“I Anganingkami Au Rau,” Riaona, Maati 2023.
“I Anganingkami Au Rau”
Te taeka naba anne are e taekinna Iesu nakon Namani Kariraia n tairikin te buaka, E taku nakoira n tain te kangaanga inanon maiura: “Raoi, bwaka.”
Tamnei man Getty Images
Irouia au utu ao ngai, te winta ae mwaitorotoro n 1944 bon te tai ae kakamaaku ao ni kararaoma. Ma tamau ae raroanako n te aono are e boo iai te Kauoua ni buka n te aonaaba, tinau e korakai ni kamwarakeia aman natina ao ni kaabueia ngkai e rootaki mweengara n te buaka i Czechoslovakia.
Ni katoabong te kangaanga e rikirake ni kaan. N tokina, tinau e baireia bwa e na birinako nakon mweengaia ana karo i Tiaman maeao. N te anga teuana, e karekei tokara ngaira ni kabane iaon tewaana te kabanea n turein ibukiia taan birinako mai abaia are e nako mainiku. Rebwetaua aika uakaan, moamoa n raraoma, ao te bora ni baki a kauringiia te koraki iaon te turein bwa ti a mwananga rinanon mwaaken te tabo ni buaka.
N te tairiki teuana imwin tein ara turein ibukin katokaan bwaai, tinau e waekoa n otinako ni kakaea te amwarake. Ngke e a oki, e roko irouna te maaku, te turein are e uotiira ngaira natina ai akea!
E kaonaki n te raraoma ae bati, e kaotia n ana tataro nakon te Atua ao imwiina e waekoa ni kakaea te turein inanon te roo. E biri man kawain te turein teuana nakon teuana, ao man te turein teuana nakon teuana. E ataia bwa ngkana e nako ana turein imwain ae e reke irouna, e na kona n aki manga noorira.
Kangaanga Inanon Maiuira
N tain ana mwakuri te Tia Kamaiu n te maiu ae mamate, Ana reirei a ataia are E kona ni karekea te rau n tain te kangaanga inanon maiura. N te tairiki teuana, imwiin te bong ae bwanin n reirei irarikin taari, te Uea e tuatua bwa a na “nako mainikun te nama” n namani Kariraia (Mareko 4:35).
Imwiina ngke a tia n nako, Iesu e kunea ana tabo ni matu iaon te booti ao e a matu. E waekoa n roo karawa, “ao e roko te ang ae baibati, ao a baroa te boti nao, ma ngaia are e a kani kebo” (taraa Mareko 4:37–38).
Ti aki ataia bwa manra ana reirei ni korakai ni kabeta te booti, ma n tokin te tai a bon aki kona n tataninga. Ma te maaku, a tang, “Te tia reirei, ko aki mutiakina matera?” (Mareko 4:38).
Ngaira ni kabane ti bane ni kaitarai kangaanga aika a karina. Ni kangaanga ao kataaki inanon maiura ae mamate, ti kona n namakina te rawawata, bwaranano, ao te kakai un. A uruaki nanora bon ibukira ao ibukiia ake ti tangiriia. Ti raraoma ao ti maaku ao n tabetai e bua ara kantaninga. N taai akanne, ti kona n tang,“Te Tia Reirei, ko aki mutiakina matera?”
Ngke I kairake ao teuana kunau ae mamaten nanou, “Master, the Tempest Is Raging.”1 I kona ni katamneiai bwa I mena n te booti ngke “nao [a] urake i eta.” Te mwakoro ae rangi ni kakaawaki ae moan te tikiraoi n te kuna e kangai: “Te ang ma nao a na ongo iroum: Raoi, baka.” Imwiina e roko te rongorongo ae kakaawaki: “Akea te ran ae kona ni kainakoa te kaibuke are e wene iai ana Mwatita taari ao aonteaba ma karawa.”
Ngkana ti butimwaea Iesu Kristo, Uean te Raoi, inanon ara booti, ti riai n aki maaku. Tina ataia bwa ti kona ni karekea te rau ibuakon te buaka are e minotaki inanora ao ni katobibiira. Imwiin takaruaia ana reirei ibukin te ibuobuoki, Iesu “e tei rake, ao e boa te ang, ma te nama; ao e bati naba te ariki. Ao e bwaka te ang, ao e bati te aariki” (Mareko 4:39).
