“Ko a Kaman Tia n Ataia,” Riaona, Beberuare 2023.
Bannan te Onimaki
Ko a Kaman Tia n Ataia
I a tia ni karekea au kakoaua n te euangkerio are e kaokaki, ma iai 10 riki te namwakaina n au boraraoi ngkai I minita n te ekaretia teuana.
Te Tamnei iroun Leslie Nilsson
Ngke tao ai ruaiwa au ririki, e reke irou te maraki ni wii. Te maraki ae e aki konaaki moana, ma akea ara mwane ibukin te tia karaowi. N te tai aei, I maeka ma tibu te unnaine i Mexico.
Ma rannimatana ni matana, e titirakinai, “Ko kakoaua Iesu ae E kona ni buokiko?”
I tuangnga bwa I kakoaua. E tuangai bwa N na nakon te ruu are teuana, ni katorobubua, ao n tataro ibukin te kakai. I bunra nanou n tataro, ma akea te bwai ae riki. Ma te un, I kaintoaai n taona mwangaiu ao ni manga tataro riki. N te tai ae waekoa e nako te maraki! Ngke I biri n tuanga tibu, I nooria bwa e katorobubua, ni bubuti ana buoka te Atua bwa e na buoka tibuna ae uarereke. I tuai kona ni mwaninga te tamnei anne, ao I rangi ni kakaitau ibukin tibu te unnaine.
Taneiai n te maiu n tamnei ake tabeua a riki imwiina.
Ngke e a koro 14 au ririki, I mwaing nako Texas, USA, n raoniia au karo ao tariu a mwaneu. I kunea te umwantabu n te aono ao I a tataromauri n tainako. Ibukin te bwai are I rinanona ma te Atua, I tangiria n tibwa Arana ao ana euangkerio ma aomata ni kabane ake a kan n ongo. Ngke ai 15 au ririki, I kabaea arau n te reirei ni kabwarabwara bwa N na riki bwa te minita. Inanon uoua te ririki, I iriira te kiraati iaon te Baibara imwain te reirei, imwiin te reirei ao n te wiikente.
Te ingabong teuana n te kauarinan, I ongo te karongoa n aia roki ataeinimwaane. “Ngkoe te Moomon!” e takarua temanna. I tuai man ongo te taeka anne mai imwaina, ma taraan ae te kabwainrang.
Imwiina I kunea bwa te aomata are e takaruaeaki bon raoraou ae Derek.
“I kabwarabure ngkai ko weteaki bwa te Moomon,” I taku.
Derek e moangare man titiraki, “Ko aki ataia bwa tera nanon te Moomon, ko ataia?”
E tuangai bwa kauarerekean araia membwa n Ana Ekaretia Iesu Kristo ibukiia Aika Itiaki ni Boong aika Kaitira.
“Ngaia, ngkoe te Kiritian?” I titiraki.
Ngke e kangai eng, I a kukurei n ataia bwa ti uaia n onimakina Iesu Kristo.
“Ko a Tia N Titirakina te Atua?”
“Antai kaain te Moomon aikai,” I titiraki, “ao tera ae a kakoaua?”
I nakon te intanete ni kakae. Imwiin tabeua te miniti, I baireia bwa raoraou tiaki raoi te Kiritian ao e na nako moone. Ngaia are, I tangiria ni karaoi bwaai ni kabane bwa e na anaa nanon raoraona bwa e na ataa te koaua.
Inanon uoua te ririki imwiina, I wareki booki ake I kona n taekan te Ekaretia, n raonaki ma ni kabane ana Boki Moomon—uoua te tai. I kaitibo naba ma Derek ao mitinare ake a bwanin aia tai ni kataia ni buokiia.
Ngke e a koro 17, I angabeeba man te reirei ni minita, katabuaki bwa te minita, ao I a riki bwa te bwatita n te bootaki n taromauri ae uarereke i Texas. Uoua te namwakaina imwiin katabuakiu, I a manga marooro riki ma mitinare.
Temanna mai ibuakoia e titiraki, “Ko a tia ni wareka ana Boki Moomon, ao ko a tia ni butimwaai ara reirei ni kabane ake ti kona n anga, ma ko a tia n titirakina te Atua ngkana e koaua te rongorongo aei? Ko na kona ni kina te kaeka mai Irouna, ngaia?”
“Bon anne,” I kaeka ma te kakatonga.
“Teina are I nooria, bon te kaai n tokanikai nakoim,” a kaeka mitinare. “Ngkana ko titirakina te Atua ngkana te bwai are a kakoaua raoraom ao te Atua e kangai tiaki, ngkanne e a tia am mition are ko wakinna n te mwananga aei. Ma ngkana E taku bwa e koaua ara rongorongo, ngkanne iangoia bwa mwaitira ae ko kona ni karekea.”
I tuai n iangoia n aron anne. Te tairiki anne I katorobubua inanon au ruu imwiin warekan Moronaai 10:3–5. Kaekaakiu mairoun te Atua e beebete ma e korakora. N te bwana ae rau, ae beebete, E kaekaai: “Ko a kaman tia n ataia.”
Te Tai ae Boou ni Maiu n Riki bwa Ana Reirei
Ngkai ngkae I a karekea au kakoaua n te euangkerio ae kaokaki, tera aron au minita? Iai riki 10 namwakaina n au boraraoi n riki bwa te minita. Imwiin au tataro ao au marooro ma te Atua, I baireia bwa N na katiaa au beku. Ibukin 10 riki namwakaina, I reitinako n tibwai koaua man te Baibara, ma ngkana e na nakoraoi I reita te nonoori man te euangkerio are kaokaki. Aomata a mataata ao a tangiri koaua akanne, ao au nanai are e uarereke e a rikirake man 20 nakon ae kaniia 150.
Imwiin banen au boraraoi, I anganaki au tabo ae matoa, ma I ataia bwa ai bon te tai ni bwabetitoaki inanon te Ekaretia. Ai bon tain wakinan te mwakoro ae boou ni mwanangau n riki bwa ana reirei.
Ngke I tuangiia kain au utu, a bon aki kukurei—n te moan tai. Ma teniua namwakaina imwiin kainakin te Ekaretia, I bwabetitoia tinau ao uoman mairouia tariu. Imwiina au mition ae bwanin taina n te Oklahoma Oklahoma City Mission, I bwabetitoa mwaneu are e uarereke.
Ngkana iai ae titiraki bukin tera I bita au aro, au kaeka n tainako, “I aki bita au aro—I teimatoa n riki bwa te Kiritian. Ma, I ti kakorakora riki au reitaki ma au Tia Kamaiu n riki bwa te membwa ae bwabetitoaki n Ana Ekaretia—Ana Ekaretia Iesu Kristo ibukiia Aika Itiaki ni Boong aika Kaitira. I a kina riki n Arona ao n tangiria ngkai nakon are mai imwaina ibukin te euangkerio are e Kaokaki, ana Boki Moomon, burabeti aika ngkai, ao otenanti aika tabu n te kamaiu ao karietataaki ake a reke n te tembora.”
N te bong aei I karekea tibwangau ni mwakuri bwa te tia reirei ae bwanin au tai n te tieminari. I teimatoa ni kabanea maiu nakon Iesu Kristo ao Ana euangkerio. Ao I teimatoa n tuangiia aomata nako ake a ongora taekan “te rongorongo ae raoiroi, ae kakimwareirei” (Ruka 2:10).