“Nagtuo Ka Ba sa Dios?,” Liahona, Hulyo 2023.
Mga Tingog sa mga Santos sa Ulahing mga Adlaw
Nagtuo Ka Ba sa Dios?
Samtang ang akong higala mipakigbahin sa iyang mga kabalaka, usa ka kalit nga bul-og sa kahibalo ang miabot kanako.
Paghulagway pinaagi ni Katy Dockrill
Samtang nagdako, wala gayod ako sukad magduhaduha sa kamatuoran sa ebanghelyo. Sa pag-abot nako sa pagka-tinedyer, hinoon, ako nakapangutana kon aduna ba gayod akoy pagpamatuod o midawat lang sa unsay gituohan sa akong mga ginikanan ug mga higala. Ako nag-ampo nga ako unta makahibalo nga ang ebanghelyo tinuod.
Bisan pa sa akong mga pakigbisog, usa ka batan-ong babaye nga akong nahimamat sa akong kolehiyo sa komunidad miingon nako nga iyang nabati nga ako nakasabot sa akong katuyoan ug direksyon sa kinabuhi.
“Nagtuo ka ba sa Dios?” siya nangutana nako.
Gisultihan nako siya nga ako nagtuo ug nga ang akong simbahan nagtudlo sa atong relasyon sa Dios ug sa katuyoan sa kinabuhi. Gisultihan usab nako siya kabahin ni Propeta Joseph Smith ug sa Pagpahiuli. Siya naminaw og maayo.
Pagkasunod Dominggo didto sa simbahan, nagkuha ko og mga gagmayng basahon kabahin ni Joseph Smith ug sa plano sa kaluwasan alang sa akong higala. Human siya nakabasa niini ug nagsugod sa pagbasa sa Basahon ni Mormon, ako siyang gidala sa simbahan.
Wala madugay giingnan ko niya nga suod kaayo siya sa iyang magulang nga lalaki. Siya nahimong stunt pilot nga nagpasundayag sa lokal nga mga pasundayag sa kahanginan. Subo lang, sa ting-init sa wala pa kami magkaila, namatay siya samtang nagpalupad sa usa ka pasundayag. Nahugno siya sa iyang kamatayon ug nabalaka kabahin niya tungod kay miangkon siya nga adunay pagduhaduha sa kinaiyahan sa Dios. Siya nag-ampo aron mahibalo kon unsa kaha ang iyang kahimtang ug pagkabutang atubangan sa Dios.
Samtang siya mipakigbahin sa iyang mga kabalaka, usa ka kalit nga bul-og sa kahibalo ang miabot kanako. Kini usa ka pagbati sa lunsay nga kamatuoran ug kahayag. Akong nasabtan nga ang among panagkaila wala mahitabo nga sulagma lang. Kondili, ang Dios nakadungog ug mitubag sa kinasingkasing nga pag-ampo niining nagmasulub-on nga batan-ong babaye.
Ako nahimong mapaubsanon sa pagkahibalo nga ang Langitnong Amahan nakaila kanako ug mikonsiderar nako nga takos nga mahimong himan sa Iyang mga kamot sa pagtubag sa iyang pag-ampo. Nasabtan nako ang Iyang dako nga kaalam sa paggamit niini nga kasinatian aron usab sa pagtubag sa akong pag-ampo nga makahibalo nga ang ebanghelyo tinuod.
Human makapangandam, nag-impake ko sa akong mga bag alang sa labing nindot nga duha ka tuig sa akong kinabuhi. Sa laing bahin, ang akong higala naminaw sa mga leksiyon sa mga misyonaryo kauban sa iyang igsoon nga babaye. Silang duha mipasakop sa Simbahan ug dayon nagserbisyo og mga misyon. Human sa akong misyon, ang akong higala mihangyo nako sa paghimo og mga ordinansa sa templo alang sa iyang igsoon nga lalaki.
Ako nakahibalo nga ang Dios naminaw ug motubag sa kinasingkasing nga mga pag-ampo, bisan usahay sa pamaagi o panahon nga wala nato dahoma.