“Olsem Wanem Tabu Aedentiti I Gat Paoa long Fasin blong Stap Pat mo Kam Olsem,” Liahona, Maj 2023.
Olsem Wanem Tabu Aedentiti I Gat Paoa long Fasin blong Stap Pat mo Kam Olsem
Taem yumi mekem rilesensip blong yumi wetem God mo stap olsem wan disaepol blong Jisas Kraes, i kam faswan, bae yumi faenem glad insaed long tabu aedentiti blong yumi, kasem wan filing blong stap pat we i stap strong, mo kasem tabu paoa we yumi save kasem.
Ameriken Saekolojikol Asosiesen i eksplenem fasin blong stap pat i olsem “filing ia blong wan grup i akseptem o apruvum yu.”1
Sore nomo, i no yumi evriwan i filim filing ia blong stap pat mo samtaem, yumi traem blong jenisim huia yumi blong oli akseptem yumi. “Yumi evriwan i wantem stret blong save pat,” Joanna Cannon i eksplenem, wan Britis saekaeatris. “Blong save kasem hemia, yumi stap soem ol vesen blong yumiwan we i defren smol nomo, i dipen long ples mo huia yumi stap wetem. Maet yumi gat fulap ‘kaen’ vesen blong yumiwan—blong wok, o blong haos, o iven onlaen.”2
Hem i impoten blong luksave se i gat samting i defren blong stret blong save pat mo blong stap pat. Brené Brown, wan raeta mo riseja blong Amerika, i serem lukluk blong hem: “Blong stap stret blong save pat mo blong stap pat, oli no ol semmak samting. Be, blong save stap stret blong save pat i wan bigfala blok blong kam blong save se yu blong wea. Blong stap stret blong save pat i abaot blong stadi gud long wan situesen mo kam huia yu nid blong kam blong oli save akseptem yu. Long narasaed, blong save se yumi blong wea i no nidim yumi blong jenisim huia yumi; i nidim yumi blong stap olsem huia yumi.”3
Blong save tabu aedentiti blong yumi i impoten mo i gat mining long yumi from yumi save se yumi blong wea; sapos no, bae yumi spendem taem mo efot blong yumi blong stap traem blong jenisim yumiwan blong oli akseptem yumi long ol ples we i no givim ona o go stret wetem tabu fasin blong yumi. Antap long hemia, ples we yumi jusum blong stap pat long hem i save lidim yumi blong jenisim ol valiu mo fasin blong yumi taem yumi traem blong yusum ol nomol fasin mo standet blong wan grup. Taem taem i stap go, ples we yumi jusum blong i kam ples blong yumi, i gat paoa blong jenisim huia bae yumi kam olsem.
Blong talem i sot, taem yumi akseptem ol paoa blong tabu aedentiti blong yumi i mekem yumi wantem blong go long ples we i blong yumi, mo ples we yumi jusum blong i ples blong yumi, bae i lidim yumi i kam huia bae yumi kam olsem.
I Kam long God
Yumi evriwan i laef wetem God long laef bifo laef long wol ia (luk long Doktrin mo Ol Kavenan 93:29; 138:55–56). Oli krietem yumi long imej blong God—man mo woman (luk long Jenesis 1:27). Hem i bin rere long wan plan blong yumi blong kam olsem Hem (luk long Doktrin mo Ol Kavenan 132:19–20, 23–24). Plan blong Hem blong hapines, i tekem yumi blong kam long wol ia blong kasem wan bodi, kasem save, mo antap long evri samting, gobak long hom blong yumi long heven blong laef wetem Hem long glad we i no save finis (luk long 2 Nifae 2; 9; Ebraham 3:26). God i soemaot, “From luk, hemia i wok mo glori blong mi—blong mekem man i nomo save ded mo i kasem laef we i no save finis” (Moses 1:39). I naes tumas, !yumi yumi wok mo glori blong Hem! Hemia i talem wan samting abaot hamas valiu blong yumi i bigwan long Hem.
From se i gat ol bilian blong pipol long wol ia, maet bae sam oli faenem i had tumas blong akseptem se God i wari long wanwan long yumi. Mi witnes se Hem i save wanwan long yumi mo i save wanem yumi stap mekem, ples we yumi stap long hem, mo tu “tingting mo wanem nao hat [blong yumi] i wantem” (Alma 18:32). God i no “kaontem” yumi nomo (Moses 1:35) be Hem i lavem yumi stret gud evriwan (luk long 1 Nifae 11:17).
