Pagsuporta sa mga Miyembro nga Nakasinati og Diborsyo

Ni Brittany Beattie

Mga Magasin sa Simbahan

Ang Langitnong Amahan motabang nato nga makahibalo kon sa unsang paagi nga labing makahatag og luwas ug maabiabihon nga palibot diha sa atong mga ward ug mga branch alang niadtong nadiborsyo na o nagpadayon pa ang diborsyo.

Imahe

usa ka balay nga makita sa larawan nga natunga

Duha ka tawo sa ward nahimong single sa hapit parehas nga higayon, ang matag usa human sa mga tuig sa kaminyoon sa ilang mga asawa. Sa dihang ang unang lalaki nahimong single, ang ward kanunay nga mitabang, mihatag og mga pagkaon, ug nangita og mga paagi aron masiguro nga siya dili mobati nga nag-inusara. Alang sa ikaduha nga lalaki, kini nga pagpangalagad wala mahitabo, ug siya napasagdan nga mibati nga nahilayo ug dili patas.

Unsa ang kalainan tali niining duha ka lalaki? Ang una nabiyudo ug ang ikaduha nadiborsyo. Samtang ang nadiborsyo nga lalaki mipakigbahin niini nga kasinatian kanako, ang iyang pangamuyo yano: mahimo ba nga tabangan nato ang mga miyembro sa Simbahan nga mas masabtan unsaon pagpangalagad niadtong kinsa nadiborsyo ug sa pag-ila nga sila sa gihapon adunay patas, bililhon nga luna diha sa mga ward ug mga branch?

Daghang ward ang nakahimo og nindot nga buluhaton sa pagpangalagad niadtong mga nakasinati sa mga epekto sa diborsyo, apan ang pangamuyo niini nga tawo makagiya kanatong tanan sa pagpangutana kon duna pa bay usa ka butang nga mas maayo pa natong buhaton. Kini nga panginahanglan nga mobati nga gidawat ug gisuportahan may kalabotan sa nagpadayon nga pagdapit sa atong mga lider sa Simbahan—sa paghigugma sa tanan nga naa sa panon sa Dios ug sa pagtabang nila nga mobati nga gidawat ug luwas diha sa atong mga istaka sa Zion.¹

“Bisan unsang higayon nga atong gibayaw ang usa ka tawo kita sa kinatibuk-an nagmugna og mga dapit sa kasigurohan alang nila.”² Ang atong mga ward ug mga branch kinahanglan mahimong usa niadto nga mga dapit samtang kita magtinguha sa pagsunod sa duha ka dagkong sugo sa paghigugma sa Dios ug sa paghigugma sa uban sama sa atong mga kaugalingon (tan-awa sa Mateo 22:37–39). Ang mosunod nga baroganan makatabang nato nga makahibalo unsaon nga mas masuportahan kadtong naa sa atong mga ward ug mga branch nga nakasinati o nagsinati og diborsyo.

Hinumdomi Nga ang Diborsyo Naglakip og mga Emosyon

Tungod kay kita nakahibalo sa sukaranan nga doktrina sa mahangtoron nga kaminyoon ug sa gahom sa pakigsaad sa pagselyo diha sa plano sa Dios sa kaluwasan, ang diborsyo makapasakit kaayo sa kasingkasing. Apan dili tanan ang mobati og sama niana mahitungod sa diborsyo. Si Presidente Dallin H. Oaks, Unang Magtatambag sa Unang Kapangulohan, nagtudlo nga ang diborsyo “talandogon nga hisgotanan tungod kay kini mopukaw sa gamhanang pagbati sa mga tawo nga naamong sa nagkalainlaing mga paagi. May pipila nga nagtan-aw sa ilang kaugalingon o sa ilang minahal isip mga biktima sa diborsyo. Ang uban nagtan-aw sa ilang kaugalingon isip mga natabangan niini. May pipila nga nagtan-aw sa diborsyo isip timailhan sa kapakyas. Ang uban nag-isip niini nga lutsanan sa kaminyoon.”³

Imbes nga maghunahuna kon giunsa sa usa ka tawo nga nakasinati og diborsyo pagtan-aw ang ilang kahimtang, pag-andam sa pagpaminaw kon kanus-a ug sa unsang paagi nga andam na ang tawo. Ikonsiderar ang pagpangutana, “Unsaon nako nga mahimong usa ka suporta nining higayona?” o “Sa unsang mga paagi nga kami makasuporta nimo samtang nagpadayon o gani inigkahuman sa imong diborsyo?”

