“Bel Taoa Rimaenda blong Mi” Liahona, Maj. 2023.
Ol Voes blong Ol Lata–dei Sent
Bel Taoa Rimaenda blong Mi
Sapos mi bin lisin long kwaet voes ia, bae mifala i gat moa taem blong tijim gospel long Giuseppe.
Wan priperesen dei, misinari kompanion mo mi i visitim wan katedral long Parma, Italy. Taem mitufala i stap luk long ol naesfala penting we i stap, mi luk wan monk i stap rid kolosap nomo long mifala. Mi kasem wan filing blong blong toktok long hem abaot Buk blong Momon, be fraet i kam long mi.
?Olsem wanem wan Katolik monk bae i presentem hem long wan misinari we i stap wok insaed long wan katedral? Filing ia i kam bakegen, be mi no lisin bakegen long hem.
Wan wik afta, tu narafala elda long apatmen blong mifala oli talem long mifala oli bin gat visit wetem wan monk nem blong hem Giuseppe taem tufala i stap toktok long ol man long rod. Afta we oli tijim hem wan lesen, hem i akseptem wan kopi blong Buk blong Momon.
Taem ol misinari oli mit wetem Giuseppe wan nara wik afta, hem i bin ridim kolosap haf blong buk finis. Hem i glad tumas from buk ia.
Bifo ol misinari oli mit wetem Giuseppe bakegen, kompanion blong i bin transfea, so mi joenem kompanionsip blong olgeta. Taem mifala i go blong tijim Giuseppe insaed long katedral, mi no bin sapraes blong luk se hem i semfala monk ia we mi kasem filing ia blong toktok long hem
Giuseppe i talem long mifala, hem i stap rid long buk long Alma, we i komperem hem long Aposol Pol. Mifala i disaed blong tijim hem namba tu lesen, we i en wetem wan invitesen blong kasem baptaes. Long en blong lesen blong mifala, jes bifo blong mifala i invaetem Giuseppe blong folem eksampol blong Jisas Kraes blong baptaes, ol bel blong katedral oli stat blong stap ring, mekem mifala i fraet.
Giuseppe i bin lus trak blong taem mo talem se hem i nidim blong joenem ol nara monk long medel dei prea blong olgeta. Afta hem i talem sore, mo i se bae hem i no save stap long ol fiuja lesen from se bae i go long wan miting blong ol monk. Odinesen blong hem olsem wan pris bae i tekem ples.
Mifala i sapraes olsem wanem gudfala impoten taem ia i jes lus nomo olsem. Sapos mi bin lisin long kwaet toktok we i bin toktok long mi, bae mifala i gat moa taem blong tijim Giuseppe mo bae hem i gat taem blong finisim ridim Buk blong Momon. Long wanem we mi save, ol misinari oli nomo tijim hem bakegen.
Afta long eksperiens ia, saon blong bel blong klok taoa i rimaenem mi olsem wanem taem i impoten mo i sot. Long taem blong misin blong mi we i stap, evri taem mi harem wan taoa bel i ring, i givim mi paoa blong mi toktok long eniwan mi save toktok long hem abaot gospel. Tedei, mi stap traehad yet blong folem kwaet voes blong Spirit.