“Te ibuobuoki ao te Kaantaninga man te Maungatabu ni Kabuta,” Riaona, Maati 2023.
Bwanaaia Aika Itiaki ni Boong aika Kaitira
Te ibuobuoki ao te Kaantaninga man te Maungatabu ni Kabuta
I akikantaningaia bwa N na ongora n te marooro n te maungatabu ni kabuta iaon raoi te bwai are I rinanona.
Tamnein te tia koro karaki ma ana utu iroun Cody Bell
Imwiin bungiakin au moan nati, I rootaki man kakorakain mwiin te bung. Bon te tai ae rang tamaroa inanon maiu ibukina bwa iai natiu te mwane, ma I aki rinanon raoibwaninin kimwareireiu n reken natiu ibukina bwa I rang rawawata.
Inanon te tai ni kataaki aei, e mwaiti au tataro nakon Tamau are i Karawa. I bubutiia bwa E na buokai n rinanon te kataaki ae kangaanga aei. Ngkai e a roko te maungatabu ni kabuta n tain te bwaka, I tataro naba bwa N na karekea te raunnano man aia marooro taan kairiiri n te Ekaretia.
Ngke I ongora nakon taian marooro n tain te moan tetere n te maungatabu ni kabuta, I a moanna n namakina te raunnano. Ngkanne, inanon te kauoua n tetere, Unimwaane Jeffrey R. Holland man te Kooram n Abotoro n te Tengaun ma Uoman e taetae iaon te nanokawaki. E taku bwa te nanokawaki e kona ni karekea namakinan “ae ai aron te bwai ni mwakuri ae uruaki”1 (Taian Areru 31:12). I aki kantaningaia bwa N na ongo n te marooro ae bwanin taekan raoi te bwai are I rinanona.
Aio bon te tai ae onoti irou. Marooro a buokai n oota n ana tangira Tamau are i Karawa ae tangirai ao n atai kainnanou. E atai bwaai aika I rinanona. E tangiria ni buokai ao n anganai te kantaninga. E karaoa anne rinanon ana taeka Unimwaane Holland.