“Ira Ana Banna ni Katooto Kristo: Tararuaia Naake a Kainnano,” Riaona, Maati 2023.
Ira Ana Banna ni Katooto Kristo: Tararuaia Naake a Kainnano
Man karaoan amwarake nakon kaekaan bwaai aika karina nakon mwakuri n ibuobuoki, a mwaiti kawai are ti kona ni kaota iai ara tangira nakoia kain rarikira.
I Will Believe [N na Kakoaua], iroun Liz Lemon Swindle, e na aki katotongaki
Ngkai taan iriira Iesu Kristo, membwa n ana Ekaretia Iesu Kristo ibukiia Aika Itiaki ni Boong aika Kaitira a kataia ni maiuakin tuua aika uoua aika korakora, n tangira te Atua ao n tangiriia kain rarikira (taraa Mataio 22:37–39). Irakin tuua aika uoua aika a korakora aikai ao ana banna ni katooto Iesu Kristo ngaia are e kaira te Ekaretia ao ana membwa n tararuaia naake a kainnano.
Ao e kanga te Ekaretia n ibuobuoki n tabeakiniia naake a kainnano? Ao a kanga membwa ni karaoi tibwanga n te mwakuri ae korakora aei?
Kawai n Ibuobuoki
Ngkai membwa n te Ekaretia, ti kataia ni kakaia naake a kainnano ni anganiia te ibuobuoki nakoia ni kabane natin te Atua n aki taraa aia reeti, abaia, ke aia aro.
Ti tararuaia naake a kainnano ni kawai aika a mwaiti, n raonaki ma:
-
Te aki mamatam ao kabonganan angabwai n aki mamatam.
-
Mwakuri n ibuobuoki imarenara.
-
Burokuraem n te riki n toronibwai.
-
Amwaraken te aonaaba, reirei, te ran ae itiaki, ao burokuraem ibukin kamarurung.
-
Te ibuobuoki ibukin baika a karina.
-
Karikirake n anganano n te komiunite.
Ngkai tabeua mwakuri n ibuobuoki n te Ekaretia a bubura, riki mwakuri aika a uarereke a kona ni karekea mwiina ae korakora. Aikai tabeua katooto n aroia kain te Ekaretia ni buokiia naake a kainnano.
Ni moan Beberuare 2022, Aika Itiaki ni Boong aika Kaitira i Poland a buokiia taan birinako mai abaia ma baoia, kanaia, ao katanaia.
Mwakuri n ibuobuoki ibuakon te Itabarara
RaeAnn ao Sterling Jarvis—membwa n te Ekaretia i Warsaw, Poland—aki ata te bwai ae a kantaningaia ngke a rineia bwa ana butimwaia taan birinako mai abaia nakon mweengaia. Ma a tauraoi n ibuobuoki n aaro nako ake a kona.
N te tai are e waaki iai te buaka i Europe, aia utu kain Ukrain a roko n aia mataroa n te aoa 1:00 n te karangaina. A tia ni mwananga n te raroa ae kaniia 500 te maire (800 km) ni karekea kamanoakiia. Ana utu Jarvises a butimwaia Maryna ao Serhi Bovt ma natiia teniman nakon mweengaia. Inanon te tai a karikirakea te tangira ae koaua ao te tabeaianga ibukiia ana utu Bovt. “Ngkana ko tibwa te tangira, e rikirake,” Maryna e taekina ana banna ni katooto Jarvises n te ibuobuoki. “E kaniira riki nakoira imarenara ao nakon te Uea.”
Ngkai kain te Ekaretia, ti kataia n iriira ana banna ni katooto te Tia Kamaiu man mwakuri n ibuobuoki nakoia ake irarikira. Aomata tiaki ae ana birinako man te buaka ke te bwainikirinaki bwa a na kainnanoa te ibuobuoki. Mwakuri nako n akoi n ara itera—n aki taraia bwa e uarereke—e kona ni karika te bitaki ni maiun te aomata n teimatoa n te raoiroi.
Te botanaomata ni buokanibwai
N ana nnen aroka i Laie Hawaii are e bwaibwai iai te Ekaretia, e raka iaon 310 utu ake a uniki aroka ibukin boutokakiia kain aia auti. N aia mwakoro n aba ae 1.25-te eka, utu aikai a uniki taro, tabioka, kumara, te mai, guava, ao kaai n amwarake riki tabeua ake a maiu iaon abaia.
Te onaroka e tararuaki irouia taanga aika mitinare ao a karekei boutoka mairouia mitinare tabeman ao membwa. Taan anganano aikai a buoka kaitiakan te aba, katauraoan te tano ibukin te ununiki, ao a reirei rabwakau iaon te ununiki.
Ibukiia mitinare aikai, membwa ao taan anganano, a mwaiti aomata ake a kainnanoi amwarake i Hawaii aika a kona riki ni kamaiuia i bon irouia n taren te mwakuri. Te komiunite e korakora riki ngkana aomata a uaia ni mwakuri n tararua te onaroka ao n ibuokanibwai n aia ununiki.
