“Beeron Au Taua ni Kauring,” Riaona, Maati 2023.
Bwanaaia Aika Itiaki ni Boong aika Kaitira
Beeron Au Taua ni Kauring
Ngkana I kaeka nakon te wirikiriki, tina kona ni karekea riki te tai n reireina Giuseppe te euangkerio.
Te bong teuana n ara katauraoi, ngai ma toau ni mitinare ti kawara te umwantabu i Parma, Italy. Ngke ti tabe ni mataiakina tamaroan tamnei ikekei, I noora te monk ae wareware ae uakaan. I karekea te wirikiriki bwa N na taetae ma ngaia ibukin ana Boki Moomon, ma I a manga maaku.
Tera aron te monk n te Katorika nakon te mitinare ni kakawari inanon te umwantabu ni katorika? E manga roko naba te wirikiriki, ma I manga kanakoa naba.
Tabeua te wiiki imwiina, mitinare ake uoman n ara auti ni maeka a roko ni kawariira ao a tuangiira ae a tia ni kawara te monk ae arana Giuseppe ngke a reitaki ma ngaia iaon te kawai. Imwiina ngke a tia n reirei ma ngaia, e butimwaea ana Boki Moomon.
Ngke a kaitibo mitinare ma Giuseppe n te wiiki are imwiina, e a tia ni wareki angiin te boki. E rang kukurei iai.
Imwain ae a manga kaitibo riki mitinare ma Giuseppe, toau e a kamwaingaki, ngaia are I a raoniia. Ngke ti nakon reireina Giuseppe n te cathedral, I aki kubanako n nooria bwa ngaia bon te monk are I wirikirikinaki bwa N na taetae nakoina mai imwaina.
Giuseppe e tuangiira bwa e wareka ana boki Aramwa, are e kabotaua ma te Abotoro Bauro. Ti baireia bwa tina anganna te kauoua n reirei, are ni banena bon te kakao nakon te bwabetito. Ni banen ara reirei, bon imwain are ti kaoa Giuseppe bwa e na ira ana banna ni katooto Iesu Kristo ni bwabetitoaki, beeron te umwantabu e a tang naba, ni kakubanakoira.
Giuseppe e mwaninga te tai ao e taku bwa e riai n raoniia raona ni monk ibukin te tataro n te tawanou. Imwiina e karautaeka, n taekinna bwa e aki tauraoi n taai akana imwiina ibukin aia bootaki monk ake e na iria. Kamatoakina bwa te ibonga e na karaoaki imwiina.
Ti bon kubanako bwa e a kanga ara tai n reireinna ae rang kakaawaki ni kona ni bua. Ngke arona bwa I moantaai ni kaekaa te wirikiriki are i karekea mai imwaina, e na kona n reke ara tai n reireina Giuseppe ao e na kona n reke ana tai ni kabanea warekan ana Boki Moomon. N au atatai, mitinare aki manga reireina riki teuaei.
Imwiin rikin anne, tangin beeron te taua e kauringai aron kakaawakin ao uarereken ara tai. N nikiran au mition, ni katoa tai are I ongo iai tangin beeron te taua, I kaungaaki riki bwa N na taetae nakon temanna are I kona reke au tai ma ngaia n taekina te euangkerio nakoina. N te bong aei, I teimatoa ni kataia n iri taian wirikiriki mairoun te Tamnei.