Ol Yang Adalt
Sam Toktok blong Help Fesem wan Fiuja we i Gat Fraet mo i Gat Tu Tingting
Long laef blong miwan, mo long wok blong mi, mi fesem plante taem we i nomo gat tras mo lanem olsem wanem Papa long Heven i save helpem yumi go tru long hem.
Taem mi yang famli blong mi i aot long Tonga i go long Yunaeted Stet. Papa blong mi i wan man blong boksing taem mifala i stap long Tonga, mo i stat blong tijim mi blong boksing taem mifala i kam long Amerika. Bigfala plan blong hem i we bae mi kam wan hevi wet jampion blong wol sam dei. Hem i tijim mi blong no fraet. Yu no save fraet insaed long boksing ring sapos yu wantem blong gat sakses. Papa i no bin aktiv long Jos long taem ia, be hem i tijim mi plante abaot fesem hadtaem mo blong gat strong tingting long fes blong fraet.
Blong stap lan long boksing nomo, i mekem mi rere long wok blong mi. Mi bin go long Brigham Young University long wan futbol skolasip. Mo mekem wanem plante pipol i luk olsem wan krangke samting blong mekem insaed long fil blong futbol—blong stap kasem bol we oli kikim—mi stap mekem oltaem wetem wan fasin we i kwaet nomo. Mi neva stap fraet tumas blong mekem hemia. I tru, mi laekem ol jalenj blong futbol.
Papa blong i stap tingting blong mi mas gat wan profesenol karia long saed blong spot—i hapen se i stap insaed long futbol be i no long boksing. Be mi ting se trening blong mi i helpem mi blong mi gat fet mo blong luk fored wetem fet mo hop long taem blong tu tingting.
Papa blong Vai i selebretem taj daon blong boe blong hem we i skorem long fil.
Foto i kam long Mark Philbrick / BYU © BYU Foto
Olsem ol yang adalt, yu fesem plante hadtaem mo ol samting we i mekem yu fraet—yu fesem ol samting yuwan olsem ol desisen abaot edukesen, wok, mared, mo famli. Mo yu fesem tu ol kaen samting olsem hadtaem long saed blong ekonomi, ol temtesen blong evri dei laef wetem ol fren, ol jenis we i stap tekem ples from politik, mo iven wo. Be long eksperiens blong laef blong miwan, mi save se taem yumi jusum blong putum Lod faswan long laef blong yumi, Hem i stap oltaem blong lidim yumi go tru long evri samting.
Fasin blong Ol Gud Fren mo Gud Pipol we i Lidim Tingting blong Yu
Mi bin laki blong gat ol gud fren taem mi kambak hom long misin blong mi. Wan fren we mi bin mitim hem long misinari trening senta i introdiusum mi long woman we bae i kam waef blong mi. Mi neva tekem tingting ia olsem nating, i tru se long laef oltaem ol fren nao, oli lidim yu i go long sakses o trabol. Ol fren mo tija blong yu oli save helpem yu mekem ol desisen we i save lidim yu i go kolosap o longwe long God.
Taem mi stap long Nasonal Futbol Lig, mi lukluk long Gifford Nielsen, hem i bin plei tu blong BYU bifo i go long NFL, afta hem i bin kam wan anaonsa blong spot long redio mo afta i kam wan Jeneral Atoriti Seventi. Mi kasem hem wan dei long wan golf fil, mo hem i givim long mi wan advaes we i jenisim profesonol karia blong mi.
Mitufala i stap sidaon long wan golf kat, mi mo hem nomo, mo afta mi talem long hem abaot plan blong mi blong go long televisen olsem we hem i bin mekem afta we hem i finis plei futbol, hem i givim mi advaes blong no gohed blong folem wan karia we bae i mekem mi blong mi plei ol gem long ol Sandei. Long wei ia, bae mi oltaem gat wan koling long Sandei blong save givim seves long Jos.
I wan simpol advaes nomo, be mi no bin tingting abaot advaes ia. Mo hemia i jenisim kos blong laef blong mi.
Stanap From Wanem Yu Bilivim
Moa long wok blong mi long NFL i gat fraet mo i gat tu tingting. I gat 2 pesen nomo blong olgeta we oli plei futbol long kolej oli kwalifae blong go insaed long NFL, mo nomata taem mi stap long tim, oli save karemaot mi enitaem. Blong stap longtaem olsem we mi bin stap i bin wan bigfala blesing, be blong laef long wan strik laef olsem i had. I tekem plante fet.
Insaed long NFL, yu go from wan tim i go long narawan, yia afta yia, travel raon long kaontri. I luk olsem i gud tumas, be plante pipol oli no luk ol nogud saed blong hem. I had blong laef folem. Mo i wan had wei blong wan kapol i laef folem tu; hemia wan risen from wanem i gat wan hae namba blong divos long ol profesonol atlet.
Wanem i helpem mi, i we mi save wanem mi wantem mo wanem mi biliv long hem. Mi gat strong fandesen long Kraes, mo oltaem mi mekem ol samting we i kipim mi kolosap long Hem mo long Papa long Heven.
Maet bae yu no fesem wan karia we i fulap wetem tumas presa mo temtesen, be long kes blong mi olsem wan profesonol atlet, i putum mi long wan defren laef stael we mi bin stap laef long hem bifo. Olsem eksampol, taem mifala i kam long ol bigfala siti, mo hem i fastaem blong mifala long siti ia, ol fren blong tim bae oli wantem kwiktaem blong go aot mo tekpat long ol aktiviti we i no folem ol standet blong gospel, mo mi save stret long taem ia se mi no save putum wan leg long Saeon mo narawan long Babilon long semtaem. Mi no save ansarem olgeta se “letem mi tingting long hem” blong mekem olgeta i kwaet. Be , mi nidim blong stanap strong long fet blong mi mo eksplenem from wanem mi no save joenem olgeta.
