Stap Trastem Paoa blong Lod mo Ol Profet

Pikja

Presiden mo Sista Nelson i stap toktok long tu boe

Foto i kam long Ravell Call, Deseret News

Ol Dia Papa mo Mama,

Long wol blong yumi we i gat tumas samting i stap tekem ples, hem i isi blong filim fraet mo konfius. Be taem yumi tanem yumi i go long Jisas Kraes blong kamfot, Hem i save givim pis long taem blong strong win blong laef. Ridim ol atikol long magasin ia blong faenemaot olsem wanem Sevya i save helpem yu, pas tru long ol jalenj blong yu.

Ol Toktok Raon blong Gospel

Sevya I Rere Oltaem blong Givim Pis long Ol Trabol Taem

Ridim wetem famli blong yu atikol blong Elda Uchtdorf long pej 4 abaot olsem wanem taem yumi putum tras long paoa blong Kraes we i rere oltaem blong givim pis long ol situesen we i strong tumas. Tokbaot tugeta sam long olgeta wei we Jisas i givim rilif o mekem ol hevi samting i kam laet. ?Wanem yu save mekem blong invaetem paoa blong Hem i kam long laef blong yu?

?Olsem Wanem Nao Prishud I Blesem Famli blong Yumi?

Ridim atikol long pej 22 abaot ol prishud blesing. Invaetem ol memba blong famli blong serem taem we oli kasem wan prishud blesing. ?Oli bin filim olsem wanem? ?Olsem wanem nao blesing i helpem olgeta? ?I gat wan blesing we i save helpem wan memba blong famli naoia?

Lod i Yusum Ol Profet blong Hem blong Helpem Yumi developem fasin blong gat strong tingting

Long atikol ia long pej 30, Elda Sikahema i tokbaot olsem wanem taem i folem ol tijing blong profet i helpem hem stanap strong long ol bilif mo standet blong hem long taem blong karia blong hem olsem wan Ameriken futbol plea mo truaot long laef blong hem. Afta we yu ridim atikol ia, yu save gat wanwan memba blong famli blong yu i serem taem oli folem profet i helpem olgeta blong gat strong paoa long tingting.

Kam Folem MiHapi Famli Taem

Stap Gro, Stap Gro, Evri Dei

Olsem ol memba blong Jos blong Jisas Kraes we i kambak, yumi gat responsabiliti ia blong helpem kingdom blong God i gro long wol ia. Matiu 13:31–32 i talem:

“Kingdom blong heven i olsem sid blong nambangga, we man i tekem mo i sakem long fil blong hem:

“Sid ia i smol we i smol i winim ol narafala sid: be taem i gru i kam wan bigfala tri we i bigwan moa i winim ol narafala tri.”

Sidaon long sekol mo traem benbenem yu i kam moa smol olsem wan smol sid blong nambangga.
Givim janis long evriwan blong nemem wan aktiviti we maet bae oli mekem evri dei blong helpem Jos i gro (Serem testemoni blong olgeta, serem wan skripja long sosol media, serem wan trutok blong gospel wetem wan fren, mo moa).
Evri taem wan man i talem wan aktiviti we i helpem Jos i gro, evriwan i sidaon i stap be leftemap bodi smol nomo mo smol bakegen kasem taem we oli stanap gud.
Toktok raon wetem famli blong yu, from wanem hem i impoten blong wan wan man o woman i mas mekem pat blong hem blong mekem Jos i gro.