“Bwaai ni Kabane A Bane n Nakoraoi,” Riaona, Maati 2023.
Bwanaaia Aika Itiaki ni Boong aika Kaitira
Bwaai ni Kabane A Bane n Nakoraoi
Taraan aoa a na reitinako ni karokoa temanna te tia korokoro e nakon tinau n te ruu n tataninga.
Tamnein Russell M. Nelson iroun Eldon K. Linschoten
Ni moan te ririki 1980, tamau e rootaki buroona n te aoraki, e karaoaki te korokoro nakoina are ti kantaningaia bwa e na kabwaabwaka maiuna.
N te tai anne, te rabakau ae boou irouia taan korokoro e kabonganaaki i Uruguay. Taan korokoro a onea mwiin bwaibun te buro n te bwaibu ae karaoaki. N tokina, te mwakuri anne e a tabangaki ao e a tia ni kamaiuia aika a mwaiti.
Ibukina bwa te korokoro e irekereke ma te bitaki ae boou, tabeman taan kamatebwai n te buro a roko, ni mataku. Inanon te tai ni korokoro, tinau e tekateka ma te raraoma n te ruu n tataninga. Te aoa e taraa n reitinako.
Ti kimwareirei ngke ti ataia bwa e rangi n nakoraoi te korokoro. N otinakou man te ruu ni korokoro, temanna te tia korokoro e maenako ma ake tabeman ao e nakon te ruu n tataninga. Ngaia te tia korokoro are e roko nako Uruguay n tararua te korokoro.
E nakon tinau, e tei, ao e riinga angana n anganna kamatoan te rongorongo. Imwiina, e tarai matana, e taku,“Bwaai ni kabane a bane n nakoraoi.”
E bon eti te tia korokoro. Tamau e maiu inanon 24 riki te ririki, ni beku ibukin te Uea ma nanona ni kabane—ngkai e marurung—ni karokoa kabanean bongin maiuna.
N tain te maungatabu ni kabuta aika a tibwa nako, tinau e kauringaki taekan te roko ae onoti anne n ririki aika a mwaiti aika a tia n nako. Ni koauana, e kauringaki ni katoa tai bwa te tia korokoro anne—Beretitenti Russell M. Nelson—ae taetae nakoia aika itiaki.
Ni kabane ana burabeti te Uea a bane n onoti nakoira n aanga tabeua. Tabeman a onoti ibukina bwa a beku bwa Beretitentit n te Ekareia ngke ti uarereke. Tabeman a onoti ibukina a beku bwa Beretitenti ngke ti bwabetitoaki. Iroun tinau ao ngai, Beretitenti Nelson e onoti ibukina e ataia bwa e rawawata waakinan bwainaoraki nako a riinga tiaki ti te aoraki ma naake a tangiriia naba. E ataia bwa kain te utu a kainnanoa te kaunganano, korakora, ao te kamatoa ngkana marurungin ke maiun temanna ae tangiraki e a tokarengerenge.
Tina kakaitau n tainako ibukin ana taeka Beretitenti Nelson ni kamatoa n taai akekei i Uruguay ao ibukin ana beku ni maiuna ibukin Tamara are i Karawa ao ibukiia natina.