Vai mo waef blong hem, Keala, long dei blong mared blong tufala
Man blong raet i glad blong givim ol famli foto ia
Mi bin laki tumas blong mared taem mi stap kolej. Taem mi go long NFL, waef blong mi mo bebi blong mitufala we i sikis manis tufala i stap wetem mi. Mitufala i bin mared insaed long tempol, mo mi save se ol kavenan ia oli oli minim wanem long mi mo wanem oli gat blong mi mekem. So bae mi talem long ol fren blong mi, “No, mi no stap mekem hemia.” Mo taem oli fos, bae mi talem, “Waef mo mi i bin mared long haos blong Lod long ples we mifala i mekem ol tabu kavenan. \Ol kavenan ia oli moa impoten long mi bitim eni nara samting.”
Mo wanem mi sapraes long hem i we taem oli askem ol kwestin ia long mi mo oli kam blong save se mi mi huia, ol semfala fren ia oli stat blong protektem mi mo respektem mi mo mo respektem ol standet mo ol kavenan blong mi. I nidim strong tingting blong stanap from wanem Yu Bilivim mo lavem.
Blong stap fesem plante temtesen i bin wan fraet samting long mi taem mi jes stat, be blong stap dipen long Papa long Heven mo tingbaot ol kavenan blong mi hamas oli tabu oli gat mining long ol had taem ia, i helpem mi oltaem blong mi stanap strong long rod blong kavenan long karia blong mi. Yu save mekem semmak samting long eni situesen yu fanem yuwan long hem truaot wokbaot blong yu.
Folem Profet
Mi save se olsem ol yang adalt tedei yu stap fesem plante samting we yu no sua long hem mo fraet abaot fiuja. Mo maet bae yu stap tingting se wanem blong mekem mo olsem wanem blong save go tru long hem. Isi ansa hem i blong folem lidasip o daereksen blong profet, Presiden Russell M. Nelson. Taem profet blong God i toktok mo givim long yu stret samting, hem i simpol nomo folem toktok blong hem.
Mi luksave se Presiden Nelson i laekem blong givim ol simpol lis blong ol samting we yumi save mekem blong stanap strong long fet blong yumi. Long sam yia we i pas, hem i bin givim long ol memba blong Jos faev samting blong mekem fet blong yumi i kam antap, faev wei blong mekem paoa blong spirit i kam strong, tri samting blong yu mas mekem taem yu statem wan niufala yia, mo plante moa.
Hem i no givim wan longfala lis blong ol samting blong mekem. Ol simpol samting nomo. Mo sapos yu mekem ol simpol samting ia mo stap tru long olgeta, laef blong yu bae i jenis taem yu stap mekem ol simpol samting. Fandesen blong fet blong yu bae i stanap strong, nomata sapos i gat ol taem blong fraet long wol ia. Mekem ol samting ia mo bae yu oraet. Bae yu gat proteksen.
I rimaenem mi long stori blong Neman long OlTesteman, ofisa blong militeri ia we i gat leprosi. Hem i bin go long profet Elisa, we i bin talem long hem blong i go wasem hem long reva Jodan seven taem. Militeri ofisa ia i ting se hemia i wan krangke tingting nomo, be olgeta we oli stap wetem hem oli leftemap tingting blong hem olsem wan komanda blong go mo mekem nomo. Mo hem i gat fet blong go mo mekem—samting ia we i simpol tumas. Mo hem i bin klin. (luk long 2 King 5:1–15.)
Elda Sikahema famli
Putum Fiuja blong Yu long ol Han blong Papa long Heven
Nao, ating mi no bin kam wan profesonol man blong boksing, be mi bin lanem sam samting abaot fesem ol fraet. Wetem ol desisen mo jalenj we yu stap fesem naoia olsem wan yang adalt, mi prea se bae yu mekem evri samting we yu save mekem blong lukaotem mo kipim paoa blong Spirit i stap wetem yu oltaem. Hemia i ki. Olsem we Presiden Nelson i tijim i no longtaem: “Gud paoa blong faea blong spirit bae i kipim yumi muv go fored long medel blong fraet mo tu tingting, we ol wol sik, ol tsunami, ol volkeno mo ol wo oli krietem. Paoa blong faea blong spirit, i save helpem yumi blong stanap agensem ol atak we oli no stop blong ol enemi ia, mo katemaot ol hadwok blong hem blong spolem fandesen blong spirit blong yumi.”1
Taem mi yang mo stap fesem ril taem ia blong muv aot blong go laef long wan nara kantri, mi save se bae i gat taem blong gat tu tingting oltaem long laef. Taem mi gohed blong fesem ol taem ia blong gat tu tingting truaot laef blong mi mo long karia blong mi, mi lanem se olsem ol disaepol blong Kraes, yumi save fesem plante kaen fraet o hadtaem we i stap long rod blong yumi.
Taem yu stap raon wetem ol gudfala pipol, setemap mo stanap long ol bilif blong yu, mo folem ol profet, bae i yu no fraet tumas long fiuja. Mo bae yu save muv i go fored wetem fet nomata long fes blong fraet o tu tingting. Taem yu putum fiuja blong yu long ol han blong Papa blong yumi long Heven we i gat lav, yu save gat tras ia se Hem bae i oltaem stap ia blong helpem yu.