Te taeka naba anne are e taekinna Iesu nakon Namani Kariraia n tairikin te buaka, E taku nakoira n tain te kangaanga inanon maiura: “Raoi, bwaka.”
“I aki Anganingkami n Ai Aron te Aba”
N raoniia ana reirei, ti kona n titiraki, “Ao antai Teuaei, ngkae e ongo I Rouna te ang ma te nama?” (Mareko 4:41).
Iesu bon te aomata ae akea kabotauana. Ngkai Natin te Atua, E weteaki bwa e na kakoroa bukin ana mition ae akea riki ae e kona ni kakoroa bukina.
Rinanon ana Mwakuri ni Kamaiu, ma n teina ti aki kona n ataia n ae bwanin, te Tia Kamaiu e katoka Iaona “maraki ma te karawawataaki ao te kaririaki n aekaia nako” (Aramwa 7:11) ao “karawawataaki ao kaririaki n aekaia nako.”2
E ngae ngke akea ana bure, E korakai iaoia “ni kabane … ni kakoroi bukin bwaai ake e tangiri te momotiraoi” (Aramwa 34:16). N ana taeka Beretitenti Boyd K. Packer (1924–2015), Beretitenti n te Kooram n te Tengaun ma Uoman, “Akea te bure ae karaoia. Ma, ikotakin ni kabane kairua, te rawawata n nano ao te nanokawaki, te maraki ao te nanorinano, ni kabane aorakin te iango, nanokawaki, ao karawawataaki ae ataaki iroun te aomata—E a tia n rinanoi ni kabane.”3 Ao E tokanikai iaoia ni kabane.
Aramwa e taetae ni burabeti bwa te Tia Kamaiu “e na uota iaona te mate, bwa e aonga ni kabwara ana kabaebae te mate are e kabaeiia ana aomata; ao e na uota iaona mamaaraia, bwa e na on nanoia n te nanoanga ni kaineti ma te maiu n iriko, bwa e na ataia ni kaineti ma te maiu n iriko bwa e na kanga ni buokiia ana aomata ni kaineti ma mamaaraia.” (Aramwa 7:12).
Man mwaakan karawa e bungiaki nakon te kammarakaki, ao man ana tangira ibukira, Iesu Kristo e anga ngaia bwa e na kabooira, ni kakorakoraira, ao ni kamaiura. Bon ti rinanon te Mwakuri ni Kamaiu are ti kona iai ni karekea te rau are ti rang tangiria ao ni kainnanoia n te maiu aei. Ngke e berita Te tia Kamaiu, “I katuka te rau i roumi, I anganingkami au rau: I aki anganingkami n ai aron te aba, ngkana e anga. “A na tai rawawata nanomi, ao a na tai maku” (Ioane 14:27).
Maiun Iesu Kristo ao ana reirei e anganiira kawai n namakina Ana rau ngkana ti rairaki nakoIna.
Tamnein Kristo, iroun Heinrich Hofmann
Kawai nakon te Rau
Iesu Kristo, are e tau mwiin bwaai ni kabane, e kona naba ni kabebetei uotara. Iai mwaakana ni kamarurungiia aomata nako ao botanaomata. E a tia ni kaota te kawai nakon te rau ni koaua, ngkai Ngaia “Uean te Raoi” (Itaia 9:6). Te rau are e anga te Tia Kamaiu e kona ni bitiia aomata ni kabane ngkana natin te Atua a kariaia. Maiuna ao ana reirei e anganiira kawai n namakina Ana rau ngkana ti rairaki nako Ina.
“Reiakina taekau,” E taku, “ao ongo n au taeka; nakonako ma te nimamannei n Tamneiu, ao ko na karekea te rau mai irou” (Reirei ao Berita aika Tabu 19:23).
Ti reireinaki irouna ngkai ti tabekirake nanora n tataro, ni kamatebwaia maiuna ao ana reirei, ao n “tei … n taabo aika tabu,” n ikotaki ma te tembora (Reirei ao Berita aika Tabu 87:8; taraa naba 45:32). Nakon ana auti te Uea n tainako n aron amkonaa. Te tembora bon te katantan ae rau man kangaanga aika a rikirake n ara bong.
