“Kateia Iutaia n Tauniia Mate,” Riaona, Maati 2023.
Kateia Iutaia n Tauniia Mate
Rataro, Mareta, ao Maria bon taari ake a maeka n te kaawa ae Betania. Bon raoraon te Tia Kamaiu, ao E roroko irouia n taai aika a mwaiti. N te taina n ana tai ni ibuobuoki, Iesu e kiitana Ioretan, are e mena iai Betania, ibukina bwa Iutaia n te aono a tangiria n tiringnga (taraa Ioane 10:39–40). Ngke e nako Iesu, Rataro e bwaka n aoraki, mate, ao e taunaki n aron kateia Iutaia (taraa Ioane 11:1–17).
Aikai tabeua man aia katei are a iria ni maten Rataro ao taunakina.
Imwiin maten te aomata, matan teuanne ke neienne a kamakiiaki. Te rabwata e kaitiakaki ma te boiarara n aron te nard, mura, ao te aroe (taraa Ruka 23:56; Ioane 19:38–40).
Kamataata n te tamnei iroun Noah Regan
Te rabwata e niniraki n te kunnikai ao e uotaki nakon mweengaia aia utu, are a kona aia koraki ao kain rarikiia ni kawaria (taraa Makuri 9:37).
N te taneiai inanon waniua te aoa ni mate, te rabwata e uotaki nakon te ruanimate iaon te bao bwa aonga ni kabane taan roko ni kona n noora te rabwata (taraa Ruka 7:12–14). Te aine ae kaira te mwananga. Kain te utu a raeuai kunnikaia n te kanikina ae a tang n nanokawaki.
Tabeua ruanimate a kaaraki man atibu (taraa Mataio 27:58–60). Te ruanimate iai bwangabwangana ae uarereke bwa aonga aomata ni bobaraaki ngkana a rin.
Te rabwata e kaweneaki iaon te kainiwene ae kaaraki man te atibu. Te ruanimate a rabunaki n te atibu ae mronron ae bubura n totokoia taan kimoa ke maan bwa a na aki rinnako.1
Imwiina ngke Iesu e kateirakea Rataro man te mate, Ana reirei a karekea bukina ae korakora n aia kantaninga nakon are a tii tang ibukin buan are a tangiria. A bon aki kona ni kakewea, ibukin bwa Iesu Kristo, “e aonga n ae akea ana tokanikai te ruanimate, ao a na bon akea kammarakin te mate,” (Motiaea 16:7).