From lav blong Hem long yumi we i stret gud evriwan, Papa long Heven i wantem blong serem evri samting we Hem gat wetem yumi (luk long Doktrin mo Ol Kavenan 84:38). Long en blong evri samting, yumi ol pikinini gel mo boe blong Hem. Hem i wantem yumi blong kam olsem Hem, blong mekem ol samting we Hem i stap mekem, mo blong eksperiensem glad we Hem i gat. Taem yumi openem hat mo maen blong yumi long trutok ia, “Spirit ya blong God i kam joen long tingting blong yumi, blong talemaot we yumi pikinini blong God: Nao from we yumi pikinini blong hem, bambae yumi save kasem; ol gudgudfala samting we God i putum olgeta oli tabu” (Rom 8:16–17).
Ol Samting We Oli Defdefren long Laef long Wol
Long laef bifo wol ia, yumi wokbaot wetem God, yumi harem voes blong Hem, mo filim lav blong Hem. Stat long taem ia, yumi bin pas long wan vel blong fogetem samting mo kam long laef long wol ia. Yumi nomo tingbaot fulwan ol samting blong laef blong yumi bifo. Ol situesen long wol ia i mekem i had blong yumi filim se yumi kam long God mo fasin we yumi bin stap enjoem long hom blong yumi long heven.
Eksampol, blong lukluk tumas nomo long ol samting we i defren long ples we yumi stap long hem o wei we oli luk yumi, i save stap olsem wan samting we i blokem koneksen blong yumi wetem God. Enemi i traem blong yusum ol samting ia we i defren blong karemaot yumi long tabu mama mo papa we yumi kamaot long olgeta. Ol nara man oli stap singaot yumi long nem blong ol grup mo samtaem yumiwan yumi stap tingting olsem. I nogat samting i rong blong stap traem blong luksave yuwan wetem ol nara wan folem ol fasin blong wol ia; i tru, plante long yumi i faenem glad mo sapot long olgeta we oli gat ol semmak fasin mo eksperiens. Be, taem yumi fogetem stret ples we yumi kam long hem olsem ol pikinini blong God, yumi save stat blong fraet, nogat tras, o filim blong gat moa paoa long olgeta we oli defren long yumi. Ol fasin ia i lidim yumi blong stap wanwan, talem nogud ol narawan, mo tu, spolem yumiwan (luk long Moses 7:32–33, 36).
Taem yumi tingbaot tabu ples we yumi kamaot long hem, ol samting we oli defdefren long yumi i mekem laef i kam moa naes mo rij. Yumi luk yumiwan olsem ol brata mo sista, nomata long ol samting we yumi gat i defdefren long yumi. Yumi kam blong respektem mo lan aot long wanwan long yumi. Yumi traehad blong givim ol ples blong sapot long ol nara wan blong oli filim se oli pat, speseli taem ol fasin mo eksperiens blong olgeta i defren long hemia blong yumi. Yumi filim fasin blong talem tangkyu long God from ol defdefren kaen kriesen blong Hem.4
Nomata long wei we oli luk yumi mo ples we yumi stap long hem i gat paoa long eksperiens blong yumi long laef ia, hemia i no talemaot huia yumi. Yumi ol pikinini blong God wetem paoa ia blong kam olsem Hem.
Fasin blong Stap Pat tru long Jisas Kraes
From we Hem i save se yumi save go tru ol impoten jalenj blong laef, God i rere mo i sendem Pikinini blong Hem, Jisas Kraes, blong helpem yumi blong winim ol jalenj ia. Kraes i givim help ia blong putumbak bakegen tabu rilesensip we yumi bin gat wetem God long laef bifo wol ia. Kraes i bin eksplenem,“Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam” (Jon 14:6; luk tu long Jon 3:16–17).
Kraes i oltaem wantem blong helpem yumi. Yumi blong Hem (luk long 1 Korin 6:20), mo Hem i wantem tumas blong yumi kam long Hem. Long ol toktok blong Sevya Hemwan, Sevya i promesem se, “kam long mi wetem ful tingting blong hat, mo bae mi akseptem yu” (3 Nifae 12:24).
