri samting we yumi fesem long stret ples blong hem.
Mo bae yumi save mekem wanem we sapos Hem i stap ia bae Hem i mekem.
Mi testifae se yumi evriwan i save kamaot long ol samting we yumi no strong long hem mo hemia bae i go kasem ol gref blong yumi. Tingbaot, taem yu filim se evri samting i lus, Hem i stap ia mo givimaot han blong Hem blong givim laef. Tingting long glad we bae yu kasem taem Hem i holem han blong yu mo talem, “Mi talem long yu, yu stanap.” Mo bae yumi stanap