“I Nomata We Yu Kam Moa Olfala, Bigfala Lav I Neva Sot,” Liahona, Maj. 2023.
Stap Kam Olfala long Wan Fetful Wei
I Nomata We Yu Kam Moa Olfala, Bigfala Lav I Neva Sot
Oli singaotem olgeta blong stap long Rilif Sosaeti presidensi long ol olfala yia blong olgeta, ol woman ia oli soemaot eksperiens mo andastaning long seves blong olgeta.
Foto i kam long Richard M. Romney
“Maet mifala i moa olfala bitim eni Rilif Sosaeti presidensi insaed long Jos,” Sharon Alexander i talem. Hem i jes kasem 89 yia blong hem. Mo tufala kaonsela blong hem Marlene Peterson 90, mo Dorothy Arnold 91.
“So, medel yia blong mifala hem i 90,” Dorothy i talem wetem laf.
Rilif Sosaeti presidensi ia i stap givim seves long wan branj long ples we ol olfala oli stap long hem long Ogden, Yuta, USA. Ples ia i hom blong ol olfala memba blong Jos, mo yu save luk presidensi ia oli stap lei oltaem long tul blong wokbaot blong olgeta i go long wan doa mo go long nara doa, talem halo long ol pipol mo jekem blong meksua sapos evri samting i oraet.
Long wan taem, pipol blong ol wod we oli stap kolosap long eria ia oli mekem wok blong givhan mo mekem ol visit. Afta stek presiden i kasem wan filing blong leftemap tingting blong branj presidensi blong askem Lod wanem long ol haos we i stap ia i save givim seves mo long wanem koling.
Tumas Blesing blong Talem No
“Taem branj presiden i givim koling ia long mi blong stap olsem Rilif Sosaeti presiden,” Sharon i talem, “tingting ia i kam long mi, Mi kasem tumas blesing blong talem no.” Afta, hem i kasem insperesen abaot huia nao bae i kam olsem ol kaonsela blong hem. “Marlene i kam long maen blong mi faswan,” hem i talem. “Mifala i bin wok tugeta long level blong stek, rere long ol nem blong tempol wok. Mi save hasban blong hem i bin ded i no longtaem, mo nomata we i stap traehad wetem hemia, mi save hem i fetful.”
Afta long wan sakramen miting, Sharon i lukluk raon long rum, lukaotem insperesen. “Mi luk Dorothy. Hem i smael long mi, mo mi save hem i wan nara kaonsela. Lod i lidim mi i go long tufala tugeta, mo Hem i no mekem wan mistek long wan long tufala.”
Olsem wan Bigfala Famli
Sharon i talem tu se hem i wan gudfala samting blong luk ol pipol we oli stap long sem ples ia blong oli givim seves long olgeta bakegen. “Mifala i stap kolosap moa long situesen,” hem i talem. “Mifala i andastan se samtaem mifala i no save mekem gud, samtaem mifala i foget tumas, mo samtaem mifala i filim gud nomo. Mo mifala i save olsem wanem blong laf long ol problem we mifala i fesem tugeta.”
“Pipol we i laef long ples ia oli stap olsem wan bigfala famli finis,” Marlene i talem. “Mifala i kakae ol kaekae blong mifala tugeta, so mifala i luk mifala wanwan tri taem long wan dei. Mo samtaem mifala i stap tugeta long ol aktiviti tu. So mi ting se stek presiden i kasem insperesen taem i filim se i gat pipol long ples ia we i save givim seves long olgeta wanwan.”
“Yumi save wanem i stap hapen dei afta dei. Mifala i save sapos wan i nidim help o sapos wan man i sik,” Dorothy i talem.
Antap long wok blong givhan mo helpem ol narawan blong givhan, ol memba blong presidensi oli oganaesem tijing blong Rilif Sosaeti. Oli givim nem blong olgeta we oli maet kolem olgeta blong tij, mo oli putum gud ol asaenmen ia mo arenjem olgeta folem nid blong ol tija ia.
Tingbaot, Lod I Lavem Yu
“Be stret wok blong mifala i blong rimaenem ol narawan se Lod i lavem olgeta,” Marlene i talem. “Mo taem mifala i mekem hemia, mifala i filim lav blong Hem tu.”
“Yumi evriwan i gat ol traehad,” Sharon i talem. “Mi gat problem naoia we mi no bin gat long faev manis we i pas. Be taem mi filim sore long miwan, mi tingting, ‘Ei, hemia i nating long wanem we Sevya i go tru long hem.’ Yumi stap long ples ia blong progres mo gro. Mo nomata long olfala yia, sapos yu letem ol eksperiens blong yu i tijim yu, yu save gohed blong lanem samting foreva.”
From se evriwan long olgeta oli lusum ol lav wan blong olgeta, ol memba blong presidensi oli lanem plante abaot lav mo sore. Oli save olsem wanem blong helpem olgeta we oli nidim kamfot. Eksampol, long wan yia Marlene i lusum fo famli memba mo wan gud fren.
“From se mifala i bin go tru long plante hadtaem,” hem i talem, “mifala i save helpem ol narawan tu blong go tru long hadtaem. Sapos yu stap traehad from wan samting, Yu givim seves wetem ful hat blong yu long ol nara man. Hemia nao wanem koling i helpem mi blong mekem.”
Ol memba blong presidensi oli kam wetem plante eksperiens mo andastaning long ol koling blong olgeta. Oli bin laef mo wok long plante ples—Kalifonia, Ohaeo, Waeoming, mo Yuta. Oli bin givim seves long tempol, long ol wod mo ol koling long stek, long Praemeri, Yang Woman, mo yumaniterian seves. Be Dorothy i neva holem wan koling long Rilif Sosaeti, kasem naoia.
“?Wanem i moto blong Rilif Sosaeti?” hem i talem. “‘Bigfala Lav I Neva Sot.’ Hemia i tru taem yu yang, be i tru tu taem yu kam moa olfala. Olsem wan presidensi, mifala i lanem hemia evri dei.”
“Mi ting se mifala i wok gud tumas tugeta,” Sharon i talem, wetem wan saed ae, “blong wan presidensi we medel yia blong olgeta i 90 .”