Mga Pangutana nga kinahanglang Hunahunaon:

Sa unsang paagi kaha nga ang mga indibidwal makasinati og nagkadaiya nga mga pagbati sa lainlaing higayon matag adlaw, semana, o bulan? Unsaon nako nga mahimong mahunahunaon ug makasuporta atol sa matag usa niadto nga mga emosyon?
Unsaon nako paghimo sa akong kaugalingon nga madawaton sa pagpadayag kon unsaon pagtabang sa nagkalainlain nga higayon?
Unsa nga mga pagbanabana ang akong gihimo nga tingali kinahanglan nako nga kalimtan aron mas makapangita ug makabuhat sa pagpadayag kon unsaon pagtabang?

Imahe

usa ka kasingkasing nga naglutaw ibabaw sa kamot

Tutoki ang Paghigugma Imbes ang Paghukom

Sa mga butang nga sama sa diborsyo, kita panagsa ra, kon aduna man, nga makahibalo sa tanang detalye nga maoy hinungdan sa diborsyo sa magtiayon—ug dili na kinahanglan pa nga mahibalo. “Kon ang diborsyo mahitabo, ang mga indibidwal adunay obligasyon sa pagpasaylo, pagbayaw, ug pagtabang kay sa pagpanghimaraot”;⁴ kini tinuod alang sa magtiayon ug niadtong naglibot kanila. Kinahanglan kita nga magmabinantayon sa pagtutok sa paghigugma sa uban, dili mohukom kanila, bisan kinsa pa sa mga magtiayon ang atong suod.

Imbes nga motutok sa paghukom, kita makatutok sa paghigugma ug panaghiusa, sama sa gitudlo ni Sister J. Anette Dennis, Unang Magtatambag sa Kinatibuk-ang Kapangulohan sa Relief Society:

“Makapila kita mohukom sa uban base sa ilang dayag nga panagway ug mga aksiyon, o kakulang sa paglihok, kon kita hingpit nga nakasabot, kita molihok hinuon uban ang kapuangod ug tinguha sa pagtabang imbis modugang ngadto sa ilang mga palas-anon pinaagi sa atong paghukom? …

“Kita gisugo sa paghigugma sa uban, dili mohukom kanila. Hunongon nato ang paghukom sa uban; dili kini atong responsibilidad. Hinuon, dawaton nato ang pagdapit sa Manluluwas sa pagsunod Kaniya sa pagpakita og gugma ug kapuangod. …

“… Ang tanan kinahanglan nga mobati nga sila gayod nahisakop ug nga gikinahanglan diha sa lawas ni Kristo.”⁵

Mga Pangutana nga Hunahunaon:

Unsa ang akong mabuhat aron mas makatutok sa paghigugma sa uban sama sa gihimo ni Jesukristo?
Aduna bay mga paagi nga ako naghukom sa usa ka tawo, lakip na ang pagpangita o paghatag og sayop, nga tingali maoy nakapugong nako aron mahatag ang gikinahanglan nga suporta?
Unsa ang akong mabuhat aron mas mobati sa gugma sa Dios alang sa uban?

Pangita og mga Paagi aron Sila Mahisakop

Pinaagi sa diborsyo, ang mga indibidwal kasagaran mawagtangan og mga panaghigalaay nga nagagikan sa mga higala o pamilya sa ilang kanhi bana o asawa. Ug unsa ang mahitabo kon ang mga panaghigalaay naugmad atol sa kaminyoon, ug ang mga higala tingali dili na pwede nga modapit sa kanhi nga managtiayon sa mga kalihokan sa samang higayon?

Usa ka sister ang mipakigbahin nga siya ug ang iyang bana kanunay nga motambong og sinemana nga gabii sa mga dula kauban ang mga higala sa iyang ward. Human sa diborsyo, siya naguol sa dihang ang mga pagdapit alang sa gabii sa mga dula mihunong tungod kay mga magtiayon lamang ang mitambong. Lain nga sister ang mipakigbahin nga daghan sa mga miyembro sa ward ang naghunahuna nga tungod kay usa na siya karon ka nag-inusarang inahan, wala na siyay oras sa pagtambong sa mga kalihokan uban sa mga higala sama sa iyang gibuhat kaniadto; mao nga, siya wala na nila gidapit aron dili siya mobati og kaguol nga dili makatambong. Apan, kini maoy mipabati niya nga nahilayo ug nag-inusara. Kini nga sister mipakigbahin nga nindot unta ang bation nga padayon nga dapiton (bisan kon dili siya makatambong)—aron makahibalo nga ang uban ganahan nga naa siya didto.

