Kairake n Ikawai
Taeka n Reirei Tabeua ibukin Kaitaraan Taai aika a Kakamaku man Kararaoma aika ana Roko
Inanon maiu ao n nakoau, I a tia ni kaitarai kararaoma aika a mwaiti ao n ataia ae e kona Tamara are i Karawa ni kona ni buokiira n rinanona.
Ngke I uarereke, au utu a mwananga mai Tonga nakon te United States. Tamau te tia itau ngke ti maeka i Tonga, ao e waaki ara kataneiai ma ngaia n itau imwiin rokora n te States. Ana boto n iango bwa N na riki bwa te tiambion n te heavyweight n te aonaaba n te bong teuana. E reireinai bwa N na aki maaku. Ko aki kona ni maaku ni men inanon te tabo n itau ngkana ko tangiria ni kan moanna. Tamau tao e aki bati ni kakaonimaki n te Ekaretia n te tai anne, ma e reireinai ae mwaiti ni kaitaraan te kangaanga ao karekean te ninikoria ngkana i karekea namakinan te maaku.
Reiakinan te itau ae onoti e katauraoai nakon nakoau. I nakon te Brigham Young University iaon te tikaoratibu n te butibooro. Ao bon karaoan are a aranna aomata bwa te kabanea ni kakamaku n te marae ni butibooro—rawean te kare—I karaoia n tainako ma te mweengaraoi. I bon aki mamaaku. Ni koauana, I tatangiri kakaewenako n te butibooro.
Tamau e tangiria bwa N na karekea kinakiu n te takakaro—e bitaki nakon te butibooro, tiaki te itau. Ma I taku bwa au kataneiai e buokai ni uaia ni karekea te onimaki ao n ingainga ma te onimaki ao te kantaninga inanon te kararaoma.
Taman Vai e bukamarua ana roro natina n te marae.
Tamnei iroun Mark Philbrick / BYU © BYU Photo
Ngke te kairake n ikawai, ko kaitarai kangaanga aika a mwaiti ao bwaai aika a kakamaku—ana kangaanga temanna n aron te babaire ibukin te reirei, nakoa, mare, ao te utu. Ao ko kaitara naba ma kangaanga aika a tabangaki, n aron bwakan korakoran te mwane, kariiri n te aroaro, kangaanga n te aro n tautaeka, ao bon te buaka. Ma man te bwai are I rinanona, I ataia bwa ti rineia ni karimoa te Uea inanon maiura, E mena ikekei bwa e na kairiira rinanona ni kabane.
Te kakairi irouia Rao aika Raoiroi ao Aomata aika Raoiroi
I kabwaia ni karekeia raoraou aika raoiroi ngke I okira mweengau man au mition. Te rao are I kaitibo ma ngaia n te tienta ni kataneiai ibukiia mitinare e kaotai nakon te aine are e a riki bwa kainnabau rimwi. I aki kona n iangoia bwa e aki kakaawaki te koaua are raraom n tainako a bairea maium n tokanikai ke ni kabwaka. Raoraom ao taan tia reirei a kona ni buokiko ni karaoi babaire ake a na kairiko ni kaniiko riki ke ni kararoako mairoun te Atua.
Ngke I mena n te National Football League, I tararake nakon Gifford Nielsen, are e tatakakaro naba n te BYU imwain nakona nakon te NFL, are n tokin te tai e riki bwa te tia katanoata n te takakaro ao imwiina te Maungatabu ni kabuta n te Itingaun. I kaitara mangaia n te bong teuana ni maraen te golf, ao e anganai te taeka n reirei are e bita kawaiu n nakoau.
Ti tekateka iaon kaan te golf, ti ngai ma ngaia, ao imwiina, I tuangnga au babaire bwa N na nako n te terewition n aekakina imwiin banen au takakaro n te butibooro, e anganai ana taeka n reirei bwa N na aki reitinako ni karekea te aekaki n nakoa are e na kainnanoa tiku n te takakaro n te Tabati. N te aro anne, N na kona n tainako ni karekea te nakoa n te Tabati ao ni beku n te Ekaretia.
