“Ngkana E Roko Namakinan te Bwarannano, I Rairaki nakon Kristo,” Riaona, Maati 2023.
Kairake n Ikawai
Ngkana E Roko Namakinan te Bwarannano, I Rairaki nakon Kristo
Ma mwaitin bwarannano ake a riki ni katobibira, I aki koaua bwa tera ae e nanonaki ni katea aam iroun Kristo.
Tamnei iroun Getty Images, katokaaki bwa te katoto
N te rongorongo n te maungatabu ni kabuta ae tibwa nako, Beretitenti Henry B. Eyring, te Kauoman ni kauntira n te Moan Beretitentii, e taetae iaon taai ni kangaanga n te aonaaba: “Te Abotoro Bauro e koreia nakon Timoteo, ‘Ma ko na ata aei, ba ane a na roko tai aika kamamate ni boong aika kaitira’ (2 Timoteo 3:1).
“… Ao ikanne are e na rikirake ni kangaanga, aki bebete, kawakinan berita ake ti riai ni karaoi ao ni kawakin ni maiuakina ana euangkerio Iesu Kristo.”1
Ngke I ongo taeka aikai, I a namakina te aki rau. I a tia n rinanon kangaanga inanon mweengau i Venezuela. Ngaia are titiraki n aron, “N na kanga n tiku n nanoraoi ngkana I a namakina te bwarannano?” ao “N na kanga n ingainga nakon taai aika kakukurei n tai aika a na roko ngkai e a roo taai aikai?” ngkai I iangoi titiraki akanne n te tai aei.
Ma Beretitenti Eyring e anga bwainaorakiana. E taekina Ereman 5:12, are e taetae iaon katean aara “i aon te bwa are ara Tia Kabomwi, are Kristo.”
I a tia ni kakoaua n tainako te kibu aei bwa e koaua, ma katean aau iaon te Tia Kamaiu e taraa ni beebete taekinana nakon karaoana. E ngae n anne, ngkai I kaniiaki riki nakon Kristo, I a tia n nooria bwa a nakoraoi bwaai ni kabane nakoim ngkana am onimaki e matoatoa irouna. (taraa Reirei ao Berita aika Tabu 90:24).
Namakina te Kitanaki
Uoua te namwakaina n nako, I karekea te rongorongo ae kauruaki nano mairouia au utu. Bwaai ni kabane inanon maiuna a taraa n nakobuaka. I namakina te matenten, nanokokoraki, ao n rangi n raraoma n te aro are I a aoraki!
I aki oota bwa bukin tera ti kaitara te kangaanga ae aron aei ngkai i kataia ni bwaina te kakaonimaki. I titiraki ngkana iai te kairua ae I a tia ni karaoia. Taai aika a na roko e a taraa n akea te kantaninga, ao I namakina te kitanaki iroun Tamara are i Karawa ao Iesu Kristo.
I nuukan au kangaanga, I marooro ma raoraou. E tuangai te bwai ae I aki kona ni mwaninga: “I taku bwa te aro aei bon te tai ae tamaroa ibukim n iangoa aron am reitaki ma te Uea. N aki taraia bwa tera ae riki, e a nakoim am tai n rairaki Nakoina ibukin te ibuobuoki. Ngkana ko karaoia, E na anganiko te tangira ao te kabebeteaki are ko kainnanoia n te tai aei.”
Taeka akanne a bita au taratara. I rangi n un ao ni maraki ao n nanououa man bwaai ake a riki, ma iai au rinerine. N aki tabe ma te bwai are ti rinanona, tera te maaku are ti rinanona, ke te kangaanga are ti kaitara, Iesu Kristo e mena irarikira n tainako. Iai ara kona n rairaki nako Ina ma te onimaki, tiaki n raroanako mai Irouna, n tai ni kangaanga.
Anne arora are ti kakorakora iai aan ara onimaki Irouna ao n tei n nene n te kangaanga n te aonaaba. Man Rineakina.
N aron are e reirei Unimwaane D. Todd Christofferson man te Kooram n Abotoro n te Tengaun ma Uoman: “Ngkana ko mena inanon ana ai te tia kaitiaki, nakon ae kona kaota unim irouna, kaniiko nakon te Atua. Wetea te Tama n aran te Nati. Nakonako ma Tamneiia, ni katoabong. Anganiia aia tai bwa a na kaota Aia kakaonimaki nakoim. Kataia Kinaiia raoi ao ni kinako naba.2
Kristo e tataningaai bwa N na rairaki nakoina ibukin te ibuobuoki. Anne e aki nanonaki bwa E na bane ni kanakoi au kangaanga ke ni kaeti kairua inanon maiu ao au utu n te tai ae waekoa, ma E buokai bwa N na tamaroa riki, ni karekea te kimwareirei, ao ni kaitiakaki riki.
Inanon te tai, ngke I ukoukora te Tia Kamaiu rinanon te tataro, kamatebwaian koroboki aika tabu, ao te onimaki, E buokai ni kabwarai aia bure kain au utu ao ni kaoa te kimwareirei ni mang oki nakon maiu, riki rinanon tabeua kangaanga ake a teimatoa n tuai n nakoraoi.
Te Berita n te Kamanoaki
Aikai ni koaua bon taai aika a kamamate n te kabanea ni bong. Ti ongo taekan te buaka ao maningongo n te buaka, butinaoraki, kangaanga ni kanoan te bong—ao I kakoaua bwa iai riki aika matoatoa n taai aika imwaira. E ngae n anne, te kateitei iaon te bwa are Iesu Kristo ao onimakinana e na karekea nakoira n tainako te rau ao te kimwareirei, n aki tarai bwaai ake ti kaitarai. N aron are e reirei naba iai Beretitenti Eyring, “Ngaira ake iai ara tabeaianga ibukira ao ibukiia ake ti tangiriia, iai te kantaninga inanon te berita are e karaoia te Atua ibukin te tabo ae mano man taian kangaanga aika imwaira.”3
Ai korakorara ao ai tamaroara te berita anne. Ao I a tia n noora te berita anne ni koro nanona inanon maiu. I ataia bwa aio ana euangkerio Iesu Kristo are e kaokaki ao ngaia aan kakabwaia nako. Ngaia te ota, Ngaia ara Tia Kamaiu, ao ngaira Ana tiibu. Tina rineia ao tina rinea te onimaki.
E maeka te tia korokaraki i Zulia, Venezuela.