Ol Stamba Toktok blong Gospel

Ol Prishud Blesing

Kraes I Odenem Olgeta Twelef Aposol, i kam long Harry Anderson

Wan prishud blesing oli givim tru long insperesen we i kam long wan we i holem Melkesedek Prishud. Ol Prishud blesing i stap blong mekem ol pikinini blong God blong oli kasem paoa blong Hem, hiling, kamfot, mo lidim laef blong olgeta.

Prishud

Prishud i paoa mo atoriti blong God. Ol man we oli klin inaf mo holem Melkesedek Prishud oli mekem wok long nem blong Jisas Kraes taem oli givim prishud blesing. Taem oli givim ol blesing ia, oli folem eksampol blong Sevya blong blesem ol narawan.

Foto i kam long David Winters

Oli Givim Blesing Olsem Wanem

Oli givim prishud blesing tru long fasin blong putum han antap long hed. Wan we i holem Melkesedek Prishud i putum han blong hem antap long hed blong man we i kasem blesing. Afta hem i givim blesing olsem we Spirit i lidim hem. Olgeta we oli givim blesing mo olgeta we oli kasem ol blesing oli eksasaesem fet blong olgeta long God mo gat tras long wil mo taem blong Hem.

Stap Givim Ol Nem mo Blesing long Ol Pikinini

Afta we wan pikinini i bon, wan we i holem prishud i givim long hem wan nem mo wan blesing (luk long Doktrin mo Ol Kavenan 20:70). Hemia i hapen oltaem long wan fas mo testemoni miting. Faswan, hem we i holem prishud i givim long pikinini ia wan nem. Afta, hem we i holem prishud i givim long pikinini ia wan blesing`.

Ol Blesing blong Sik

Olgeta we oli holem Melkesedek Prishud oli save givim ol blesing long olgeta we oli sik. Blesing ia i gat tu(2) pat: anoenting wetem oel mo silim anoenting. Faswan, wan we i holem prishud i putum wan drop blong oliv oel we oli bin konsekretem, o blesem, long hed blong hem we i sik mo givim wan sot prea. Afta, narawan we i holem prishud i silim anoenting mo givim wan blesing long hem we i sik olsem we Tabu Spirit i lidim hem.

Stap Givim Ol Blesing blong Kamfot mo Kaonsel

Olgeta we oli holem Melkesedek Prishud, oli save givim tu ol blesing blong kamfot mo kaonsel long ol nara memba blong famli, mo tu, long ol narawan we oli askem. Wan papa we i holem Melkesedek Prishud, plante taem i save givim blesing blong wan papa i go long ol pikinini blong hem. Ol blesing ia oli save helpem ol pikinini taem oli stap fesem ol jalenj.

Stap Setem Apat Ol Memba blong Givim Seves long Ol Koling

Taem ol memba blong Jos oli kasem ol koling, oli givim long olgeta wan blesing taem oli setem olgeta apat blong givim seves. Wan prishud lida i blesem olgeta blong oli wok long koling ia. Prishud lida i givim long olgeta wan blesing blong helpem olgeta long seves blong olgeta.

Foto i kam long Shauna Stephenson

Ol Petriakel Blesing

Evri memba blong Jos we oli klin inaf oli save kasem wan petriakel blesing. Long blesing ia Lod i givim kaonsel long hem we i kasem blesing. I save lidim mo givim kamfot long laef blong hem we i kasem blesing ia. I talemaot laen tu blong man o woman ia insaed long haos blong Isrel. Wan petriak nomo we oli odenem hem i save givim kaen blesing ia.

I Kam long Ol Skripja

Jisas Kraes i blesem sikman tru long fasin ia blong putum ol han antap long hed (luk long Luke 4:40).

Olgeta we oli gat stret atoriti ia oli set apat ol memba we oli givim seves insaed long Jos (luk long Doktrin mo Ol Kavenan 42:11; Ol Toktok blong Bilif 1:5).

Pipol we oli sik oli save askem ol blesing long olgeta we oli holem prishud (luk long Jemes 5:14; Doktrin mo Ol Kavenan 42:44).

Ol Toktok blong Tingbaot

Fas mo testemoni miting: Wan sakramen miting i ples we ol memba blong kongregesen oli serem ol testemoni blong olgeta. Ol memba oli livim kaekae—oli no kakae mo dring long dei ia—olsem oltaem long fas Sandei blong manis.

Anoenting: Stap yusum oel we oli blesem finis olsem pat blong wan prishud blesing blong sikman.

Petriak: Wan we i holem prishud we oli odenem hem blong givim ol petriakel blesing long ol memba blong Jos long stek blong hem.

Faenemaot Moa

Sapos yu gat kwestin abaot ol prishud blesing, yu save toktok long ol givhan brata o sista blong yu, ol lida blong wod o branj blong yu, o ol misinari. Blong moa infomesen abaot wok blong ol prishud blesing, luk long japta 18 blong Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent long ChurchofJesusChrist.org.