E rangi n beebete anne, ma bon te reirei ae I tuai n iangoia mai imwaina. Ao anne ae e bita kawain maiu.
Kamanoan Am Koaua
Angiin nakoau n te NFL a bon kakamaku man kararaoma. Ti 2 te betienti mairouia taan takakaro n te butibooro ae a reke nakon te NFL, ao e ngae ngke I kaina te tiim, I kona ni katukaki n te taina. Ni maiu n abwabwakin are I rinanona bon te kakabwaia ae korakora, ma te maiu n akean te bibitaki n te baire e matoatoa. E kainnanoa te onimaki ae bati.
N te NFL, ko kamwaingaki man te tiim teuana nakon teuana, te ririki teuana nakon teuana, ni mwamwananga nako ao n oki. E taraa ni kamaiu, ma angiia aomata aki noora iterana ae aki kamaiu. E matoatoa maiuakinana. Ao bon te kawai ae matoatoa naba irouia taanga, anne bukina e korakora te raure irouia taan takakaro aika a mwaatai.
Te bwai ae buokai bwa I ata te bwai ae I tangiria ao ae I kakoaua. I katea aau iroun Kristo, ao I teimatoa ni kakaraoi bwaai ni kabane akanne ake a kaniiai Nakoina ao Tamara are i Karawa.
Ko bae n tuai ni kaitara te nakoa n te kawai are e onrake n te kairoro ao te kariiri, ma irou, te riki bwa te tia takakaro ae mwaatai e kaotai nakon aekakin maiu ae rang kaokoro nakon are I taneiai iai. Te katooto, ngke ti roko ni kaawa aika bubura ao ni moan mwanangara, raou n takakaro a waekoa n tangiria n otinako n iri waaki aika kakaokoro ake aki bootau ma ana kainibaire te euangkerio, ao I a ataia mai ikanne bwa I aki kona ni maiuakina kawain te euangkerio ao ana kawai te aonaaba n teuana te tai. I aki kona ni kaeka “N na iangoia moa” bwa I aonga ni kaboraoi nanoia. N onean mwiina, I riai ni matoatoa n au onimaki ao ni kabwarabwara bukina ngkai I aki raoniia.
Vai ma buuna, Keala, n aia bong ni mare
Tamnein te Utu ni kukurein nanon te tia koro karaki
I tekeraoi ngke I mare inanon au tai n reirei n te kaoreti. Ngke I ira te NFL, buu ao natiu ae onoua ana namwakaina a raonai. Ti mareaki n te tembora, ao I atai nanon berita akanne ao bwaai ake I riai ni karaoi. Ngaia are N na bae n tuangiia kain au tiim, “Tiaki, I aki kakaraoa anne.” Ao ngkana a imanono, N bae ni kangai, “Ngai ma kainnanbau ti mareaki n ana auti te Uea are ti karaoi iai berita aika tabu. Berita akanne a kakaawaki riki irou nakon bwaai nako.”
Ao te bwai ae kamiimi ngkana a titirakinai titiraki akanne ao a bon kakoaua bwa te aekaki n aomata anne ngai, kain au tiim akanne a moanna ni katanai ao ni karinei au kainibaire ao au berita. E kainnanoa te ninikoria n kamanoa am koaua ao ni moanibwaia.
Kaitaraan kariiri aika a bati e bon kakamaku n te moan tai, ma ni katan iaon Tamara are i Karawa ao uringan kakaawakin ao nanon au berita ae tabu ni kaitaraan kairoro e buokai n tainako n tei ni matoa iaon kawain te berita n nakoau. Ko kona ni karaoa naba anne n aroaro nako ake ko mena inanona rinanon kawaim.