Ang matag sitwasyon lahi, apan “kitang tanan nanginahanglang mobati sa madasigon nga kamot sa panaghigalaay ug makadungog sa lig-on nga pamahayag sa hugot nga pagtuo.”⁶

Mga Pangutana nga kinahanglang Hunahunaon:

Unsa nga mga pagpahiangay sa mga kalihokan ang akong mahimo aron matabangan ang mga miyembro nga single nga mobati og parehas ka komportable sa pagtambong sama sa mga minyo nga magtiayon?
Sa unsang paagi nga ang among ward makahatag og dugang nga mga kahigayonan sa pag-apil sa mga kalihokan nga mohaom sa mga panginahanglan sa mga miyembro nga diborsyado?
Unsa nga mga kalihokan ang tingali makatabang sa akong higala nga makaserbisyo o makatampo, labi na kon ang iyang pagsalig kinahanglan nga mabalik human sa usa ka lisod nga pakigrelasyon?

Imahe

mga tawo nga nag-alirong

“Paniid Una, Dayon Pagserbisyo”⁷

Kadtong mga nakasinati og diborsyo nag-atubang sa mga kausaban sa pangwarta, mga eskedyul, mga pagbati, inadlaw-adlaw ug tinuig nga mga tradisyon, mga kahimtang sa pagpuyo, ug daghan pa. Kini tinuod alang sa mga hamtong ingon man sa ilang mga anak, nga tingali maoy mag-atubang sa dugang nga mga responsibilidad sa ilang mga panimalay.

Ang mga konseho sa ward o branch mahimong mokonsiderar unsaon sa pagsuporta sa matag sakop sa pamilya, lakip na ang mga bata. Isip mga indibidwal, kita usab adunay daghan nga mga oportunidad nga makakita sa mga panginahanglan ug dayon mainampoong molihok sa personal nga pagpadayag aron makatabang sa pagtuman niini.

Usa ka sister ang napanalanginan sa dihang ang usa ka silingan nakaamgo nga ang iyang kanhi bana maoy maghimo sa tinuig nga paglimpyo sa nataran matag tinglarag, lakip na ang mga pangbisbis, ug mitanyag sa paghimo niini alang niya o ipakita niya kon unsaon kini paghimo. Usa ka single nga amahan ang napanalanginan sa dihang ang mga silingan naghatag og mga ideya alang sa masaligan nga mga tigbantay og bata sa iyang bag-o nga dapit.

Ania ang uban pa nga mga paagi nga ang mga miyembro sa ward nakatabang sa mga pamilya:

Ang mga lider sa ward, kabatan-onan ug Primary nagpakita og mga ehemplo sa mga impluwensya sa pagka-amahan ug pagka-inahan nga haom sa mga kinabuhi sa mga bata.
Mga gasa sa Pasko ang gipanghatag, ingon man kwarta nga makatabang alang sa mga gastohanan sa misyon.
Sobra nga pagkaon gikan sa mga komperensiya sa kabatan-onan o mga kalihokan ang gipadala sa panimalay ngadto sa pamilya.
Ang mga miyembro sa ward mitambong sa mga kalihokan sa isport sa mga bata.
Ang mga konseho sa mga magtutudlo naghisgot kon unsaon nga magmanggihunahunaon sa mga anak nga gikan sa nagdiborsyo nga panimalay, labi na sa mga leksiyon mahitungod sa mga pamilya o kon ang mga anak motambong sa ward kausa sa duha ka semana lamang kon sila anaa sa piho nga ginikanan.
Usa ka mas edaran nga magtiayon ang misagop sa pamilya nga adunay nag-inusarang ginikanan.

Mahimo usab nato nga hunahunaon nga ang mga indibidwal ug mga pamilya magkinahanglan og panahon aron maanad sa ilang bag-o nga mga sitwasyon. Pagmasinabtanon sa paghatag nila og higayon nga mamaayo ug mouswag sa tukma nga panahon sa Dios ug sa ilaha, dili sa atoa.