So, ?olsem wanem yumi kam long Kraes wetem ful tingting blong hat?
Faswan, yumi akseptem olsem Sevya mo Ridima blong yumi. Yumi luksave fasin blong God we i bigwan, yumiwan we yumi lus mo foldaon, mo olsem wanem yumi dipen fulwan long Jisas Kraes blong i sevem yumi. Yumi wantem blong oli save yumi tru long nem blong Hem (luk long Mosaea 5:7–8) mo wantem blong stap olsem ol disaepol blong Hem “long evri dei blong [yumi] we i stap” (Mosaea 5:5).
Nambatu, yumi kam long Kraes wetem wan hat we i fulwan taem yumi mekem mo holemtaet ol tabu kavenan wetem God (luk long Aesea 55:3). Oli mekem ol kavenan tru long ol odinens blong gospel blong Jisas Kraes we i sevem yumi mo mekem yumi kam olsem wan god, we oli mekem tru long atoriti blong prishud.
Blong stap mekem mo holemtaet ol kavenan i no fasem yumi nomo long God mo Pikinini blong Hem, be i joenem yumi wanwan tu long yumi. Sam yia i pas, mi stap visitim Kosta Rika wetem famli blong mi mo mifala i bin go long sakramen miting long wan lokol Jos yunit. Taem mifala i go insaed, sam memba oli welkamem gud mifala. Long taem blong miting, mifala i singsing sakramen hym wetem wan smol kongregesen. Mifala i wajem ol pris oli rere long sakramen mo afta mifala i lisin taem oli stap talemaot ol prea blong sakramen. Taem oli pasem bred mo wota long mifala, mi filim lav blong God we Hem i gat long wanwan long ol fren blong mi we oli stap holemtaet ol kavenan, i fulumap mi. Mi no bin mitim eni wan long olgeta bifo miting ia, be mi bin filim yuniti mo fasin blong stap wan wetem olgeta, from mifala evriwan i bin mekem mo stap traehad blong holemtaet ol semmak promes i go long God.
Taem yumi mekem mo traehad blong holemtaet ol tabu kavenan wetem God, yumi stat blong eksperiensem wan filing blong stap pat blong grup we i moa bigwan bitim filing ia blong stap pat long eni grup blong sot taem o blong wol ia.5 Yumi “i no moa stap olsem we [yumi] ol strenja, no [yumi] man blong ol narafala ples. Naoia, [yumi] gat raet long ples blong [yumi] insaed long ples blong God, olsem ol narafala man blong God nomo” (Efesas 2:19).
Mi luksave se sam long yumi, from ol situesen blong yumi long laef ia, bae yumi no gat janis ia blong kasem evri odinens mo mekem evri kavenan long laef ia.6 Long ol situesen olsem, God i askem blong yumi mekem “evri samting [yumi] save” (2 Nifae 25:23) mekem mo holemtaet ol kavenan we i stap blong yumi. Afta Hem i promes blong givim yumi janis ia blong kasem eni nara odinens mo kavenan we yumi no kasem yet, long nekis laef (luk long Doktrin mo Ol Kavenan 138:54, 58). Bae Hem i mekem i posibol blong yumi blong kasem evri blesing we Hem i gat blong ol pikinini blong Hem (luk long Mosaea 2:41).
Stap Kam Olsem Papa long Heven mo Jisas Kraes
God i glad taem yumi filim lav, yuniti, mo paoa we i kam long dip filing blong filim se yumi pat blong Hem, Pikinini blong Hem, mo olgeta we oli folem Tufala. Be, !Hem i gat ol plan we oli moa bigwan blong yumi! Nomata we Hem i stap invaetem yumi blong kam olsem we yumi stap, tru tingting blong hat blong Hem i blong yumi kam olsem we Hem i stap.
Blong stap mekem mo holemtaet ol kavenan i no helpem yumi nomo blong pat blong God mo Kraes, be tu, blong givim yumi paoa ia blong kam olsem Tufala (luk long Doktrin mo Ol Kavenan 84:19–22). Taem yumi stap holemtaet ol kavenan i go tugeta wetem ol odinens blong gospel we i sevem yumi mo mekem yumi kam olsem wan god, paoa blong God i save kam insaed long laef blong yumi. Yumi save luk kavenan rod olsem wan tabu program blong tren blong kam moa gud. Taem yumi mekem mo holemtaet ol kavenan wetem God, yumi stap praktis blong tingting, mekem samting folem, mo tap lav olsem we Hem i mekem. Smosmol, wetem help mo paoa blong Hem, bae yumi save kam moa olsem Hem.
