“Taem Wol blong Mi I Tudak, Mi Tanem Mi I Go long Kraes,” Liahona, Maj. 2023.
Ol Yang Adalt
Taem Wol blong Mi I Tudak, Mi Tanem Mi I Go long Kraes
Wetem plante samting blong tudak we i stap hapen raon long mi, mi no save stret wanem i minim blong gat wan fandesen long Kraes.
Foto i kam long Getty Images, oli yusum ol model
Long wan mesej blong jeneral konfrens we i jes pas, Presiden Henry B. Eyring, Seken Kaonsela long Fas Presidensi, i tokbaot, strong taem long wol ia: “Aposol Pol i raet i go long Timoti, ‘Yu mas save samting ya tu. Long taem we bambae i kolosap long Lasdei, laef long wol ia bambae i kam strong tumas’ (2 Timothy 3:1).
“… Mo bae i kam had moa, bae i no isi moa, blong ona ol kavenan we yumi mas mekem mo kipim blong stap laef folem gospel blong Jisas Kraes.”1
Taem mi harem ol toktok ia, mi wari bigwan. Mi stap fesem ol jalenj finis long hom blong mi long Venesuela. So ol kwestin olsem, “?Olsem wanem nao bae mi save gat tingting ia se evri samting bae i oraet taem wol ia i tudak i stap?” mo “?Olsem wanem nao bae mi save luk fored blong gat wan fiuja we i gat laet long hem long wan kaen tudak olsem?” oli bin stap long hat blong mi long taem ia.
Be Presiden Eyring i givim ansa. Hem i kwotem Hileman 5:12, we i tok abaot bildim fandesen blong yumi “antap long strong ston blong Ridima blong yumi, we i Kraes.”
Mi bilivim oltaem se skripja ia i tru, be blong bildim fandesen blong mi long Sevya i luk olsem i moa isi blong talem bitim blong mekem. Nomata long hemia, taem mi go moa kolosap long Jisas Kraes, mi olsem evri samting i wok blong gud blong yu taem fet blong yu i stap strong long Hem (luk long Doktrin mo Ol Kavenan 90:24).
Filing ia se Oli Nomo Wantem Mi
Tu(2) manis i pas, mi kasem ol nius we i kam long famli blong mi we i spolem mi bigwan. I luk olsem evri samting long laef i go rong. Mi nomo filim bodi blong mi, mi konfius, mo wari bigwan we i mekem mi, mi sik!
Mi no save from wanem mifala i stap fesem ol hadtaem olsem taem mi stap traem blong stap fetful. Mi stap tingting se ating mi mekem wan samting i rong. Fiuja i luk olsem i nomo gat hop, mo mi filim olsem Papa long Heven mo Jisas Kraes tufala i lego mi.
Long medel blong ol harem nogud blong mi, mi toktok long wan gud fren. Hem i talem wan samting long mi we bae mi neva fogetem: “Mi ting se situesen ia i wan gudfala janis blong yu blong save tingting hevi long rilesensip blong yuwan wetem Lod. No mata wanem i hapen, i stap long yuwan blong yu tanem yu i go long Hem blong kasem help. Sapos yu mekem, Hem bae i givim long yu lav mo wanem yu nidim stret naoia.”
Ol toktok ia oli jenisim lukluk blong mi. Mi bin kros mo harem nogud mo konfius from ol samting we i stap hapen long mi, be mi gat wan joes. Nomata wanem yumi stap go tru long hem, wanem fraet yumi gat, o wanem hadtaem taem yumi fesem, Jisas Kraes i stap oltaem long saed blong yumi. Yumi gat joes blong tanem yumi i go long Hem, be i no blong no go long Hem, long taem blong trabol.
Hemia nao olsem wanem yumi mekem fandesen blong yumi blong fet long Hem i kam moa strong mo stanap strong agensem ol hadtaem blong wol ia. Taem yumi jusum Hem.
Olsem we Elda D. Todd Christofferson blong Kworom blong Olgeta Twelef Aposol i tijim: “Long medel blong faea ia blong smutum man, yu no stap kros long God, be go kolosap long God. Prea long Papa long nem blong Pikinini. Wokbaot wetem Tufala tru long Spirit, dei afta dei. Letem Tufala i soem, wetem taem, we Tufala i tru long yu. Rili kam blong save Tufala mo rili kam blong save huia yu.”2
Kraes i stap wet long mi blong mi tanem mi i go long Hem blong kasem help. Hemia i no minim se ba Hem i mekem evri problem blong mi bae oli go lus o fiksim evri samting long laef blong mi mo famli blong mi stret long taem, be Hem i helpem mi i kam gud moa, faenem glad, mo kam moa klin gud.
Mo taem mi lukaotem Sevya tru long prea, skripja stadi, mo fet, Hem i helpem mi fogivim ol famli blong mi mo i mekem laef blong mi i glad bakegen, nomata sam long ol nara jalenj i stap nomo.
Wan Promes blong Stap Sef
Hemia i rili ol strong taem blong ol las dei. Yumi harem abaot ol wo mo ol nius blong wo, wol sik, ol disasta—mo mi sua se bae i gat ol taem we bae i moa had i stap long fored. Nomata long hemia, taem yumi bil antap long ston ia we i Jisas Kraes mo gat tras long Hem bae i givim pis mo glad oltaem long yumi, no mata long wanem yumi fesem. Olsem Presiden Eyring i tijim tu se, “Long yumi we yumi stap wari long yumiwan mo olgeta we yumi lavem, I gat hop i stap long promes ia we God i mekem, se i gat wan ples blong save stap sef long hem long taem blong ol strong win we i stap kam yet.”3
Hemia i wan promes we i gat paoa mo i naes tumas. Mo mi luk promes ia i fulfil long laef blong mi. Mi save se hemia hem i gospel blong Jisas Kraes we i kambak mo we Hem i sos blong evri blesing. Hem i laet blong yumi, Hem i Sevya blong yumi, mo yumi ol sipsip blong Hem. Letem yumi jusum Hem mo jusum fet.
Man we i raetem stori ia i stap long Sulia, Venesuela.