Raou aika tangiraki Beretitenti Thomas S. Monson (1927–2018) e reirei: “Ngkana ti nakon te [tembora], ngkana ti uring berita ake ti a tia ni karaoi inanona, ao ti na kona ni kaaitarai taian kataaki ao n tokanikai iaon taian kariiri. Te tembora e katauraoi kaantaninga ibukin maiura. E uota te rau nakon tamneira—tiaki te rau are e anga te aomata ma te rau are e taekinaki n te berita iroun Natin te Atua.”4
Ti Ongora n Ana taeka ngkai ti ongora Ana reirei inanon koroboki aika a tabu ao mairouia burabeti aika maiu, iriira Ana banna ni katooto, ao n taromauri n Ana Ekaretia, are ti iraorao iai, reireinaki, ao ni kamwarakeaki n ana taeka aika a raraoi te Atua.
Ti nakonako inanon te nimamannei n Tamneina ngkai ti tangira n ai Arona n tangira, kabwarabure n ai Arona ni kabwarabure, rairannano, ao ni karika mweengara bwa tabo ake ti kona n namakina iai Tamneina. Ti nakonako naba inanon te nimamannei n Tamneina ngkai ti buokiia tabeman, ma te kimwareirei ni beku ibukin te Atua, ao ni kataia n riki bwa “taan irira Kristo i nanon te rau” (Moronaai 7:3).
Mwaneka n te onimaki aikai ao mwakuri a kairi nakon te raoiraoi, e kakabwaiaira ni mwanangara n riki bwa ana reirei, ao ni uoti nakoira te rau ao te kantaninga.
“Kam na Karekea te Rau mai Rou”
N rotongitongin te bong iaon kawain te turein ririki aika a bwakanako, tinau e kaitara ma karaoan te rinerine. E kona n tekateka ao n nanokawaki n te kangaanga are a bua natina, ke e kona ni kamwakura ana onimaki ao ana kantaninga. I kakaitau bwa ana onimaki e katoka maakuna ao ana kantaninga e katoka raraomana.
N tokina, n te tabo ae raroa n te titeition, e a kunea ara turein. Ikekei, n tokin te tai, tia bane n ikotaki. Te tairiki anne, ao n tain buakan boong aika a mwaiti ao tairiki ake a roko, ana banna ni katooto tinau ni kamwakura ana onimaki e kamatoaira ngkai ti kantaninga ao ti mwakuri ibukin taai aika a na roko aika a tamaroa.
Ni bong aikai, a mwaiti natin te Atua aika a kunea bwa aia turein, naba, ea tia ni kamwaingaki. Aia kaantaninga ao miia ibukin taai aika a na roko e a tia ni uotakinako n te buaka, butin aoraki, ao ni buan marurungiia, aia mwakuri, aia reirei, ao naake a tangiriia. A bwarannanoia, a maroa, a nanokawaki.
Tariu ao mwaneu, raou aika a tangiraki, ti maiu n taai aika a kamamate. A onrake n te kangaanga aonaaba, e na motikaki taekan te aba, ao e na anaaki te rau man te aonaaba (taraa Reirei ao Berita aika Tabu 1:35; 88:79). Ma te rau e riai n aki anaaki mai inanora, riki ngkana tina rawawata, tang, ao n tataninga te Uea.
Ibukin Iesu Kristo ao Ana Mwakuri ni Kamaiu, ara tataro a na kaekaaki. Te tai bon ana bwai te Atua, ma I kakoaua bwa nanora aika a raraoi e na ataia bwa ni kabane ake a bua mairoura a na manga kaboaki mwiia, ao ana reke ngkana ti kabongana te bwaintangira mai karawa n te rairannano ao n teimatoa ni kakaonimaki.5
Tina kamarurungaki—n te maiu n rabwata ao n tamnei.
Tina tei n itiaki ao ni mimitong imatan te tabo ni motikitaeka.
Tina manga ikotaki ma naake ti tangiriia ni mimitongin te mangauti.
N te tai aei, e na karauaki nanora ao ni kaungaaki bwa ngkai ti katan iaon ana berita te Tia Kamaiu: “Kam na karekea te rau mairou” (Ioane 16:33).