God i wantem tumas blong yumi joen wetem Hem mo Pikinini blong Hem blong “mekem man i nomo save ded mo kasem laef we i no save finis” (Moses 1:39). Hem givim long wanwan long yumi, taem long wol ia, ol presen long saed blong spirit. mo paoa ia blong jusum, blong yusum olgeta blong givim seves long ol nara wan. Yumi ol pikinini boe mo gel blong Hem, mo Hem i gat wan impoten wok blong yumi blong mekem (luk long Moses 1:4, 6).
Blong wok gud insaed long wok blong Hem, yumi mas tanem yumi i go aot mo lanem blong putum God faswan mo plante taem, putum ol nid blong ol nara man fastaem long hemia blong yumi. Blong stap lukluk moa aotsaed i nidim sakrifaes blong yuwan (luk long Doktrin mo Ol Kavenan 138:12–13) be tu, hemia i putum moa mining i kam long laef blong yumi mo i givim bigfala glad (luk long Alma 36:24–26).
Taem yumi givim yumiwan blong mekem wok blong God, yumi no jes pat nomo olsem ol memba blong wan grup; be, yumi kam ol tru patna wetem God mo Pikinini blong Hem, Jisas Kraes. I no gat wan filing we i moa bigwan bitim blong save se God i trastem yumi inaf blong wok tru long yumi blong givim laef we i no save finis long ol nara wan.
Ol Tri Invitesen
Blong klosem, mi stap givim tri invitesen we i save helpem yumi blong kasem wan filing we i gat glad mo save stap long taem blong aedentiti, mo blong stap pat, mo blong mekem yumi kasem tabu paoa we i stap insaed long yumi.
1. Mi invaetem yumi blong mekem tabu aedentiti blong yumi olsem ol pikinini boe mo gel blong God, i kam faswan. Hemia i minim se yumi stanap long valiu blong yumiwan long tabu laen blong papa mo mama we yumi kamaot long hem. Yumi lukaotem blong bildim rilesensip blong yumi wetem God tru long prea mo skripja stadi, kipim Sabat dei i tabu mo wosip long tempol, mo eni narafala aktiviti we i karem Tabu Spirit i kam long laef blong yumi mo i mekem koneksen blong yumi long Hem i kam moa strong. Yumi letem God i win insaed long laef blong yumi.7
2. Mi invaetem yumi blong akseptem Jisas Kraes olsem Sevya blong yumi mo putum fasin blong yumi blong stap olsem wan disaepol blong Hem, i kam faswan long ol nara samting. Hemia i minim se yumi tekem nem blong Hem antap long yumi mo yumi wantem blong oli save yumi olsem ol man blong folem Hem. Yumi lukaotem long save yusum fogivnes blong Hem mo paoa blong Hem evri dei. Yumi mekem ol kavenan mo holemtaet olgeta. Yumi traehad blong kam olsem Hem.
3. Mi invaetem yumi blong putum yumi fulwan long wok blong God, taem yumi stap helpem ol nara wan blong kam long Kraes mo kasem laef we i no save finis Hemia i minim se yumi helpem ol nara wan blong luk tabu aedentiti blong olgeta mo filim filing ia se oli pat. Yumi no haedem mo serem glad ia we yumi faenem insaed long Jisas Kraes mo gospel blong Hem (luk long Alma 36:23–25). Yumi traehad blong helpem ol narawan blong mekem mo holemtaet ol tabu kavenan wetem God. Yumi lukaotem blong God i lidim yumi blong save huia yumi save blesem mo olsem wanem yumi mekem.
Mi promes se taem yumi mekem rilesensip blong yumi wetem God mo stap olsem wan disaepol blong Jisas Kraes, i kam faswan, bae yumi faenem glad insaed long tabu aedentiti blong yumi, kasem wan filing blong stap pat we i stap strong, mo yumi save kasem ples we God i stap long hem.
I kam long wan toktok, “Tabu Aedentiti, Fasin blong Kam Olsem, mo Stap Pat,” we oli givim long Brigham Yang Yunivesiti–Hawai long 25 Mei, 2022.