Iriira te Burabeti
I ataia bwa te kairake n Ikawai n taai aikai kam kaitarai kararaoma aika a bati ao te maaku ibukin taai aika a na roko. Ao ko bae n titiraki tera ae kona karaoia ao kona kanga n rinanona. Te kaeka ae beebete bon iriiran ana kairi te burabeti, Beretitenti Russell M. Nelson. Ngkana e taetae ana burabeti te Atua ao e anganiko n te bwai ae onoti, bon te bwai ae beebete n aron iriirakin te reirei anne.
I ataia bwa Beretitenti Nelson e tatangiria n ana rinanin bwaai aika a beebete ake ti kona ni karaoi n tei ni matoa inanon ara onimaki. N tabeua te ririki n nako, e a tia n anganiia membwa n te Ekaretia nimaua bwaai aika a na karaoi ni karikirakei ara onimaki, niamaua kawai ni karikirakei mwakuri aika tamaroa, teniua bwaai ake ko riai ni karaoi ni moan te ririki ae boou, ao e mwaiti riki.
E aki anga rinan bwaai aika a mwaiti. Ti bwaai aika a beebete. Ao ngkana ko karaoi bwaai aika beebete ao n teimatoa inanona, maium e na bitaki man kakaraoan bwaai aika a beebete akanne. Aan am onimaki e na matoatoa, riki ngkana iai aroaro aika kakamaku n te aonaaba. Karaoi bwaai akanne ao kona nakoraoi. Ko na katanaki.
E kauringai karakaina Naman n te O Tetemanti, te tia buaka are e reke irouna te reebera. E nakon Eria, te burabeti, are e tuangnga bwa e na nako ni kaitiakia n te karaanga are Ioretan itiua te tai. Te tia buaka e taku bwa te iango ni baba, ma aomata ake irarikina a kaunga bwa ngkai te tia kairiiri e na tii nako ni karaoia. Ao iai ana onimaki bwa e na nako ni karaoia—te bwai ae beebete. Ao e bon kaitiakaki. (Taraa 2 Uea 5:1–15.)
Ana utu Unimwaane Sikahema
Katikui am iango n taai aika a na roko ni bain Tamara are i Karawa
N te tai aei, tao I aki riki bwa te tia itau, ma I reiakina te bwai teuana ni kaitaraan te maaku. Ma babaire ni kabane ao kakaewenako ake ko kaitarai n te tai aei ngkai te kairake n Ikawai, I bubuti ngkami bwaai ni kabane ake kona karaoi ukoukori ao kawakin ana wirikiriki te Tamnei iroum n tainako. Anne te king. Ngkai e a tibwa tia n reirei Beretitenti Nelson: “Mwakuri aika a tamaroa a buokiira inanon te maaku ao te tabeaianga are a reke man te butinaoraki, tunami, rebwetauan te warekeno, ao te buaka. Korakoran te maiu n tamnei e kona ni kaitarai ana buaka Tatan aika a aki toki ao ni urua ana mwakuri ni kouta nako aan maiura ae raoiroi.”1
Ngke I uarereke riki ao i kaitara te koaua ni mwaing nakon te aba ae boou bwa te tia mwamwananga, I aki kona n iangoia bwa te maiu e na aki boo ma te kararaoma. Ngkai I a tia n reitinako ni kaitarai kararaoma rinanon maiu ao nakoau, I ataia bwa ngkai ana reirei Kristo, ti kona ni kaitara ma aekakin nako kakamaku ke kangaanga iaon kawaira.
Ngkai ko otabwaniniiko ma aomata aika raoiroi, ni katea ao n tei ibukin am koaua, ao n iriira te burabeti, taai aika a na roko e na aki taraa ni kakamaku. Ao ko na kona ni waaki nako ma te onimaki n aki tabe ma te maaku ke kararaoma. Ngkana ko katikui taai aika a na roko inanon bain Tamara are i Karawa ae tatangira, ko kona n onimaki bwa E na mena ikekei ibukim n tainako.