Ana karikirake te Ekaretia ibukiia te botanaomata e buoka karekean tania n amwarake, reirei, ran ae itiaki, ao mwakuri n ibuobuoki ibukin kamarurung ibukiia miron aomata n te aonaaba ni kabuta. Te Ekaretia e anga naba bwaai ni ibuobuoki ni kabirimwaka te toronibwai, n raonaki ma aia auti ni bwai bitiobi, tienta ni kamwakuri, titoan Deseret Industries, marooro ibukin Ibuobuoki n te Utu, kooti iaon te toronibwai, ao onaroka are e bwainna te Ekaretia ao orchards n ai aron te Laie Hawaii Crops Farm. Aikai karikirake ake a buokaki irouia membwa ao mitinare, ake a anga aia tai, tarena, ao bwaai ni ibuobuoki tabeua ni karika te bitaki ae korakora nakoia ake a kainnano.
Te Mwakuri n Iraorao
Inanon 2021, e kaniia 200 kain te Ekaretia ake a kaeka te wewete ibukin te ibuobuoki. A nakon taian tienta i Germany, te United States, ao tabo riki tabeua ni karaoi ibuobuoki nakoia e kaniia 55,000 taan birinako mai Afghanistan.
Angiia taan anganano a beku n taian tienta aikai inanon uoua ke teniua te wiiki, ao tabeman a tiku riki ni maan. Kain te Ekaretia a karekei kainnano aika kataweaki ibukiia naake akea katanaia man katauraoan amwarake, kunnikai, ao bwaai riki tabeua.
Aine n te Bootaki n Aine i Germany a nooria bwa tabeman aine mai Afghanistan a kabonganai aia kabaraaki buuia n rabuna iai atuia n onean mwiina rabunan atuia are a tataneiai iai, ake a tia ni bua ke n uruaki n te bwai are e riki n te marae ni wanikiba. Tititati n te Bootaki n Aine aikai a ikotaki n itui kunnikai ni Muslim ibukiia aine aikai ake a kainanoi—ni kaota te akoi ao te karinerine ibukiia tabeman, ni katikui kakaokoroaia ao aia koaua.
Titita Sharon Eubank, te tarekita n te Latter-day Saint Charities, e taku, “Ara mwakuri n tatabemaniira e aki kainnanoa te mwane ke te tabo ae raroanako; a ti kainnanoa ana kairi te Tamnei ae Raoiroi ao te nano ae tatauraoi ni kangai nakon te Uea, ‘Aio ngai; kanakoai’ [Itaia 6:8].”1
Te nano ni beku ngkana e roko te angibuaka bon anne bukina te Ekaretia n tainako teuana mai ibuakon moan kurubu ni kaeka—ibukin te buoka te tai ae uarereke ao te buoka ibukin te tai ae maan. Aia mwakuri kain te Ekaretia ao mitinare e buokiia naake a kainnano n namakina te kamanoaki, ni karekea te tararua n rabwata ao n te namakin, ao n namakina ana tangira te Atua rinanon aia mwakuri n akoi tabeman.
Where Are the Nine?[Anga ake Ruaman?] iroun Liz Lemon Swindle, e na aki katotongaki
Weteaki nakon te Mwakuri
Reirei ao Berita aika Tabu 4:3 e kangai, “ngkana iai nanomi ni kan beku iroun te Atua kam a weteaki nakon te mwakuri.” Man ni kabane ake e karaoi te Ekaretia, a mwaiti riki kawai ni karaoan te beku.
Angiin ana mwakuri te Ekaretia ake a barongaaki ibukin buokaia naake a kainnano a bon ti kona ni karaoaki man aia mwakuri n ibuobuoki mitinare ao membwa. Tiaki ni kabane a kona ni butimwaia utu ake a birinako mai abaia, n katauraoi kainnanoia aomata, ke ni kamrarai bwaai ni kabane ni ibuobuoki inanon te kangaanga. Ma aomata n tatabemaniia iai tibwangaia ae a na karaoia, ao ana anganano te aomata e namakinaki ao e kabonganaaki.
Teuana te kawai ae moan te kakaawaki ake anga membwa nakon te mwakuri aei bon rinanon te anganano n aki mamatam ao te mwane ni buoka ibukin kainnanoia te botanaomata. Anganano aika a tabu aikai a kabonganaaki ibukin buokaia naake a rang kainnanoia ao a karika te bitaki ae korakora inanon maiuia naake a buokaki. Membwa n te Ekaretia a kona ni buoka te humanitarian missions, ni karaoi kooti iaon te riki n toronibwai, ao n anganano n ana auti ni bwai te bitiobi ao n te Deseret Industries stores. Ko kona naba n tabeakiniia naake a kainnano rinanon ibuobuoki n te aono, anga raraa, katabeaki n te mwakuri n ibuobuoki, tataro, ao a mwaiti riki.
Ti bane ni weteaki nakon te mwakuri. Ti weteaki bwa tina iriira ana banna ni katooto Iesu Kristo ao n tangira te Atua ao n tangiriia kain rarikira. Man bwaai nako ake ti kainnanoia bon te nano ae tatauraoi.