“Mwakuri n ibuobuoki ma te Kantaninga ao te Onimaki,” Riaona, Maati 2023.
Reirein te Mwakuri n Ibuobuoki
Mwakuri n ibuobuoki ma te Kantaninga ao te Onimaki
Ngkai ti kawakin ara berita ma te onimaki, ti kona ni buoka kairakiia tabeman nakon Aan te onimaki.
Te Katooto iaon te kaantaninga ao te Onimaki
N ana Euangkerio Mareko, ti wareka iai rongorongo ae riinga te nano n taekan “te aine temanna, are iai irouna te nrara n te maan ae tebwi ma uoua te ririki.” Ti ataia bwa e “bati rawawatana irouia tani katoki aoraki aika bati, ae e kabane ana bwai n anga, ao e aki maiu riki teutana, ma kanga e a kakaiaki riki aorakina” (Mareko 5:25–26).
Tebwi ma uoua te ririki bon te tai ae rang ni maan n rawawata. Bwaai ni kabane a bon rang mwaiti ni kabaneaki. Ao e a kakaiaki riki. Ngkana iai inaomatan temanna bwa e na namakina te bwarannano, bon ngaia te aine aei.
Ma, “ngke e a tia n ongo taekan Iesu, [e] roko ibuakoia aomata i aku [na], n riinga ana kunnikai,” ibukina bwa e kakoaua, “Ngkana tao I riinga naba ti kunnikaina, ao I a maiu.”
Mareko e ribooti bwa ibukin ana onimaki, “ao akea ba e a toki naba n raarana; ao e ataia I rabwatana ba e kamaiuaki man te aoraki arei” (Mareko 5:27–29).
Ana kantaninga ao ana onimaki te aine iroun Iesu e kaekaaki n te kakabwaia. “Ao e taku Teuarei nako ina, Natiu, e kamaiuko am onimaki; nako man te rau, ao ko na kamaiuaki man aorakim” (Mareko 5:34).
Inanon te kangaanga, e aki taraaki bwa buburara ke manra, te onimaki ti ngaia ae kainnanoaki. Te maaku ao te bwarannano e karikiira bwa tina aki kona n iango ke ni kamwakuri. Ma te kaantaninga ao onimakinan Iesu Kristo e kaoa Mwaakana ao ana kakabwaia inanon maiura.
Kakaraoa te Kaantaninga ao te Onimaki inanon te Mwakuri n ibuobuoki
Ngkai taari ao mwaane n ibuobuoki, ti na kainnanoa wetean te kaantaninga ao te onimaki anne. Mwakuri n ibuobuoki a kona ni kaai ni karekea te kakabwaia ao te kakaewenako. Ngkana iai ae ti tangiri ni buokia ae a taraa n aki tangira buokaia, e kona ni waekoa ni kabua te kaantaninga. Tao ko kaitara te aekaki aei n te tai aei ma kain am utu, raraom, ke temanna ae ko katabeaki bwa kona buokia. Tao, n aron te aine ae nrara, bon ti te Uea ae e ata mwaitin te tai ao te mwakuri ae ko a tia ni kabanea ni kataia ni kakaea te bwai are e na ibuobuoki. Ma n aron te aine anne, ngkana iai te onimaki n reitinako ni kakae inanon te onimaki, mwaakan te Tia Kamaiu e kona ni karaoa te bitaki.
N tabetai te kakaewenako bon te mwakuri n ibuobuoki nakoia naake a korakai ni kan namakina te kaantaninga ae tau ni karaoan te onimaki. Iai tabeman ake, n ai aron te aine ni Mareko, e kona ni kaitara ma aorakin te buro, kangaanga n te mwane, ke aekakin nako kataaki aika taraa ni korakora. Ataakina bwa tiaki ti ngaiia inanon aia kangaanga e kona n riki bwa aan te onimaki ae korakora. Ti kona ni buokiia ni karekea te onimaki anne ngkai ti kaota tatauraoira ni uota rawawataia, tang ma ngaiia, ni karaui nanoia, ao n tei bwa taan kakoaua iroun te Atua (taraa Motiaea 18:9–10).1
Karikirakean te Kantaninga ao te Onimaki
Ti na kanga n karikirakea anuan maiun Iesu n te kantaninga ao te onimaki? Aikai tabeua iango:
-
Unimwaane Dieter F. Uchtdorf man te Kooram n Abotoro n te Tengaun ma Uoman e reirei bwa te kantaninga bon onimakinan ana kantaninga Iesu Kristo are e na kakoroa bukin Ana bereita nakoim.2 Ibukina bwa “te kantaninga bon ana bwaintangira te Tamnei [taraa Moronaai 8:26],”3 bon te bwai are ti kona n tataroakinna (taraa Reirei ao Berita aika Tabu 46:7–9).
-
Beretitenti Russell M. Nelson e reirei bwa karikirakean te onimaki e tangira te mwakuri. E tibwatibwa n arora are tina kona iai ni karikirakea ara onimaki rinanon te kamatebwai, n rineia bwa tina kakoaua, n tau ni mwakuri inanon te onimaki, ni karaoan otenantit aika tabu, ao ni butiia Tamara are i Karawa ana ibuobuoki.4