Mga Pangutana nga kinahanglang Hunahunaon:

Unsaon nako sa pagpalig-on ang usa ka nagpadayon nga panaghigalaay aron kadtong nagsinati og diborsyo mobati nga komportable sa pagdawat og tabang kon ila kining gikinahanglan, bisan kon dili kini karon dayon?
Unsa nga “mga una” ang tingali piho nga lisod alang sa pamilya, sama sa unang higayon nga ang mga anak dili kauban sa usa ka ginikanan atol sa holiday? Unsaon nako paghatag og dugang nga panaghigalaay atol niadto nga mga higayon?
Unsa nga mga kapanguhaan ang tingali gikinahanglan sa pamilya nga pwede ko nga makatabang, o unsaon kaha nako pagmugna og koneksyon sa uban nga adunay mga kahanas sa pagtabang?

Samtang kita mainampoon nga mangita unsaon nga mas makasabot ug makapangalagad niadtong kinsa nadiborsyo, kauban sa ilang mga pamilya, kita mahimong mobati ug mopaambit og kabahin sa gugma sa Dios alang sa tanan Niyang anak.

Ngadto Niadtong Kinsa Nadiborsyo

Samtang usa kini ka panalangin kon ang uban motabang kanato, adunay daghang mga butang nga atong mabuhat aron motabang nga makahimo og atong kaugalingon nga mga koneksiyon. Ania ang pipila ka ideya sa pagbaton og positibo nga kasinatian sa inyong ward o branch:

Pahibaloa ang mga lider unsa ang inyong mga panginahanglan ug unsa nga tabang ang magamit kaayo.
Paghimo og imong kaugalingon nga mga oportunidad alang sa koneksiyon. Paghatag og mga pagdapit sa uban alang sa mga sosyal nga kalihokan, bisan ang usa ka butang sama ka yano sa pagkuyog og lakaw o pagtupad og lingkod diha sa simbahan. Sama sa gitudlo sa Ginoo diha sa Doktrina ug mga Pakigsaad 58:27–28, “Ang mga tawo kinahanglan nga matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa ilang kaugalingon nga gawasnon nga kabubut-on, ug magpahinabo sa daghan nga pagkamatarong; kay ang gahom anaa kanila, diin sila mga tinugyanan ngadto sa ilang mga kaugalingon.”
Tingali adunay mga higayon diin ang mga tawo makasulti og sayop nga mga butang o wala masayod kon unsa ang buhaton. Pagmasinabtonon niadtong naningkamot sa pagsuporta nimo apan tingali wala masayod kon unsaon. Si Elder Jeffrey R. Holland sa Korum sa Napulog Duha ka Apostoles nagtudlo: “Pagmapailubon kabahin sa tawhanon nga kahuyang—ang inyong kaugalingon ingon man usab niadtong nagserbisyo uban ninyo niini nga Simbahan gipangulohan sa mga boluntaryo, mortal nga mga lalaki ug babaye. Gawas lang sa Iyang bugtong hingpit nga Anak, ang dili hingpit nga mga tawo mao ang gikatambayayong sa Dios. … Kon inyong makita ang pagkadili hingpit, hinumdomi nga ang limitasyon dili diha sa kabalaan niini nga buhat.”⁸

Usa ka sister ang mipakigbahin niini nga mga ideya nga nakatabang niya nga tarongon ang iyang kinabuhi human sa diborsyo:

Pagpabilin nga aktibo sa ebanghelyo.
Pagbasa sa mga kasulatan.
Pagsunod sa mga sugo.
Pagdawat og calling.
Pakigtambag sa bishop.
Pagtambong sa templo.
Pagsalig sa tigpangalagad nga mga brother ug mga sister.
Pagpasalamat sa mga miyembro sa ward.
Pagpalambo og bag-ong mga panaghigalaay.
Paliboti ang inyong kaugalingon sa katahom.
Pagsinati sa mga kamaya sa kinabuhi.⁹

Samtang kamo maningkamot nga makabaton og positibo nga mga kasinatian diha sa inyong mga ward ug mga branch, inyong mabati ang kalig-on nga moabot pinaagi sa Ginoo, kinsa makahimo sa “[pagpagaan] sa mga alantoson diin anaa gitungtong diha sa inyong mga abaga, gani kamo dili makabati kanila diha sa inyong mga buko-buko, … nga kamo mahimo nga masayod sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit” (Mosiah 24:14).