Ol Voes blong Ol Lata–dei Sent

Viu blong Mi blong Antap

I kam long Milla Ray Acevedo Carrasco, Marlborough, Niu Silan

Kolosap mi sakemaot stret samting we mi nidim blong kasem gol blong mi.

Foto blong Roy’s Peak eria i kam long man we i raet

I no longtaem, mi bin go long wan wokbaot antap long ol naesfala hil blong Roy’s Peak long Niu Silan Saot Aelan. From se wokbaot i stap blong samfala haoa nomo, mekem se mi karem nomo wanem mi nidim: sam smosmol swit kaekae mo plante wota.

Taem mi statem wokbaot,basket blong mi i fil hevi finis. Haf aoa long wokbaot blong mi, mi filim wet long basket blong mi i moa hevi long solda mo bak blong mi. Long wan taem, mi stap tingting blong sakem sam long ol wota blong mi. Be kwiktaem, mi save se bae mi nidim.

Wan aoa haf bifo mi kasem top blong hil, rod i kam moa stip mo i fulap wetem sno. Mi stat blong tingting mi no save kasem antap, be gol blong i leftemap tingting blong mi blong gohed.

Taem mi kasem antap long top, basket blong mi i kam moa laet. Long taem ia mi flatem ol smosmol swit kaekae blong mi finis mo dring plante long wota blong mi. Stap spel mo stap glad long naesfala viu blong antap ia, mi lukluk bak long wokbaot blong mi—i go long top blong hil mo long laef.

Blong fo aoa, mi wokbaot kam antap long hil, givim kaekae mo wota long bodi blong mi blong mekem se mi gat paoa blong stap gohed. Wanem i luk olsem i hevi tumas long stat—wota blong sevem laef—i blesem mi blong kasem gol blong mi.

Yumi evriwan i gat ol taem we i gud mo taem we i nogud, be Tabu Spirit i help yumi blong mekem gudfala desisen. Kolosap mi lego moa long haf lita blong wota long rod, be mi tingting strong blong kipim olgeta.

Ties long ae blong mi, mi talem tankyu long Papa blong mi long Heven from ol tingting ia. Stap long hil we i fulap long sno long taem ia i givim insperesen long mi blong mi lukluk bak long laef blong mi, ol desisen blong mi, ol gol blong mi, mo basket blong miwan.

Bifo long wokbaot blong mi go antap long hil, mi no save wan samting abaot laef blong mi mo wok blong mi long wan nara kantri. Be naoia mi filim se evri samting bae i oraet. Mi save se Lod bae i tekem kea long mi.

Wetem kompanion blong Spirit, mi save mi bae mi mekem ol stret desisen we bae i leftemap mi long saed blong tingting, bodi, mo spirit. Mo taem mi filim se hevi i dragem mi stap daon, mi save tanem mi i go long Sevya, we i sos blong “wota we i gat laef long hem” (Jon 4:10). Mi save Hem bae i givim kaekae long mi mo mekem wanem we i hevi long mi i kam laet (luk long Matiu 11:28–30).