“Te Mwaaka ni Kateirakea Temanna,” Riaona, Maati 2023.
Ana Kakai Iesu
Te Mwaaka ni Kateirakea Temanna
Ti kona ni buokiia n tabekiia naake a tataninga ana kamaiu te Tia Kamaiu.
Konaaki. Manga konaaki naba. I bwaka nako aon au kaintekateka ao atu e bwaka nako nano. Ngai non tii te tia mataku, ma I teimatoa n akea korakorau ni kona n tei. Ara tiim a tia ni kabanea aia kona. Tabeman a bwata kuniia. Tabeman a waeturatura n otinako man te marae. Imwiin konaakin ara tiim n te kauarinan te kauatai, ti aki tii konaaki—a rang bwara nanora.
Kaanga ai aron are uniu e taraa n tokanikai iaou, temanna te kabanea n uarereke n aine n te tiim e rirarikiu. I waekoa ni katikaki nakon namakinan te kantaninga are I nooria ni moana.
I mataku ni mwanangana ike e karoko nakoia ataeinnaine n tatabemaniia, ma tiaki ibukin ataakin te konaaki. N onean mwiina, e anganiia te kamoamoaki, karaunano, ao te nanoanga nakoia n tatabemaniia nako. “I a tibwa nooriko ni biri ma te korakora n roko ikekei ni bwatinan te booro. Anne bon am takakaro ae te kabane n tamaroa .” Ao nakon are temanna, “Wow, e rang tikiraoi te kabo. I taekinna ma te koaua, e rang n tamaroa takakarom n te bong aei!”
Ni katoai ana orobai ake nimaai, baina are teaina e taui baiia, ao are teuana e taua angaia ke n riringii wae ake a bwata man memea n te uteute. I kona n namakinna bwa iai te bwai ae uouotia inanona, te mwaaka are e ewe mairouna nako nanoia kain te tiim n tatabeman. Te moangare e moanna n urua te namakin ni maraki ao n un. E karaurau, temanna imwiin temanna, iai te anua ao te namakin ae e boou iroun te tia takakaro n te tai anne.
Antai ae kan tabe ma te bwata ao te maraki? Antai ae kan tabe ma te un ao te maraki n nano? Bon Akea. Ma e kanga anganakin te bai ni buoka temanna bwa e na teirake man te korakai nakon te kantaninga ao te korakora?
N na tibwai bwaai tabeua are I a tia n reiakin ni mwaakan te Tia Kamaiu n tabekiia ao arona ni kona ni ibuobouki, n aron raraou n te tiim ni butibooro.
N te Nu Tetemanti, ti wareka rongorongon natin Iairo te aine.
“Ao e roko te tia taua taekan te mwaneaba temanna, ae arana Iairo; ao ngke e nora [Iesu], e katorobubua ni bobaraki I raraikini waena,
“Ao e kakorakora butiana, ao e kangai, E a kani mate natiu te aine; ko na nako mai ni kaaki baim i aona, ba e aonga n eka ma ni maiu.
“Ao e iria Iesu” (Mareko 5:22–24).
“Ao e iria iesu”
I tangira te rain are “Ao e iria Iesu” (Mareko 5:24). Te kakai e tuai n riki. Ni koauana, e na iai tabeua karina ni waeremwe imwain ae a karekea te utu te bwai are a bubuti ibukina. Ma Kristo e a kaman mwananga n airi ma ngaiia.
Ngkana ti kainnanoa are ti aki kona ni karaoia i bon iroura, ti kona n onimakinna bwa Iesu e na roko. Ao ti kona n onimaki bwa ngkai ti taningaia inanon te onimaki ibukin Ana kakai inanon maiura ke ni maiura ma naake ti tangiriia, E na bon boutokaira ni bwaai ake ti karaoi. E na boutokaira n te bwai are ti karaoi ni kabane rinanon te ingainga n nano, ao te maaku ao te nanokawaki are e tataningaira ngkai ti karaoi bwaai are e kairiira nakon reken te kainaomataki.
“Ko na nako mai ni kaaki baim I aona”
Te kamaiu tiaki ara bwai n anga, ma n ai aron Iairo, ti kona n uota Iesu Kristo te Tia Reirei n te Kamarurung, nakoia ake ti tangiriia. Iairo e ataia bwa bain te Tia Kamaiu e kona n tabeka temanna man te tabo are e korakai iai nakon nnen te kantaninga ao te korakora.
I noora anne iroun te tia anga te ota nakoia taan takakaro n te butibooro. Neiei e tibwaua ootan Kristo iaon te marae ni butibooro ni karekea te kona mairoun te tia Kamaiu ni karaoa Ana kamaiu. Man tauakin Otana i eta, neiei e buoka ikotakiia Iteraera.
Ngaira n tatabemaniira ti na kainnanoa ana kamaiu temanna riki irarikira. E ngae n anne e kakai rootaki n te aro are e na taraa ni kitaniira, ti kona n onimaki bwa Tamara are i Karawa e katauraoa te Tia Kamaiu are e kona ni buokiira ni kateirakeira man te bwarannano. Ao ti kona n raonaki Irouna, n ai aron are e karaoia au boto n te butibooro.
Ma tera ngkana a nakobuaka bwaai ngkai ko tabe n tataninga rokon Ana kakabwaia?
“Ko aera ngkai ko nanoa riki te tia Reirei?”
Ngke Kristo e tabe ni kaea ana auti Iairo, E bon waeremwe. E onrake te kawai, ao ngke E tabe ni karekea kawaina ribuakoia, te aine ae korakora ana onimaki, are e tataninga naba Ana kamaiu, e riinga kunnikaIna.
“Ba e taku, Ngkana tao I riinga naba ti kunnikaina, ao I a maiu,.
