“Evri Samting Bae I Oraet,” Liahona, Maj. 2023.
Ol Voes blong Ol Lata–dei Sent
Evri Samting Bae I Oraet
I luk olsem ol aoa i stap go nomo i no gat en kasem taem wan long ol dokta i kam toktok long mama blong mi long rum blong stap wet.
Foto blong Russell M. Nelson i kam long Eldon K. Linschoten
Eli long ol 1980, papa blong mi, we i safa long wan nogud sik blong hat, i go tru long wan hat operesen we mifala i hop se bae i mekem laef blong hem bae i longfala smol moa.
Long taem ia, wok blong ol dokta blong hat operesen i niu long Yurugwe. Ol dokta oli riplesem wan pat blong hat we oli singaotem aotik valv wetem wan we man nomo i mekem. Taem i pas, ples blong hat operesen ia i tekem plante man mo i sevem plante laef.
From operesen ia i stap jenis plante taem mo i wan niuwan, mekem se plante long olgeta we oli tekem stadi long hat oli atendem mo luk operesen ia. Taem ol dokta oli stap operet, mama blong mi i stap sidaon wetem wari long rum blong stap wet Ol aoa i stap go nomo i no gat en.
Mifala i glad taem mifala lanem se operesen ia i finis mo i gat sakses. Taem oli stap glad from operesen ia long operesen rum wan dokta i aot long olgeta mo go long rum blong stap wet. Hem i wan dokta we i visit we i kam long Yurugwe blong supavaesem operesen.
Hem i toktok long mama blong mi, i stop, mo tajem solda blong hem blong kamfotem hem. Afta, i luk stret long ol ae blong hem, i talem, “Evri samting bae i oraet.”
Dokta ia i talem i stret. Papa blong mi i laef blong narafala 24 yia, i givim seves long Lod wetem ful hat blong hem—naoia i helti—kasem las dei blong laef blong hem.
Long taem blong jeneral konfrens we i jes pas, mama blong mi i tingbaot bakegen spesel visit ia we i bin hapen plante yia i pas. Evri taem, taem—Presiden Russell M. Nelson—i toktok long ol Sent, mama blong mi bae i tingbaot taem ia we dokta ia i kam visit.
Evri profet blong Lod oli spesel long yumi long sam wei. Sam oli spesel from oli givim seves olsem Presiden blong Jos taem yumi yang. Sam oli spesel from oli givim seves olsem presiden taem yumi kasem baptaes. Blong mi mo mama blong mi, Presiden Nelson i spesel from hem i save se evri wok long saed blong medikol i no tajem sikman nomo be i tajem ol lav wan blong sikman ia tu. Hem i save se ol memba blong famli oli nidim ol toktok blong leftemap tingting, paoa, mo kamfot taem helt blong wan lav wan i stap long denja.
Bae mifala i glad oltaem long Presiden Nelson mo ol toktok blong kamfot long taem finis long Yurugwe mo from laef blong hem we i givim long seves blong Papa long Heven mo tu long ol pikinini blong Hem.