Welcome Niini nga Isyu

Ang Pagdapit sa Manluluwas sa Pagpaambit sa Iyang Kahayag

Ang Dalan Paingon sa Emmaus, ni Wendy B. Keller, sa maayong kabubut-on sa Havenlight

Sa wala pa Siya mikayab sa langit, ang nabanhaw nga Kristo midapit sa Iyang Apostoles sa Bag-ong Tugon nga mamahimong usa ka saksi Kaniya “hangtod sa kinatumyan sa kalibotan” (Mga Buhat 1:8). Nadasig niini nga responsibilidad, ang Apostoles “wala mohunong sa pagtudlo ug sa pagwali nga si Jesus mao ang Kristo” (Mga Buhat 5:42).

Sa iyang artikulo niini nga isyu, usa ka Apostol sa modernong panahon, si Elder Quentin L. Cook, nagpasabot sa unsa nga paagi kita makapaambit sa ebanghelyo sa Manluluwas bisan sa atong mga kakulang. Siya misulat, “Samtang kita mosunod sa ebanghelyo, mohigugma ug moserbisyo sa uban, mobarog nga lig-on sa atubangan sa tintasyon ug pagpanggukod, ug magpamatuod sa pulong ug buhat, madani nato ang uban ngadto kang Jesukristo” (pahina 4).

Pinaagi sa pagpaduol sa atong kaugalingon ngadto sa Manluluwas, kita nagsangyaw pinaagi sa pagpamatuod ug ehemplo. Siya maanaa taliwala kanato, sama sa akong gipasabot sa akong artikulo niini nga isyu, kon kita motahod sa atong mga pakigsaad ug magtinguha sa Iyang tambag pinaagi sa mga pulong sa mga propeta (tan-awa sa pahina 40).

Sa atong pagtuon sa mga pangalagad sa Apostoles diha sa Dali, Sunod Kanako niining bulana, atong pamalandongan ang atong kaugalingon nga katungdanan ug tawag sa pagpaambit sa kahayag sa Manluluwas ngadto niadtong naglibot kanato. Si Kristo dugay nang mikayab ngadto sa langit, apan samtang kita mangamuyo Kaniya nga “[mag]pabilin uban kana[t]o” (Lucas 24:29) karon, Siya mapailobong motabang kanato sa atong mga paningkamot sa pagsunod sa ebanghelyo.

Elder Patricio M. Giuffra

Sa Seventy