“Ao akea ba e a toki naba rikin nrara; ao e ataia i rabwatana ba e kamaiuaki man te aoraki arei.” (Mareko 5:28–29).
E kanga nakon nanon Iairo? E kanga unin Iairo n te waeremwe? Ngke e kitana ana auti, natina te aine, ea tia n roko n tokina are te mate. Ngkanne, ngke te Tia Kamaiu e kakaea te aine are e a tia ni kamarurungaki ao e taetae ma ngaia, temanna man ana auti Iairo e roko n nikira te rongorongo ae kananokawaki: “Akea bwa e a mate natim te aine: ko aera ngkai ko nanoa riki te tia Reirei?” (Mareko 5:35).
Ai kakabwaiara te aine are e a maan n tataninga! Ma ai nanokawakira tera iroun Iairo ma ana utu, ae e aki tau aia tai n tataninga! N tabetai ngkana ti mena inanon te tataninga, e kona ni matoatoa aron kateimatoan te kaantaninga bwa E na roko. Ma irouia Iairo ma ana utu, n te tai aei e a taraa n iremwe kantaningaan te kakai are a kaman kainnanoia. Natina te aine e a mate. Ko aera ngkai ko nanoa riki te tia Reirei?
Bukin tera? Ibukina bwa te tia are n tabetai ti katoka iaon te Tia Kamaiu akea nanona. E aki kabaeaki n tokin ara tai, ke Mwaakana e tianaki man otara n te bwai are e kona ni karaoaki.
Ngkana ti taratarai kakabwaia aika uarereke ngkai ti tataninnga rokon kakabwaia aika korakora, ti na noora te karaunano bwa E na bon kainaomataira (taraa Aramwa 58:11). Kamatoaki aikai a kona ni bitii nanora ao ni kamatoai ara onimaki Irouna. Riki ngkana e a taraa n tia n nako ara tai, E na bon roko naba; n am tai ni karekea te kakabwaia.
E kateirakea man te mate natin Iairo te Aine Iesu, iroun Gabriel Max / Peter Horree / Alamy Stock Photo
“Tai maku, ko na tii kakoaua.”
Ngkekei naba ngke e ongo te rongorongo ae kananokawaki te Tia Kamaiu, E tuanga Iairo, “Tai maku, ko na tii kakoaua” (Mareko 5:36). Ana taeka te tia Kamaiu nakon Iairo e kaota ingaingana ni kamatoa nakoira ngke ti tataninga. Ana mwakuri n ibuobuoki e aki motirawa, riki ngkana ti motirawa. E waekoa ni kaunga ana onimaki Iairo bwa e na waaki nako.
“Ao ngke e rin, ao E taku nako ia, Kam aera ngkai kam karongoa, ao kam tang? E aki mate te tei, ma e matu. …
“Ao E taua bain te tei, ao E taku nako ina, Tarita koumi; ae ai aron ae, Te teinaine, I taku nako im, Uti” (Mareko 5:39, 41).
E reke iroum anne? “E taua te teinaine, ni baina.” Iai mwaakan Baina. Beretitenti Howard W. Hunter (1907–95) e taekinna n te taina, “Ike e katokai iaona bain Iesu ao a maiu.”1 Tera ae ti kona ni karaoia ni katamaroa riki ni karekei Baina ni kamaiu? Ao tina kanga n riki bwa Baina ni buokiia aomata n tabekiia n aia tai ni maraki n nano ao ni bwarannano?
“Ao te teinaine e tei rake naba, ao e nakonako”
N te tai ae waekoa e oki te maiu nakon natin Iairo te aine: “Ao te teinaine e tei rake naba, ao e nakonako” (Mareko 5:42). Iai taai are a na konaaki iai aomata nako ni kataakiia ma e riai n reke korakoraia ni manga kataia riki. Iroura n tatabemaniira, kataakira ni kabane a kona n taraa n onoti ni kaokoro teutana—man bwarannano imwiin te konaaki n te marae nakon buan temanna ae tangiraki. A na bon roko te korakai. Ma E bon aki kona ni kitaniira, e ngae ngke e rang korakora te kangaanga ke taraan tein te kabanea are e na reke. N tabetai, E kariaia bwa tina rinanon kataakira ae kangaanga man korakora, bwa e aonga n takini baina ao ni kaoni n te maiu.
Ma kanikina n Ana Mwakuri ni Kamaiu—tanen te neera iaon baina—E kaoti nakoira ngaira tabena: “Nooria, I a tia ni koroi arami iaon nanon baiu” (1 Nibwaai 21:16). Ana mwakuri n ibuobuoki Kristo ngkoa, ngkai ao n tainako bon kateirakeara man te mate are ti aki kona ni birinako mai iai n rabwatara ao n tamneira, ao a kona ni karaoaki ni kabane rinanon ana karea ni kamaiu.
Ngkana a roko marakinnano ao kakaewenako akanne, ti kona ni katamnei bai ake a kaota te mwaake inanon baina are e uota tiaki ti te akoi ao te tangira ma te mwaaka n tokanikai. Man kamwakuran te onimaki irouna, kaokanbwai iroun te tia Kabooa te aonaaba e na tokanikai iaon bwaai nako ake ti kaitarai.
Ao ti kona n riki bwa reitan Baina nakoia aomata ake a kainnanoa ringakiia Irouna.
I kakoaua bwa ngaira n tatabemaniira tina kamarurungaki man aorakira ao tina bane ni kautaki man te ruanimate. Uringnga, riki ngkana ni kabane a namakina te konaaki, E na mena ikekei n arora baina ae mwaaka ni kamaiu. Iangoa te kimwareirei are e na roko ngkai E arora baina nakoim ao n taekinna, “I taku nako im, Uti.” Ao tina bane n uti.