“Riki Ngkana Ko a Kara, E Bon Aki Bwaka te Tangira,” Riaona, Maati 2023.
Rikirake ni Kara ma te Kakaonimaki
Riki Ngkana Ko a Kara, E Bon Aki Bwaka te Tangira
Ni weteakiia bwa kain te beretitentii n te Bootaki n Aine n aia kabanea n ririki, aine aikai a uota te taneiai ao te atatai nakon aia beku.
Rawetamnei iroun Richard M. Romney
“Tao bon ngaira te kabanea ni karatingotingo n te beretitentii n te Bootaki n Aine n te Ekaretia,” e taku Sharon Alexander. E a tibwa koro ana ka 89. Ao ana kauntira Marlene Peterson ao Dorothy Arnold ai 90 ao 91, aika a karineaki.
“Ngaia, ara nuuka n roro bon 90,” e taku Dorothy, ni ngarengare.
Te beretitentii n te Bootaki n Aine e beku n te mwaanga n te tabo ae a bon maeka iaiaomata i bon irouia i Ogden, Utah, USA. Te tabo ni maeka bon mweengaia kaara aika a mwaiti aika kain te Ekaretia, ao te beretitentii a kona n nooraki n rara iaon okoia ngkai a mwananga man te mataroa teuana nakon teuana, ni kamauriia aomata ao ni kakoaua bwa ni kabane a bane ni mweengaraoi.
N te taina, aomata man uoote n te tabo a karaoi kakawari n ibuobuoki n aron akanne. Imwiina te beretitenti n te titeiki e namakina te wirikiriki bwa e na kaungaia beretitentii n te mwaanga bwa ana butiia te Uea bwa antai kain te auti ae e kona ni beku n te nakoa are a na weteaki nako iai.
Ni Karekean Kakabwaia Aika a Mwaiti N na Kanga n Rawa
“Ngke e kanakoa te wewete te beretitenti n te mwaanga nakoiu bwa N na riki bwa te beretitenti n te Bootaki n Aine,” e taku Sharon, “I taku, I a tia ni karekei kakabwai aika a mwaiti ao N na kanga n rawa” Ngaia, ni kaekana, e karekei kaunganano n ataia bwa antai ana kauntira. “Marlene e moan roko moa n au iango,” e taku. “Ti a tia ni kaai ni mwakuri n te titeiki, ni katauraoi taian ara nakon te mwakuri n te tembora. I ataia bwa kainnabana e a tia ni mate n te tai ae tuai maan n nako, ao e ngae ngke e rawawata n anne, I ataia bwa e rangi n kakaonimaki.”
Ngkanne, imwiin te bootaki n toa, Sharon e taratara nako n te ruu, n ukoukora te kaunganano. “I noora Dorothy. E moangare nakoiu, ao I ataia bwa ngaia te kauntira are temanna. Te Uea e kairai nakoia ni kauoman, ao E aki kaairua iaoia ni kauoman.”
N Ai Aron te Utu ae Bubura
Sharon e taekinna naba bwa e kona n noora raoiroin karekeaia aomata man te tabo n tararua ni beku ibukiia tabeman n te tabo naba anne. “Ti a rang ni kaan riki nakon te bwai ae riki,” e taku. “Ti ataia bwa n tabetai e aki bane arora, n tabetai ti mwamwaninga, ao n tabetai ti a bon aki marurung. Ao ti ata arora ni ngare n te kangaanga ngkana ti uaia ni kaitara.”
“Aomata aika a maeka ikai kanga ai aron te utu ae bubura,” e taku Marlene. “Ti ikotaki n amwarake, ngaia are ti bon nonoriira teniua te tai n te bongina. Ngkanne n tabetai ti ikotaki naba inanon waaki ni kakukurei. Ngaia are I taku bwa e kaungaaki te beretitenti n te titeiki ngke e namakinna bwa iai aomata ikai aika a kona n ibuobuoki imarenaia.”
“Ti atai bwaai aika a riki man te bong teuana nakon teuana. Ti ataia ngkana iai ae kainnanoa te ibuobuoki ke ngkana iai ae aoraki,” e taku Dorothy.
N raonaki ma kakawari n te makuri n ibuobuoki ao buokaia tabeman n ibuobuoki, te membwa n te beretitentii e bairea te reirei n te Bootaki n Aine. A rineia taan maeka are e na weteaki bwa e na anga reirei, ao a karaoi bitaki ao a bairei aia tai ni kaineti nakoia tia reirei ibukin kainnanoia aomata nako.
Uringnga, te Uea e Tangiri Ngkami
“Ma oin tabera bon kauringaakiia taan maeka ake tabeman bwa te Uea e tangiriia,” e taku Marlene. “Ao ngkana ti karaoa anne, tina namakina naba Ana tangira.”
“Ngaira ni kabane iai ara kangaanga,” e taku Sharon. “Iai au kangaanga n te tai aei are e aki reke nimaua te namwakaina n nako. Ma ngkana I a namakina te nanokawaki ibukiu, I iangoia, ‘Eei, aio e bon aki kona ni kabotauaki ma are e rinanona te Tia Kamaiu.’ Ti roko ikai bwa tina tokanikai ao n rikirake. Ao riki n te roro ni kara, ngkana ko kariaia am taneiai bwa e na reireiniko, ko kona ni teimatoa n reiakinaki n aki toki.”
Ibukina bwa ngaiia n tatabemaniia iai ae a tia ni bua ake a tangiriia, kain te beretitentii a tia naba n reiakina ae bati iaon te nanoanga. A bon ata aron buokaia naake a kainnanoa karauan nanoia. Te katooto, inanon teuana te ririki Marlene a mate kain ana utu aika aman ao raoraona.
“Ibukina bwa ti a tia n rinanon taai aika kangaanga,” e taku, “ti kona ni buokiia tabeman n rinanon bwaai aika a kangaanga naba. Ngkana iai te bwai ae ko korakai iai, mwaninga taekana ao beku ibukiia tabeman. Anne te bwai ae e a tia ni buokai te nakoa aei ni karaoia.”
Membwa n te beretitentii a uoti taneiai aika a mwaiti ao atatai nakon nakoaia. A tia ni maeka ao ni mwakuri n tabo aika a mwaiti—California, Ohio, Wyoming, ao Utah. A tia ni beku n te tembora, n nakoa n te uoote ao te titeiki, n te Moanrinan, irouia Ataeinnaine, ao moanrinan ni buokaia te botanaomata. Ma Dorothy e tuai ni karekea te nakoa n te Bootaki n Aine, ni karokoa ngkai.
“Tera ana mooto te Bootaki n Aine?” e taku. “E Bon Aki Bwabwaka te Tangira.” Anne e koaua ngke ko kairake, ma e bon koaua naba ngkana ko a kara. Ngkai kain te beretitentii, ti reiakina anne ni katoabong.”
“I taku bwa e rangi n nakoraoi ikotakira ni mwakuri,” Sharon e taetae, ni kakeea matana, “ibukin te beretitentii ae nukan aia ririki ae 90.”